Vilja fjölga íbúð­um Brynju í Garða­bæ

„Við höfum átt afskaplega farsælt samstarf við Brynju leigufélag hér í Garðabæ en félagið á nú þegar 24 íbúðir hér í bænum. Við viljum fjölga þeim um 11 á næstu fimm árum og meta það í sameiningu hvernig best er að byggja upp eignasafn Brynju í Garðabæ þannig að það komi sem best til móts við þarfir öryrkja og fatlaðs fólks í sveitarfélaginu,“ segir Almar Guðmundsson, bæjarstjóri.

„Við höfum átt afskaplega farsælt samstarf við Brynju leigufélag hér í Garðabæ en félagið á nú þegar 24 íbúðir hér í bænum. Við viljum fjölga þeim um 11 á næstu fimm árum og meta það í sameiningu hvernig best er að byggja upp eignasafn Brynju í Garðabæ þannig að það komi sem best til móts við þarfir öryrkja og fatlaðs fólks í sveitarfélaginu,“ segir Almar Guðmundsson, bæjarstjóri.

Almar og Guðbrandur Sigurðsson, framkvæmdastjóri Brynju, hafa undirritað viljayfirlýsingu um aukið samstarf sveitarfélagsins og leigufélagsins um frekari uppbyggingu á fjölbreyttu húsnæði í Garðabæ.

Meðal markmiða viljayfirlýsingarinnar er að:

• Brynja taki í notkun 11 íbúðir í Garðabæ á næstu fimm árum, eða tvær til þrjár íbúðir að meðaltali á ári. Garðabær leggur til 12% stofnframlag til kaupa á íbúðunum og 18% stofnframlag kemur frá íslenska ríkinu í gegnum Húsnæðis- og mannvirkjastofnun.
• Samstarf verði á milli leigufélagsins og bæjarfélagsins um þarfagreiningu á þeim íbúðarúrræðum sem heppilegust eru fyrir svæðið og er stefnt að því að ljúka greiningunni í byrjun sumars.
• Samstarfi aðila um leigumiðlun og úthlutun íbúða verði haldið áfram, en samstarfið verður einnig bundið í samstarfssamning á næstu vikum.
• Stefnt er að því að ná samkomulagi fyrir lok hvers árs um uppbyggingu næstu eins til tveggja ára og samhliða endurskoða þarfagreiningu fyrir þær íbúðir sem vantar í safnið.
• Að samstarfið sé til hagsbóta fyrir þá aðila sem þurfa á þjónustunni að halda.