Álftanesvegur
Að tillögu skipulagnefndar samþykkti bæjarstjórn Garðabæjar á fundi sínum þann 5. mars 2009 framkvæmdaleyfi fyrir lagningu stofnbrautarinnar Álftanesvegar frá Hafnarfjarðarvegi í Engidal að bæjarmörkum við sveitarfélagið Álftanes, alls 3,8 km sbr. umsókn Vegagerðarinnar dags. 27.janúar 2009.
Vegagerðinni er veitt leyfi fyrir lagningu stofnbrautarinnar á grundvelli framlagðrar tillögu sem er í samræmi við Svæðisskipulag höfuðborgarsvæðisins 2001-2024 m.s.br. og Aðalskipulag Garðabæjar 2004-2016 m.s.br. Veitt leyfi er einnig í samræmi við niðurstöðu mats á umhverfisáhrifum framkvæmdarinnar árið 2002.
Framkvæmdaleyfið var gefið út af undirrituðum 7.apríl 2009.
Samþykkt eru framlögð gögn:
- Álftanesvegur (415) Hafnarfjarðarvegur-Bessastaðavegur, 1.hefti. Útboðslýsing.
- 3.hefti; Uppdrættir, vegagerð og undirgöng* (ath. mjög þungt skjal og getur verið erfitt að opna þar sem nettenging er ekki öflug) og
- 4.hefti; Uppdrættir, brúargerð, dags febrúar 2009.
* Hér eru teikningar úr 3. hefti í skjali sem er minna og léttara.
Auk þess sérstök yfirlýsing Vegagerðarinnar á því hvernig öryggi gangandi skuli framfylgt á meðan á framkvæmdum stendur dags. 1.apríl 2009.
Verkið felst í því að leggja nýja 3,8 km langa stofnbraut fyrir akandi umferð frá Hafnarfjarðarvegi í Engidal að sveitarfélagsmörkum við Álftanes. Brautin verður með einni akrein í hvora átt.
Brautin mun lögð í nýju vegstæði um Garðahraun austan og norðan við nýju byggðina í Garðahrauni, norðan við Garðastekk og um norðanvert Garðaholt þar sem hún verður í legu núverandi Álftanesvegar að bæjarmörkum við Álftanes.
Byggð verður svokölluð Garðabrú við aðkomu að Ásahverfi og Garðahraunshverfi í Engidal sem verður hluti af mislægum gatnamótum ásamt aðreinum og frá fráreinum. Byggð verða tvenn göng fyrir gangandi umferð; Garðastekks- og Garðaholtsgöng. Legu strengja, vatns-og hitaveitulagna verður breytt. Þá verða lagðir nýjir háspennu-og rafdreifistrengir og nýjar síma-, vatns-,og hitaveitulagnir. Einnig fylgir verkinu landmótun, sáning og yfirborðsjöfnun hrauns innan verksvæðisins.
Þeir sem vilja afla sér frekari upplýsingar um framkvæmdina geta leitað til skipulagsstjóra Garðabæjar. Sérstakur kynningarfundur verður haldinn á næstunni þar sem skipulagsyfirvöld og Vegagerðin munu kynna framkvæmdir við lagningu brautarinnar, framgang þeirra og umfang. Boðað verður til fundarins með auglýsingu í fjölmiðlum og verður hann öllum opinn.
Telji þeir sem hagsmuna eiga að gæta, rétti sínum hallað með niðurstöðu bæjarstjórnar um framkvæmdaleyfisumsókn, er viðkomandi heimilt að skjóta málinu til úrskurðarnefndar skipulags-og byggingarmála. Kærufrestur er einn mánuður frá því kæranda var kunnugt, eða mátti vera kunnugt um samþykkt sveitarstjórnar.
Garðabæ 7. apríl 2009
Arinbjörn Vilhjálmsson
skipulagsstjóri Garðabæjar