26. fundur

Farið var yfir helstu forsendur í fjárhagsáætlun Garðabæjar fyrir árið 2018. Fyrri umræða um fjárhagsáætlun er fyrirhuguð í bæjarstjórn Garðabæjar 2. nóvember nk.

Umræður voru um ramma fyrir menningarmálin.

Fylgiskjöl

• Forsendur og verkferlar.pdf

Tvennir tónleikar af þremur hafa nú verið haldnir í tónleikaröðinni Þriðjudagsklassík sem nú er haldin haustið 2017. Þriðjudagskvöldið 3. október sl. steig Hið íslenska gítartríó á svið í sal Tónlistarskóla Garðabæjar þar sem tónleikarnir fara fram. Ágætis mæting var á tónleikana og þar á meðal áhorfenda voru líka nemendur Tónlistarskólans sem fá ókeypis aðgang á tónleikana. Næstu og síðustu tónleikarnir í tónleikaröðinni verða haldnir þriðjudaginn 7. nóvember nk. þegar kammerhópurinn Camerarctica kemur fram.

Undirbúningur fyrir hina árlegu Tónlistarveislu í skammdeginu er hafinn. Að þessu sinni verður tónlistarveislan fimmtudagskvöldið 9. nóvember nk. í göngugötunni á Garðatorgi. Myndlistarfélagið Gróska tekur þátt eins og fyrri ár og einnig verður hugað að samvinnu við miðbæjarsamtök Garðabæjar og fyrirtæki á torginu. Einnig var greint frá hvernig kynningu á viðburðinum hefur verið háttað undanfarin ár.

Upplýsinga- og menningarfulltrúi greindi frá fyrirhuguðum fundi með fyrirtækinu Gagarín þar sem farið verður yfir það nýjasta sem fyrirtækið hefur verið að gera á sviði menningarframsetningar með það í huga að skoða með hvaða hætti væri hægt að efla minjagarðinn og upprunalegt margmiðlunarefni garðsins.

Einnig er verið að skoða í samvinnu við landslagsarkitekt hvernig umhverfi bæjarins Hofsstaða geti litið út og þá um leið væri æskilegt að skoða einnig tengingu við minjagarðinn og miðbæjarsvæðið.

Bréf Ármanns Helgasonar, f.h. Camerarctica, dags. 9. október 2017, um styrk vegna árlegra tónleika undir yfirskriftinni ,,Mozart við kertaljós" í Garðakirkju fimmtudaginn 21. desember nk. var tekið fyrir.

Menningar- og safnanefnd samþykkir að veita kammerhópnum Camerarctica styrk að upphæð 240 þús kr vegna tónleikanna.

Fylgiskjöl

• Camerarctica_styrkbeidni_tonleikar_desember2017.pdf

Árleg jóladagskrá á Garðatorgi hefur undanfarin ár eftir sameiningu tekið mið af því hvenær árlegur jóla- og góðgerðardagur á Álftanesi er haldinn. Í skoðun er hvaða dagsetningar verða í ár þar sem fyrsti í aðventu er í byrjun desember og mun það liggja fyrir á næstu dögum.

Á Álftanesi hefur foreldrafélag Álftanesskóla með aðstoð ýmissa félaga staðið að árlegum jóla- og góðgerðardegi í íþróttamiðstöðinni á Álftanesi og Garðabær hefur aðstoðað með ýmsa þætti varðandi tækjabúnað. Að lokinni dagskrá innandyra hafa ljósin verið tendruð á jólatrénu á Álftanesi fyrir utan íþróttamiðstöðina.

Á Garðatorgi hefur verið boðið upp á hátíðardagskrá þegar ljósin eru tendruð á vinabæjarjólatré frá Asker í Noregi. Lúðrasveit Tónlistarskóla Garðabæjar hefur spilað fyrir gesti og grunnskólar skiptast á að senda nemendahópa til að syngja jólalög uppi á sviði og jólasveinar hafa mætt fyrr til byggða. Bókasafn Garðabæjar hefur sama dag verið með jólaleikrit til sýnis í safninu á Garðatorgi og Hönnunarsafn Íslands verið með ókeypis aðgang. Skoðað verður betur með hvaða hætti hægt verður að efla dagskrána á torginu þegar ljósin verða tendruð á jólatrénu og bjóða upp á fleiri menningartengda viðburði á torginu í samvinnu við m.a. miðbæjarsamtök Garðabæjar/rekstraraðila á torginu.

Í fyrravetur hélt Bókasafn Garðabæjar rithöfunda-/bókmenntakvöld þar sem rithöfundar lásu upp úr nýjum bókum sem voru að koma út. Stefnt er að því að halda þannig kvöld á ný í bókasafninu fimmtudaginn 21. nóvember nk. þar sem bókmenntafræðingur stýrir umræðunni.

Einnig eru fyrirhugaðir ýmsir tónleikar á vegum kóra og fleiri á aðventunni.



Skoðað verður hvernig hægt er að kynna dagskrá á aðventu í Garðabæ í heild sinni á vef Garðabæjar og í Garðapóstinum.