Sundlaugin í Ásgarði opnuð á ný

20.04.2018
Sundlaugin í Ásgarði opnuð á nýÁsgarðslaug í Garðabæ opnaði á ný sumardaginn fyrsta, fimmtudaginn 19. apríl sl. Við opnunina var skrifað undir samstarfssamning við Embætti landlæknis um að Garðabær verði ,,Heilsueflandi samfélag“.   Sjá nánar í frétt hér á vefnum. 

Það var fjölmennt við opnunina og margir sem biðu spenntir eftir að fá að stinga sér til sunds á ný. ,,Fósturvísarnir" félagar í karlakórnum Fóstbræðrum fluttu nokkur lög fyrir viðstadda áður en klippt var á borðan ofan í laugina og tóku einnig lagið á sundlaugarbakkanum.  Ungir sundiðkendur úr Stjörnunni syntu fyrstu ferðirnar í nýju lauginni og boðið var upp á hressingu við sundlaugarbakkann.

Fleiri myndir frá opnuninni eru hér á fésbókarsíðu Garðabæjar. 

Ókeypis aðgangur 19.-22. apríl

Við opnun Ásgarðlaugar verður boðið upp á tónlistaratriði og ungir sundiðkendur Stjörnunnar synda fyrstu ferðirnar í nýju lauginni.  Dagana 19.-22. apríl nk. er ókeypis aðgangur fyrir alla í Ásgarðslaug í tilefni af enduropnun laugarinnar.  Sundlaugin í Ásgarði er opin til kl. 21 föstudaginn 20. apríl og um helgina er opið frá kl. 08-18.  

Í sumar verður í tilraunaskyni haft opið í Ásgarðslaug til kl. 22 á kvöldin og börn yngri en 18 ára fá ókeypis aðgang í sundlaugar bæjarins. 

Miklar endurbætur í Ásgarði

Endurbætur á sundlauginni í Ásgarði og rýmum innandyra er ein stærsta framkvæmdin sem hefur verið í gangi hjá Garðabæ á þessu og síðasta ári. 

Öll yfirborðsefni á á baðklefum og sundlaug hafa verið endurnýjuð.  Nýir heitir pottar hafa verið byggðir með nuddstútum undir yfirborðinu, nýr kaldavatnspottur var byggður sem og vað- og setlaug með barnarennibraut.  Gufubaðið hefur verið endurnýjað og nýjar útisturtur settar upp fyrir utan.  Allar sturtur hafa verið endurnýjaðar.  Útiklefar hafa verið endurnýjaðir og í inniklefum karla og kvenna eru nýjir klefar fyrir fatlað fólk.  Von er á nýrri lyftu ofan í sundlauginni fyrir fatlað fólk í byrjun maí sem bætir verulega aðgengi fyrir fatlaða að lauginni. 

Ný girðing kemur utan um allt sundlaugarsvæðið og í nýju vaktherbergi verður fullkomið eftirlits- og myndavélakerfi sem eykur mjög öryggi sundlaugargesta.
Innandyra var gólf í danssal lagað og rými opnað við hlið salarins þar sem þrekaðstaða almennings flyst upp úr kjallara.  Kjallari var jafnframt stækkaður til að koma hreinsibúnaði fyrir.
 

Myndir með frétt

Til baka