Bæjarlistamaður Garðabæjar býður heim á vinnustofu sína

30.04.2015
Bæjarlistamaður Garðabæjar býður heim á vinnustofu sína
Soffía Sæmundsdóttir fjallar um verk sín í fyrirlestri á vegum Grósku

Soffía Sæmundsdóttir myndlistarmaður var útnefnd bæjarlistamaður Garðabæjar árið 2014 og hún hefur starfað ötullega að myndlist sinni undanfarinn áratug og haldið ótal sýningar innanlands og utan. Hún býr í Garðabæ en hefur verið með vinnustofu sína að Fornubúðum 8 í Hafnarfirði undanfarin átta ár og opnar hana reglulega upp á gátt.

Sögusvið Soffíu - sýningarspjall og stofutónleikar á vinnustofu bæjarlistamannsins

Síðasta vetrardag opnaði Soffía Sæmundsdóttir myndlistarmaður og bæjarlistamaður Garðabæjar vinnustofu sína að Fornubúðum 8 fyrir gesti og gangandi með sýningunni Sögusvið. Þar sýnir hún málverk, unnin á undanförnum árum auk nýrrar seríu “Vígamenn” sem unnin er út frá Egilssögu. Í verkum hennar má oft sjá vísun í liðinn tíma en sögusviðið nú er markvisst fært í hendur 18. aldar aðalsmanna sem fara m.a. í spor vígamanna, konunga og skálda. 

Sunnudagana 3. og 10. maí klukkan 15 mun Soffía vera með sýningarspjall og tala um verk sín á sýningunni og það skapandi ferli sem fram fer á vinnustofunni. Garðbæingar eru sérstaklega boðnir velkomnir, en í apríl hélt Soffía opinn fyrirlestur á vegum Grósku um feril sinn og áhrifavalda. Vinnustofa listamanns er hluti af sköpun hans og er áhugavert að sjá þar verk í þróun, hvernig þau eru unnin og hvað veitir innblástur.

Mánudaginn 4. maí klukkan 20 býður Álftaneskórinn til stofutónleika á sýningunni þar sem flutt verður tónlist og lesin ljóð. Aðgangur er ókeypis og allir eru hjartanlega velkomnir.

 

 

 

 

Myndir með frétt

Til baka