Skipulagsmál
Skipulagsmál eru á verksviði bæjarstjórnar í samræmi við Skipulags- og byggingarlög nr. 73/1997 og Skipulagsreglugerð nr. 400/1998.
Stjórn skipulagsmála í Garðabæ
Skipulagsstjóri Garðabæjar hefur umsjón með skipulagsgerð í bænum og er framkvæmdastjóri skipulagsnefndar sbr. 7. gr. Skipulags- og byggingarlaga nr. 73/1997.
Skipulagsstjóri er Arinbjörn Vilhjálmsson arkitekt
sími: 525-8582
netfang: arinbjorn@gardabaer.is
Aðstoðarmaður skipulagsstjóra er Kristjana Kjartansdóttir
sími: 525-8577
netfang: kristjanakj@gardabaer.is
Skipulagsnefnd
Skipulagsnefnd fer með skipulagsmál undir yfirstjórn bæjarstjórnar. Nefndin hefur frumkvæði að gerð skipulagstillagna á aðal- og deiliskipulagsstigi og tekur fyrir tillögur á breytingum skipulagsáætlana sbr. 6. grein Skipulags- og byggingarlaga nr. 73/1997. Flest mál sem koma fyrir skipulagsnefnd eru deiliskipulagsbreytingar sem ýmist er vísað til almennrar kynningar (verulegar breytingar skv. 25. grein Skipulags- og byggingarlaga) eða til grenndarkynningar (óverulegar breytingar skv. 2. mgr. 26. greinar sömu laga). Nefndin kemur einnig að samþykkt framkvæmdaleyfa skv. 27. grein Skipulags- og byggingarlaga.
Nefndin starfar á grundvelli skipulagslaga og aðalskipulags Garðabæjar 2004-2016.
Í nefndinni sitja:
Stefán Snær Konráðsson formaður
Ragný Guðjohnsen
Bjarni Benediktsson
Sigrún Aspelund
Eyjólfur Bragason
Kynning skipulags
Mikilvægt er að íbúar Garðabæjar og aðrir sem hagsmuna eiga að gæta fylgist með skipulagsvinnu í sveitarfélaginu og geri athugasemdir á meðan skipulagið er enn í vinnslu telji þeir ástæðu til.
Allar breytingar á skipulagi svo og tillögur að nýju skipulagi ber að kynna almenningi í að minnsta kosti fjórar vikur áður en skipulag er samþykkt í bæjarstjórn og gefa fólki þannig færi á að skila inn athugasemdum sínum.
Tillögur að skipulagsáætlunum eða breytingar á þeim eru til sýnis í þjónustuveri Garðabæjar, Garðatorgi 7 og hér á heimasíðu Garðabæjar. Einnig er hægt að fá frekari útskýringar hjá starfsmönnum þjónustuvers eða á embætti skipulagsstjóra sé þess óskað.
Athugasemdum við kynnt skipulag eða skipulagsbreytingar skal skilað til þjónustuvers Garðabæjar innan auglýsts athugasemdafrests og skulu þær vera skriflegar, þ.e. undirritaðar af þeim sem þær gera.
Íbúar Garðabæjar geta sent inn athugasemdir við auglýst skipulag í gegnum vef Garðabæjar, með því að lykla sig inn á sitt svæði á íbúavefnum Mínum Garðabæ og velja samráð.
Almennt um skipulagsáætlanir og meðferð þeirra
Núgildandi Skipulags-og byggingarlög voru samþykkt árið 1997 (nr.73/1997) og Skipulagsreglugerð árið 1998 (nr.400/1998). Ýmis önnur lög ná til starfsviðs skipulagsnefndar og má sjá yfirlit yfir þau lög á bls. 66-67 í greinargerð aðalskipulags.
Á vef Skipulagsstofnunar www.skipulag.is er að finna greinargott yfirlit yfir lög og reglugerðir varðandi skipulags- og umhverfismál. Þar eru einnig leiðbeiningar um skipulagsmál.
Skipulagsáætlun
Áætlun sem gerir grein fyrir markmiðum viðkomandi stjórnvalda og ákvörðunum þeirra um framtíðarnotkun lands og fyrirkomulag byggðar og lýsir forsendum þeirra ákvarðana. Skipulagsáætlanir skiptast í þrjá flokka: svæðisskipulag, aðalskipulag og deiliskipulag. Svæðis-, aðal- og deiliskipulagsáætlanir skulu vera í innbyrðis samræmi.
Svæðisskipulag
Skipulagsáætlun sem tekur yfir fleiri en eitt sveitarfélag sbr. 12.-15.grein Skipulags-og byggingalaga. Hlutverk svæðisskipulags er að samræma stefnu um landnotkun, samgöngu- og þjónustukerfi, umhverfismál og þróun byggðar á svæðinu á minnst 12 ára tímabili.
Svæðisskipulag höfuðborgarsvæðisins nær til Garðabæjar og gildir það fyrir tímabilið 2001-2024 og var staðfest 20. desember 2002. Svæðisskipulagið er aðgengilegt hér á heimasíðu Garðabæjar. Sérstök samvinnunefnd um svæðisskipulag höfuborgarsvæðisins fer með málefni svæðisskipulags. Fulltrúar Garðabæjar í svæðisskipulagsnefnd eru Stefán Snær Konráðsson og Eyþór Þórhallsson.
Einnig er í gildi sérstakt svæðisskipulag vatnsverndar á höfuðborgarsvæðinu sem staðfest var 1999 og þeir sem vilja fá upplýsingar um það geta haft samband við embætti skipulagsstjóra.
Aðalskipulag
Skipulagsáætlun fyrir tiltekið sveitarfélag þar sem fram kemur stefna sveitarstjórnar um landnotkun, samgöngu- og þjónustukerfi, umhverfismál og þróun byggðar í sveitarfélaginu á minnst 12 ára tímabili sbr. 16.-22. grein Skipulags-og byggingarlaga.
Núgildandi aðalskipulag Garðabæjar gildir fyrir tímabilið 2004-2016 og var staðfest af umhverfisráðherra 12. júlí 2006. Aðalskipulagið er aðgengilegt hér á heimasíðu Garðabæjar. Aðalskipulagsáætlanir aðliggjandi sveitarfélaga eru aðgengilegar á heimasíðum þeirra.
Deiliskipulag
Skipulagsáætlun fyrir afmarkaða reiti innan sveitarfélags sem byggð er á aðalskipulagi og kveður á um nánari útfærslu þess sbr. 23.-26. grein Skipulags-og byggingarlaga. Ákvæði um deiliskipulag eiga jafnt við um þéttbýli og dreifbýli.
Deiliskipulagsáætlanir í Garðabæ eru aðgengilegar hér á heimasíðu í gegnum skipulagsvefsjá Skipulagsstofnunar. Skilmálar einstakra áætlana eru einnig aðgengilegar hér á heimasíðu.
Rammaskipulag
Þegar unnið er að skipulagningu stærri svæða er algengt að unnið sé svokallað rammaskipulag sem má segja að sé millistig milli aðalskipulags og deiliskipulags. Rammaskipulag er þó ekki hluti af lögformlegu skipulagi en er nauðsynleg aðferð til að fá heildarsýn yfir stærri svæði sem eru síðan eftir atvikum deiliskipulögð í áföngum.
Með rammaskipulagi eru mótuð helstu áhersluatriði sveitarstjórnar varðandi yfirbragð byggðar s.s. þéttleika, íbúðasamsetningu og gatnakerfi. Í Garðabæ hefur verið unnið rammaskipulag fyrir fyrirhugaða byggð í Hnoðraholti (2008), Urriðaholti (2006) og Garðaholti (2002).
Svæði án deiliskipulags
Nokkur byggð svæði í Garðabæ eru án staðfests deiliskipulags. Það eru Tún, Garðaholt og Vífilsstaðir.
Á þeim svæðum ber að grenndarkynna allar byggingarleyfisumsóknir í samræmi við 7. mgr.43. greinar Skipulags-og byggingarlaga.
Meðferð skipulagsáætlana
Kveðið er á um meðferð skipulagsáætlana í skipulagslögum og er meginmarkmið laganna að réttur einstaklinga og lögaðila verði ekki fyrir borð borinn þó hagur heildarinnar sé hafður að leiðarljósi. Einnig geta athugasemdir eða ábendingar sem berast á kynningartíma orðið til þess að bæta tillögurnar eða jafnvel að þær verði lagðar til hliðar.
Almennar kynningar á skipulagstillögum standa yfirleitt 6 vikur en óverulegar breytingar 4 vikur. Reynt er eftir fremsta megni að stytta meðferðartíma en um leið er lögð áhersla á vandaða málsmeðferð. Aðal-og svæðissskipulagsbreytingar taka þó yfirleitt lengri tíma.
Að lokinni kynningu þarf að taka tillögur fyrir í skipulagsnefnd og bæjarstjórn til samþykktar. Óverulegar deiliskipulagsbreytingar þarf þó ekki að taka fyrir aftur ef engar athugasemdir berast. Þegar deiliskipulagstillögur hafa verið samþykktar í bæjarstjórn þarf að senda tillögur ásamt fleiri málsgögnum til yfirferðar hjá Skipulagsstofnun og að þeirri athugun lokinni er tillagan auglýst í B-deild Stjórnartíðinda og þar með tekur skipulagið gildi.
Aðal-og svæðisskipulagstillögur eru sendar umhverfisráðherra til staðfestingar.