Nærumhverfið skiptir okkur máli - íbúafundur 12. maí

08.05.2015
Nærumhverfið skiptir okkur máli - íbúafundur 12. maí
Bæjarfulltrúar hreinsa lækinn

Nærumhverfið skiptir okkur máli er yfirskrift íbúafundar á vegum umhverfisnefndar Garðabæjar sem verður haldinn þriðjudaginn 12. maí nk.í safnaðarheimili Vídalínskirkju.  Á fundinum verður m.a. rætt um vorhreinsun, gróður á lóðum, trjáklippingar, safnhaugagerð, hreinsun og viðhald gatna, slátt og hirðingu opinna svæða.  Einnig verður rætt um verkefni sumarstarfsmanna, umferðarmál, nágrannavörslu og hlutverk götustjóra.  

Fundurinn hefst kl. 17:15 þriðjudaginn 12. maí og stendur til kl. 19.  Jóna Sæmundsdóttir formaður umhverfisnefndar setur fundinn og dagskráin hefst á örfyrirlestrum þar sem til máls taka Erla Bil Bjarnardóttir umhverfisstjóri, Smári Guðmundsson garðyrkjustjóri, Eysteinn Haraldsson bæjarverkfræðingur og Sófus Gústavsson íbúi á Smáraflöt.  Að því loknu verða umræður fundargesta og fyrirspurnir þar sem leitast verður svara við hvað er brýnast í umhverfismálum Garðabæjar og hvað er hægt að gera betur.  Gunnar Einarsson bæjarstjóri verður fundarstjóri á fundinum.  Boðið verður upp á súpu og kaffi meðan á fundinum stendur.   Hér má sjá nánari upplýsingar um fundinn

Hreinsunarátak og vorhreinsun lóða

Hreinsunarátak Garðabæjar, hreinsað til í nærumhverfinu, stóð yfir í apríl.  Fjölmargir hópar, íbúar við tilteknar götur og félagasamtök,  tóku þátt í átakinu og hreinsuðu ákveðin svæði í bænum. Bæjarfulltrúar í bæjarstjórn Garðabæjar létu ekki sitt eftir liggja og hreinsuðu svæði við lækinn nálægt Ásgarði þriðjudaginn 28. apríl sl. eins og sjá má á meðfylgjandi myndum með frétt. Vorhreinsun lóða hófst í lok apríl og stendur til 13. maí nk. þar sem Garðbæingar eru hvattir til að hreinsa lóðir sínar og garðúrgangur er hirtur á tilteknum dögum fyrir hvert hverfi í bænum.  Eftir helgi dagana 11.-13. maí verður farið um Álftanes, Garðahverfi, Prýði, Hleinar og við Álftanesveg.  Átakið og vorhreinsunin hefur gengið mjög vel og bæjarbúar eiga þakkir skildar fyrir sitt framlag.

 

 

Myndir með frétt

Til baka