Krókur
Krókur á Garðaholti er lítill bárujárnsklæddur burstabær sem var endurbyggður úr torfbæ árið 1923. Bærinn er í dag með þremur burstum en árið 1923 var miðburst bæjarins byggð og bæjarhúsin þá aðeins baðstofa og eldhús auk lítils skúrs við útidyrnar. Krókur er staðsettur í nágrenni samkomuhússins á Garðaholti.
Krókur er opinn almenningi til sýnis alla sunnudaga á sumrin (júní - ágúst) frá kl. 13-17. Ókeypis aðgangur.
Hópar sem vilja skoða Krók geta haft samband við bæjarskrifstofurnar í síma 525 8500.
Saga Króks
Um vorið 1934 fékk Þorbjörg Stefanía Guðjónsdóttir ábúð á Króki en maður hennar var Vilmundur Gíslason. Þau hjónin áttu fjögur börn og Guðrún Sveinsdóttir móðir Vilmundar bjó einnig hjá þeim. Þorbjörg Stefanía Guðjónsdóttir (kölluð Tobba) var fædd 1. maí árið 1899. Afmælisdagur hennar var alltaf mikill hátíðisdagur hjá fjölskyldunni. Í Króki var búið allt til ársins 1985 þegar Þorbjörg lést.
Afkomendur Þorbjargar og Vilmundar í Króki gáfu Garðabæ bæjarhúsin í Króki ásamt útihúsum og innbúi árið 1998 með því skilyrði að bærinn yrði endurbyggður. Jón Nordsteien arkitekt stjórnaði endurgerð bæjarins og Einar Hjartarson húsasmíðameistari var fenginn til að vinna verkið. Systurnar Elín og Vilborg Vilmundardætur höfðu umsjón með uppröðun húsmuna. Bærinn er gott dæmi um húsakost og lifnaðarhætti alþýðufólks á þessum landshluta á fyrri hluta 20. aldar.
Fræðsla skólabarna
Stefnt er að því að gefa grunnskólanemendum tækifæri til að nýta Krók í tengslum við fræðslu í skólastarfinu. Skólar sem vilja heimsækja Krók er bent á að hafa samband við bæjarskrifstofurnar í síma 525 8500.
Vinnuaðstaða fyrir listamenn
Listamenn geta fengið úthlutaða vinnuaðstöðu í Króki. Sjá reglur um úthlutun vinnuaðstöðu listamanna í Króki. Auglýst hefur verið eftir umsóknum um vinnuaðstöðuna í Króki tímabilið frá 1. september 2010 til maí 2011. Sjá auglýsingu hér.
Nánari upplýsingar veitir Hulda Hauksdóttir upplýsingafulltrúi, hulda@gardabaer.is, s. 525 8500 / 525 8527.