Endurbætur á Ásgarðslaug
Sundlauginni í Ásgarði verður lokað fyrir almenningi frá og með 15. nóvember 2016 til 1. nóvember 2017 vegna framkvæmda við endurbætur á lauginni.
Aðgangsmiðar í Ásgarðslaug gilda í Álftaneslaug eins og hingað til. Gym-Heilsa rekur ræktina í Álftaneslaug þannig að það þarf að kaupa aðgang að henni sérstaklega. Í Ásgarði verður áfram hægt að nýta aðgangskortin til að komast í ræktina en sundklefarnir verða lokaðir.
Helstu breytingar
- Öll yfirborðsefni verða endurnýjuð á baðklefum og sundlaug.
- Byggðir verða nýir heitir pottar með nuddstútum undir yfirborðinu.
- Nýr kaldavatnspottur verður byggður sem tengdur verður hreinsikerfi og hitastýringu.
- Vað-/setlaug verður byggð. Þar verður komið fyrir barnarennibraut.
- Tveir „nuddfossar“ verða settir upp á bakka barnalaugarinnar.
- Gufubað verður endurnýjað og flísalagt.
- Nýjar útisturtur verða settar upp fyrir utan gufubaðið.
- Sundlaugin verður óbreytt í lögun en tröppur í enda barnalaugar fjarlægðar og einnig „sveppurinn“ til að skapa betra rými til kennslu yngstu aldurshópa.
- Flísalögn í sundlaug og umhverfis hana verður endurnýjuð sem og ljósabúnaður, öryggisbúnaður og hreinsikerfi.
- Nýir ráspallar verða settir upp og mun sundlaugin rúma tímatökutæki til sundmóta ef svo ber undir.
- Útiklefar verða endurnýjaðir með þremur sturtum hvor og hitalömpum. Salerni verða í útiklefum. Gengið verður út úr sturtusvæði út á sundlaugarsvæðið þannig að vott og þurrt svæði skarast ekki.
- Í inniklefum karla og kvenna verður byggður nýr klefi fyrir fatlaða með salerni og sturtu sem hægt er að loka af.
- Sturtur verða allar endurnýjaðar ásamt lögnum og varmaskiptum. Skápar munu halda sér ásamt aðgangsstýrikerfi.
- Ný girðing kemur utan um allt sundlaugarsvæðið. Áferð á girðingu og húsum verður standandi timburklæðning. Vaktturn hverfur og í staðinn verður vaktherbergi á útisvæði með nokkrum skjám fyrir myndavélakerfi.
- Geymsla fyrir kennslutæki og áhöld verður við hlið barnalaugar ásamt aðstöðu kennara og þjálfara.
- Á efstu hæð verður gólfið í danssalnum lagað.
- Við hlið danssalarins verður gamla gufubaðið fjarlægt og rýmið opnað. Þar verður þrekaðstaða almennings. Hlaupabretti, þrekhjól og stigvélar verða færðar þangað upp ásamt nokkrum alhliða styrktarþjálfunartækjum og léttum lóðum.
- Kraftþjálfunaraðstaða íþróttafólks verður flutt úr kjallaranum þangað sem þrekaðstaða almennings er nú.
Til að koma fyrir nýjum pottum og hreinsibúnaði verður kjallari
stækkaður og mun hann ná kringum alla laugina. Inngangur í kjallara
verður frá Stjörnutorgi. Skúr við suðurenda svæðisins verður fjarlægður
og trjágarður lendir utan girðingar.
Vegna vinnuaðstöðu verktaka þarf að fjarlægja tré við suðurendann og
verður sá reitur endurskipulagður við lokafrágang að verki loknu.
Áætluð opnun sundlaugarinnar er 1. nóvember 2017.