Nemendur Hofsstaðaskóla fengu viðurkenningar fyrir forritun

08.06.2017
Nemendur Hofsstaðaskóla fengu viðurkenningar fyrir forritun
Nemendur Hofsstaðaskóla á lokahófi Microbit forritunarleikanna

Í lok maí var fulltrúum Hofsstaðaskóla boðið á lokahóf Micro:bit forritunarleikanna Kóðinn 1.0 sem fram fóru í vetur fyrir nemendur í 6. og 7. bekk. Lokahófið var haldið í húsakynnum Ríkisútvarpsins og þar afhenti Kristján Þór Júlíusson mennta- og menningarmálaráðherra viðurkenningar með aðstoð Ævars vísindamanns. Viðurkenningarnar voru afhentar fyrir þátttöku í verkefninu og framkvæmd kennslunnar. Það voru tveir nemendur Hofsstaðaskóla og tveir nemendur Klébergsskóla á Kjalarnesi sem fengu viðurkenningar sem kóðari ársins.  Svo fengu nemendur að fara í skoðunarferð um húsakynni RÚV þar sem nemendur fengu m.a. að kynnast hljóð- og myndstúdíóum RÚV, búningageymslunni og annarri aðstöðu. 

Þau Katrín Eva Gunnþórsdóttir og Viktor Páll Veigarsson, nemendur Hofsstaðaskóla, fengu að heimsækja höfuðstöðvar fyrirtækisins CCP í vikunni þar sem þau fengu að skoða og prófa ýmsa leiki í sýndarveruleika. Heimsóknin var sérstök viðurkenning fyrir þátttöku í Micro:bit forritunarverkefninu.

Sjá frétt á vef Hofsstaðaskóla um lokahófið.

Frétt á vef Hofsstaðaskóla um heimsókn í CCP

Forritunarleikarnir Kóðinn 1.0

Verkefnið sem er hýst af KrakkaRúv snýst um að kynna grunnatriði forritunar fyrir nemendum í 6. og 7. bekk grunnskóla. Um er að ræða samstarfsverkefni mennta- og menningarmálaráðuneytis, Menntamálastofnunar, Samtaka iðnaðarins ásamt fyrirtækjum í tæknigeiranum.  

Sjá nánar í frétt á vef Menntamálastofnunar um upphaf verkefnisins.

Vefur KrakkaRúv - Kóðinn 1.0

 


Til baka