Golfnámskeið GKG 2017

                                                                         

  

 


Golfleikjanámskeið Golfklúbbs Kópavogs og Garðabæjar (GKG) 
Heimilisfang: Við Vífilsstaði, s. 570-7373, netfang:  gkg@gkg.is

 

 

Aldur:
6-12 ára. Á námskeiðunum verður nemendum skipt í tvo aldurshópa, 6 til 8 og 9 til 12 ára. 

Dagsetningar:

12.- 16. júní - 5 dagar
19.-23. júní - 5 dagar 
26.- 30. júní – 5 dagar
3.-7. júlí - Engin námskeið vegna meistaramóts GKG
10.-13. júlí - 4 dagar 
17. – 21. júlí - 5 dagar
24. – 28. júlí – 5 dagar 
31. -4. ágúst - 5 dagar 

Tími:
Haldin verða 2 námskeið á dag í 7 vikur, eða alls 14 vikulöng golfnámskeið. Hægt er að velja um námskeið kl. 9-12 eða kl. 13-16.

Verð:
5 daga námskeið kostar kr. 13.600
4 daga námskeið kostar kr. 10.880

Veittur er 20% systkinaafsláttur. Einnig er veittur 20% afsláttur ef sótt eru fleiri en eitt námskeið.

Ath. Þátttaka á golfleikjanámskeiðunum veitir aukafélagsaðild í GKG. Innifalið í aukaaðild er aðgangur að 5 holu æfingavellinum fyrir barnið og fjölskyldumeðlimi til að koma og leika sér á þegar námskeið eru ekki í gangi. Einnig er hægt að nýta högg-æfingasvæðið og eru seldar æfingafötur í golfverslun GKG.

Hægt er að stunda æfingar frá 8 ára aldri hjá GKG sem félagsmaður.  Nánari upplýsingar um æfingatövlud, verðskrá ofl. er að finna á heimasíðu GKG.  Ef tekið er þátt í tveimur námskeiðum þá er frír aðgangur að félagsæfingum það sem eftir er af sumartímabilinu (til 21. sept).  Þó er miðað við lágmark 8 ára á árinu.

Markmið:
Markmið golfleikjanámskeiðanna er að kynna golfíþróttina fyrir börnunum og ýta undir áhuga þeirra á því að leggja stund á þessa fjölskylduvænu íþrótt. Farið verður í helstu þætti golfleiksins, allt frá púttum til upphafshögga og eru leiðbeiningar gjarnan í formi golfleikja ýmiss konar. Einnig verður lögð áhersla á að kynna helstu golfsiði og golfreglur fyrir nemendum. Mikilvægt er að á golfnámskeiðinu séu einnig fjölbreyttir leikir sem efla hreyfiþroska barnanna, s.s. samhæfingu, liðleika og jafnvægi, enda eru það mikilvægir þættir í hreyfingum golfsveiflunnar. Forgangstriði námskeiðanna eru að þau séu skemmtileg, að börnin njóti sín og þróa jákvætt viðhorf til golfíþróttarinnar.

Námskeiðslýsing:
Á námskeiðunum er nemendum skipt í hópa eftir kyni og aldri, sé þess kostur. Lögð er áhersla á að kynna íþróttina fyrir börnunum í gegnum golftengda leiki og hreyfingu. Leiðbeinendur koma úr hópi afrekskylfinga GKG, sem eru á aldrinum 16-20 ára og miðað er við að ekki séu fleiri en 6-8 iðkendur per leiðbeinanda. Auk þess að notast við venjulegan golfbúnað, þá fá krakkarnir einnig að kynnast leikjum og æfingum með svokölluðum SNAG búnaði, en hann hentar sérlega vel til að auðvelda iðkendum að ná betri tökum á íþróttinni og að auka skemmtanagildið. Á seinasta degi námskeiðsins kynnast þau leiknum sjálfum enn frekar með því að leika æfingavöllinn okkar þar sem brautirnar eru 40-60 metra langar. Námskeiðum lýkur síðan með pylsuveislu og afhendingu viðurkenningarskjals frá GKG.

Aðstaða:
Tekið er á móti börnunum á neðri hæð Íþróttamiðstöðvar GKG, en gengið er inn norðan megin í húsið, og eru þau sótt þangað aftur. Börnin hafa með sér nesti sem er borðað á sama stað, og ef veður er óhagstætt, þá fer hluti æfinganna fram þar einnig, enda aðstaða til æfinga innanhúss eins og best verður á kosið. Ekki er nauðsynlegt að eiga golfkylfur til að taka þátt í námskeiðum hjá GKG, en búnaður er til láns meðan á námskeiði stendur.

Leiðbeinendur:
Yfirumsjónarmaður er Sverrir Ólafur Torfason, sem hefur mikla reynslu sem leiðbeinandi hjá GKG. Leiðbeinendur námskeiðanna koma úr hópi afrekskylfinga úr GKG, á aldrinum 16 til 21 árs, langflestir eru þeir með verulega reynslu af námskeiðahaldi. Þess verður gætt eftir fremsta megni að hópar undir umsjón leiðbeinanda verði ekki skipaðir fleiri en 6-8 börnum.

Skráning: 
Skráning fer fram rafrænt á skráningarformi á heimasíðu GKG

Bent er á að koma vel klædd því allra veðra er von, og með gott nesti.  Kylfur eru til láns á námskeiðinu.

Stelpur í golfi

Strákar á golfnámskeiði