17. fundur

Greint var frá dagskrá afmælishátíðar Garðabæjar sem verður haldin á Garðatorgi laugardaginn 3. september frá kl. 13.30-18. Hönnunarsafn Íslands og Bókasafn Garðabæjar taka þátt í dagskránni með ýmsu móti.

Einnig var sagt frá vel heppnuðum fræðslu- og sögugöngum á árinu, amk ein söguganga til viðbótar verður farin að hausti.

Framundan er samstarf við Gospelkór Jóns Vídalíns um tónleikahald fimmtudaginn 20. október nk. í tilefni af afmæli Garðabæjar og afmæli kórsins á árinu.

Greint var frá fyrirhugðum tónleikum sem verða á haustönn í tónleikaröð kennara úr Tónlistarskóla Garðabæjar með styrk frá menningar- og safnanefnd.

Jazztónleikar með þeim Sunnu Gunnlaugsdóttur, Þorgrími Jónssyni, Ómari Guðjónssyni og Jóni Óskari Jónssyni verða haldnir í september eða október á þriðjudagskvöldi kl. 20, nánari dagsetning kemur fljótlega. Þriðjudagskvöldið 22. nóvember kl. 20 verða haldnir strengja- og píanótónleikar með rússneskri og a-evrópskri tónlist. Flytjendur þar eru Guðrún Dalía Salómonsdóttir, Renata Ivan, Guðbjörg Hlín Guðmundsdóttir, Kristín Björg Ragnarsdóttir, Guðrún Þórarinsdóttir og Helga Björg Ágústsdóttir.

Tónlistarveisla í skammdeginu hefur verið haldin í nóvember á hverju ári undanfarin ár á Garðatorgi. Rætt var um umgjörð og fyrri tónlistarveislur. Stefnt skal að því að halda næstu Tónlistarveislu í skammdeginu fimmtudaginn 10. nóvember nk. og kannað verður nánar með hvaða hætti fyrirtæki/rekstraraðilar á torginu geta tengst verkefninu.

Auglýst var nýverið eftir umsóknum um vinnuaðstöðu listamanna/fræðimanna í Króki veturinn 2016-2017. Í boði er að sækja um vinnuaðstöðuna 1-3 mánuði í senn. Umsóknir verða kynntar nefndarmönnum á milli funda og formleg afgreiðsla tekin fyrir á næsta fundi nefndarinnar.

Í sumar var Krókur opinn almenningi á sunnudögum frá júní - ágúst. Sunnudagurinn 3. júlí var auglýstur sérstaklega en þá var Elín Vilmundardóttir sem ólst upp í Króki á staðnum og sagði frá lífinu í Króki. Hátt í 150 manns mættu í Krók þennan sunnudag og við þetta tilefni afhenti Elín Vilmundardóttir safninu í Króki orf og ljá föður síns, ásamt fellingapípu sem notuð var til að fella net í sjóinn.

Framundan er sérstök sunnudagsopnun í Króki sunnudaginn 11. september nk. en þá verður boðið upp á leiðsögn fyrir börn og listasmiðju í framhaldi af leiðsögninni.

Erindi Hrefnu Lindar Lárusdóttur, Trausta Ólafssonar og Guðrúnar Kristinsdóttur dagsett 9. maí 2016 um húsnæði fyrir leiklistar- og sviðslistarvinnustofur var lagt fram. Erindið var tekið fyrir í bæjarráði Garðabæjar 17. maí sl. og vísað til umfjöllunar menningar- og safnanefndar.

Menningar- og safnanefnd felur upplýsinga- og menningarfulltrúa að ræða við bréfritara.

Starfsáætlun menningar- og safnanefndar fyrir haustið 2016 og vorið 2017 lögð fram og rædd.

Farið var yfir stöðu fjárhags á sviði menningarmála samkvæmt fjárhagsáætlun ársins 2016. Á næsta fundi nefndarinnar verður fjallað um fjárhagsáætlun næsta árs.

Umræða var um umgjörð styrkveitinga á sviði menningar.