Taktu með þér vin í göngu!

07.09.2017
Taktu með þér vin í göngu!
Gönguhópur við Sjálandsskóla

Það var góð þátttaka í fyrstu lýðheilsugöngunni í Garðabæ í september.  Haldið var í hressingargöngu um Sjálandshverfið miðvkudaginn 6. september sl. undir leiðsögn Antons Kára og Hildar Kötlu íþróttafræðinema. Gengið var í um klukkustund og göngugarpar gátu farið í skemmtilegar æfingar á leiðinni.   

Vinátta – gengið frá Ásgarði 13. september kl. 18 – taktu með þér vin!

Vinátta er þema næstu göngu sem haldið verður í miðvikudaginn 13. september nk. kl. 18:00.  Gengið verður frá íþróttamiðstöðinni Ásgarði um klukkutíma hring, létt og þægileg ganga fyrir alla aldurshópa.  Þátttakendur í göngunni eru hvattir til að taka með sér vin í gönguna og gjarnan að reyna draga einhvern með sér sem fer að öllu jöfnu ekki oft í göngur.  Allir eru velkomnir í gönguna en tilgangurinn með verkefninu er að hvetja fólk á öllum aldri til útivistar og hreyfingar í góðum félagsskap og efla þar með heilsu sína og lífsgæði. 

Sögu- og náttúrugöngur síðari hluta september

Miðvikudaginn 20. september kl. 18 verður farið í göngu undir þemanu saga.  Pétur Ármansson leiðir þá göngu frá Bjarnastöðum þar sem sagt verður frá sögu merkra húsa á Álftanesi.  Síðasta gangan í september verður miðvikudaginn 27. september en þá verður haldið í göngu undir þemanu náttúra í Heiðmörk þar sem gengið verður að Selholti undir leiðsögn Ragnheiðar Traustadóttur fornleifafræðings.

Göngurnar eru um leið áframhald sögu- og fræðslugangna sem hafa verið í boði á þessu ári og undanförnu ári í Garðabæ og hafa verið vel sóttar af almenningi.  

Allar upplýsingar um göngustaði og gönguleiðir annars staðar á landinu má finna á vef verkefnisins www.fi.is/lydheilsa. 

Til baka