Diskó­súpu­veisla og hjóla­st­uð með Slow Food og Dr. Bæk

Skerum, söxum í súpu og borðum á meðan Dr. Bæk skoðar hjólhesta fyrir börn og fullorðna.

Þann 25. apríl fögnum við alþjóðlega diskósúpudeginum 2026, degi sem minnir okkur á það gríðarlega vandamál sem matarsóun er á heimsvísu og hvetur okkur til að breyta hráefni, sem annars hefði endað í ruslinu, í dýrindis máltíð. Klukkan 11 skerum við, söxum, hreyfum okkur í takt og töfrum fram litríkan dans úr alls kyns hráefni sem hefði verið hent fyrir litlar sakir – aðeins krumpað, svolítið undarlegt í laginu eða komið fram yfir dagsetningu, en enn í toppstandi. Um hádegi ættu fyrstu ilmandi skammtarnir úr pottunum að koma á borð, og hver sem vill er velkominn að taka þátt í gleðinni, hvort sem það er í brettadansi við skurðarbrettið eða bara til að njóta súpunnar. Dóra Svavarsdóttir, formaður Slow Food á Íslandi, verður Diskósúpustjóri dagsins og hlakkar til að taka á móti ykkur með sleifina á lofti og bros á vör. Dr. BÆK verður einnig á staðnum og býður uppá ástandskoðun hjólhesta fyrir börn og fullorðna. Verið innilega velkomin Þessi viðburður er hluti af Viku 17, sem er alþjóðleg vika heimsmarkmiðanna á bókasöfnum, en hún fer fram í 17. viku ársins. Í tilefni vikunnar verða viðburðir tengdir heimsmarkmiðunum á bæði Bókasafni Garðabæjar og á bókasöfnum vítt og breitt um landið. Alla vikuna verður barnabókaskiptimarkaður, plokkstangir til leigu, plokkbingó spjöld til þess að taka með sér ásamt öðru.