Höfuðborgarsvæðið markaðssett sem ein heild

18.03.2016
Höfuðborgarsvæðið markaðssett sem ein heild
Áshildur Bragadóttir forstöðukona Höfuðborgarstofu, Haraldur Sverrisson bæjarstjóri Mosfellsbæjar, Ármann Kr. Ólafsson bæjarstjóri Kópavogs, Dagur B. Eggertsson borgarstjóri Reykjavíkur, Haraldur L. Haraldsson bæjarstjóri Hafnarfjarðar, Ásgerður Halldórsdóttir bæjarstjóri Seltjarnarness og Gunnar Einarsson bæjarstjóri Garðabæjar.

Vörumerkið Reykjavík Loves verður notað til að markaðssetja höfuðborgarsvæðið í heild til erlendra ferðamanna samkvæmt samstarfssamningi sem Dagur B. Eggertsson borgarstjóri og bæjarstjórar sveitarfélaga á höfuðborgarsvæðinu, þau Ármann Kr. Ólafsson í Kópavogi, Haraldur L. Haraldsson í Hafnarfirði, Gunnar Einarsson í Garðabæ, Haraldur Sverrisson í Mosfellsbæ og Ásgerður Halldórsdóttir á Seltjarnarnesi skrifuðu undir í dag.

Samstarf á vettvangi markaðsmála, viðburða og upplýsingamála í ferðaþjónustu

Samningurinn felur í sér samstarf sveitarfélaganna á vettvangi markaðsmála, viðburða og upplýsingamála í ferðaþjónustu á höfuðborgarsvæðinu. Markmið samstarfsins er að vinna að því að ferðamenn dreifist meira um höfuðborgarsvæðið, verji þar meiri tíma og nýti betur afþreyingu og þjónustu á svæðinu í heild.
Í samningnum kemur m.a. fram að vörumerkið Reykjavík sé þekkt og með samvinnu sveitarfélaganna á höfuðborgarsvæðinu undir sameiginlegu vörumerki Reykjavík Loves megi efla svæðið enn frekar sem eftirsóknarverðan áfangastað fyrir erlenda ferðamenn.

Höfuðborgarstofa ber ábyrgð á framkvæmd þeirra verkefna sem tilgreind eru í samstarfinu. Allir samstarfsaðilar eiga fulltrúa í samstarfsnefnd verkefnisins en hlutverk samstarfsnefndarinnar er að afgreiða fjárhagsáætlun vegna samstarfsins, meta framgang þess og standa vörð um að unnið sé í samræmi við markmið samningsins. Verkefnið er hluti af sóknaráætlun höfuðborgarsvæðisins sem haldið er utan um og stýrt af Samtökum sveitarfélaga á höfuðborgarsvæðinu (SSH).

Verkefnið byggir á eldra samstarfi sveitarfélaganna frá árinu 2005 um markaðsstarf, viðburði og upplýsingamiðlun til erlendra ferðamanna. Það samstarf var eflt til muna árið 2013 á vettvangi SSH þegar ákveðið var að kynna höfuðborgarsvæðið í heild undir vörumerkinu Reykjavík. Auðkenni fyrir höfuðborgarsvæðið sem áfangastað fyrir erlenda ferðamenn var síðan kynnt í október 2014 undir merkjum Reykjavík Loves.
Aukið samstarf sveitarfélaga á höfuðborgarsvæðinu í markaðssetningu gagnvart erlendum ferðamönnum hefur nú þegar skilað sér í gerð sameiginlegs kynningarefnis s.s. þemabæklinga undir merkjum Reykjavík Loves þar sem sundlaugar, söfn og hjólastígar á höfuðborgarsvæðinu eru kynnt sérstaklega fyrir erlendum ferðamönnum.
Samningurinn sem undirritaður var á Höfuðborgarstofu í dag gildir til 31. desember 2018.

Í tilefni af undirritun samningsins sögðu borgarstjóri og bæjarstjórar á höfuðborgarsvæðinu eftirfarandi:
Dagur B. Eggertsson borgarstjóri: „Gott samstarf á milli sveitarfélaganna á höfuðborgarsvæðinu er mikilvægt og við eigum öll mikil tækifæri í sameiginlegri markaðssetningu. Þessi samningur endurspeglar að samstarf sveitarfélaganna hefur sjaldan verið betra en nú og auðvitað eru það umtalsverð tímamót að sveitarfélögin hafa sameinast um að markaðsetja höfuðborgarsvæðið í heild undir nafninu Reykjavík. “
Ármann Kr. Einarsson bæjarstjóri í Kópavogi: „Gríðarleg fjölgun erlendra ferðamanna kallar á aukið markaðsstarf til að kynna afþreyingu á höfuðborgarsvæðinu öllu. Því fagna ég auknu samstarfi milli sveitarfélaganna í markaðsmálum, við njótum öll góðs af því.“
Haraldur L. Haraldsson bæjarstjóri í Hafnarfirði: „Við fögnum auknu og samræmdu samstarfi á þessu sviði og munum taka vel á móti vaxandi fjölda ferðamanna. Tækifærin á svæðinu eru mikil og allir innviðir til staðar.“
Gunnar Einarsson bæjarstjóri í Garðabæ: „Ég hef miklar væntingar til þess að öflugt samstarf sveitarfélaganna verði til að styrkja þau öll og geri þá fjölbreyttu menningu og afþreyingu sem er í boði á höfuðborgarsvæðinu aðgengilegri fyrir ferðamenn.“
Haraldur Sverrisson bæjarstjóri í Mosfellsbæ: „Ég hef mikla trú á því að höfuðborgarsvæðið nái markmiðum sínum í málefnum er varða ferðaþjónustuna með því að sameina krafta sína eins og gert er með þessu samkomulagi.“
Ásgerður Halldórsdóttir bæjarstjóri á Seltjarnarnesi: „Seltjarnarnesbær lýsir yfir mikilli ánægju með samstarfið við nágrannasveitarfélögin og hefur þegar sett af stað nefnd sem ætlað er að móta stefnu sveitarfélagsins gagnvart ferðaþjónustunni.“

Til baka