Jazzveisla næstu daga

21.04.2017
Jazzveisla næstu daga
DeLux kvartett Sigurðar Flosasonar

Jazzhátíð Garðabæjar hófst að venju með tónleikum að kvöldi til á Sumardaginn fyrsta, 20. apríl sl., í Kirkjuhvoli, safnaðarheimili Vídalínskirkju.  Gunnar Valur Gíslason, formaður menningar- og safnanefndar, bauð gesti velkomna á hátíðina sem nú er haldin í 12. sinn.  Hljómsveit kvöldsins var DeLux kvartett Sigurðar Flosasonar en með honum í sveitinni eru þrír af fremstu jazztónlistarmönnum Lúxemborgar þeir Michel Reis á píanó, Marc Demuth á kontrabassa og Jeff Herr á trommur. Kvartettinn flutti nýjan evrópskan jazz við góðar undirtektir tónleikagesta.  Hljómsveitin Polýfónía úr Tónlistarskóla Garðabæjar hitaði upp fyrir tónleikagesti þegar gengið var í hús og fleiri hljómsveitir úr skólanum ætla að hita upp fyrir kvöldtónleikana framundan.  

Jazzveisla í kvöld - stóra Bongóbandið - Tómas R. Einarsson - Sigríður Thorlacius - Bogomil Font o.fl.

Á föstudagskvöldinu 21. apríl verður boðið upp á sannkallaða jazzveislu í Kirkjuhvoli þegar Tómas R. Einarsson mætir með 10 manna jazzband skipað nokkrum af fremstu söngvurum og hljóðfæraleikurum landsins, þar má nefna Sigríði Thorlacíus söngkonu og Bogomíl Font. Hljómsveitin flytur latínjazz af metsöluplötunni Bongó sem kom út fyrir síðustu jól. 

Tónleikar allan laugardaginn

Á laugardeginum 22. apríl geta gestir notið jazztónlistar allan daginn fram á kvöld en fyrstu tónleikarnir hefjast kl. 13:30 í Kirkjuhvoli þegar sænski jazzpíanóleikarinn Mattias Nilsson flytur eigin tónsmíðar, þjóðlög og sálma frá heimalandi sínu. 
Svo tekur við tónleikahald í félagsmiðstöðinni Jónshúsi í Sjálandi kl. 15 á laugardeginum þar sem hin unga og efnilega jazzsöngkona María Magnúsdóttir úr Garðabæ, mætir með kvartett sinn og flytur jazzstandarda með swing ívafi. 
Jazztónlistarveislan heldur svo áfram síðdegis kl. 17 í hinu litla en notalega Haukshúsi á Álftanesi þar sem tríó Agnars Márs Magnússonar flytur þjóðlegan jazz og allir eru velkomnir þar á meðan húsrúm leyfir. 
Hátíðinni lýkur með útgáfutónleikum Richard Andersson NOR í Kirkjuhvoli með stuðningi ,,Nordic Cultural Point“. En þar mæta til leiks danski bassaleikarinn Richard Andersson ásamt Garðbæingunum þeim Óskari Guðjónssyni og Matthíasi Hemstock.

Hljómsveitir úr Tónlistarskóla Garðabæjar hita upp fyrir alla kvöldtónleikana í Kirkjuhvoli og hefst þeirra leikur um kl. 20.

Aðgangur er ókeypis á alla viðburði jazzhátíðarinnar og allir eru velkomnir á meðan húsrúm leyfir. Dagskráin er aðgengileg hér á vef Garðabæjar.
Sjá líka fésbókarsíðu Jazzhátíðar Garðabæjar.

Myndir með frétt

Til baka