5. feb. 2026

Fjölmenni við opnun nýrrar félagsmiðstöðvar við Lambamýri

Það var skemmtileg stund þegar ný fjölnota félagsaðstaða við Lambamýri 1 á Álftanesi var tekin formlega í notkun. Aðstaðan mun m.a. hýsa félagsstarf eldri fólks á Álftanesi og mun Félag eldri borgara á Álftanesi (FEBÁ) hafa aðsetur í húsnæðinu.

^{Arnór Valdimarsson, formaður FEBÁ, og Almar Guðmundsson, bæjarstjóri Garðabæjar, skrifa hér undir nýjan samstarfssamning.}

Fjölmenni var við opnunina og greinilegt að margir íbúar taka þessari nýju aðstöðu fagnandi. Garðálfarnir, kór eldri borgara á Álftanesi, sungu nokkur vel valin lög undir stjórn Ástvalds Traustasonar. Endurnýjaður samstarfssamningur Garðabæjar og FEBÁ var undirritaður við tilefnið.

„Það var ánægjulegt að sjá hversu margir lögðu leið sína á opnunina. Það er svo mikilvægt að geta boðið upp á vettvang fyrir eldra fólk til að koma saman og stunda gott og gefandi félagsstarf. Þetta nýja rými hefur upp á margt að bjóða, það er svo opið og bjart og við hvetjum áhugasama til að kíkja í heimsókn,“ segir Sólveig Valgeirsdóttir sem er forstöðumaður félagsmiðstöðva eldra fólks hjá Garðabæ.

Leitað er að nafni á félagsmiðstöðina og á opnuninni var þar til gerður hugmyndakassi settur fram þar sem viðstaddir gátu skilað inn hugmyndum um nafn á þessa nýju félagsmiðstöð. Hægt er að koma með tillögur að nafni út 5. febrúar nk. Það kemur því í ljós von bráðar hvað nýja aðstaðan mun heita.

Fyrst um sinn verður opið frá mánudegi til fimmtudags, frá klukkan 10:15 til 15:15.

^{Allý og Ásta eru starfsmenn í Lambamýri.}

^{Boðið var upp á nýbakaðar vöfflur og heitt kaffi.}