Kvenfélag Álftaness fagnar aldarafmæli
Í tilefni 100 ára afmælisins mun Kvenfélag Álftaness bjóða upp á afmælistertu í félagsaðstöðunni við Lambamýri 1 á Álftanesi þann 16. maí.
Kvenfélag Álftaness fagnaði 100 ára afmæli þann 25. apríl 2026. Félagið var formlega stofnað á Bessastöðum þann dag árið 1926 og hét þá Kvenfélag Bessastaðahrepps. Nafni kvenfélagsins var breytt árið 2004 þegar Bessastaðahreppur varð Sveitarfélagið Álftanes og hefur félagið verið kennt við Álftanes síðan þá.
Í tilefni tímamótanna mun Kvenfélag Álftaness bjóða upp á afmælistertu í félagsaðstöðunni við Lambamýri 1 á Álftanesi þann 16. maí frá klukkan 14:00 til 16:00.
Heimsókn á Bessastaði
Halla Tómasdóttir forseti Íslands tók á móti Kvenfélagi Álftaness á sjálfan afmælisdaginn og birti kveðju á Facebook-síðu sinni.
„Í gær kom Kvenfélag Álftaness í heimsókn en félagið var stofnað á Bessastöðum þann 25. apríl 1926, fyrir heilum hundrað árum! Þetta var hátíðleg stund enda ekki á hverjum degi sem við fögnum 100 ára afmæli félags sem hélt sína félagsfundi fyrstu árin hér á heimili formannsins, Elínar Vigfúsdóttur. Þær hafa allar götur síðan látið til sín taka í þjónustu við samfélagið, eins og kvenfélög um allt land gera, og fyrir það ber að þakka,“ skrifaði Halla.
