100 ára afmæli kosningarréttar kvenna til Alþingis

Áslaug Hulda Jónsdóttir tók til máls og lagði fram eftirfarandi tillögu.

,,Sumarið 2016 gefst ungmennum í Garðabæ á aldrinum 18-25 ára tækifæri til að sækja um sumarstarf á bæjarskrifstofum Garðabæjar og munu þau starfa með yfirstjórn sveitarfélagsins.“

Greinargerð:
100 ár eru liðin frá því að íslenskar konur fengu kosningarétt og kjörgengi til Alþingis.
Þessum tímamótum hefur verið fagnað á ýmsan hátt m.a. með þessum hátíðarfundi bæjarstjórnar Garðabæjar þar sem eingöngu kvenbæjarfulltrúar sitja fundinn.

Réttindabaráttu lýkur aldrei og það er mikilvægt að unnið sé áfram að efla hvern einstakling óháð kyni, kynþætti, aldri og stöðu.
Stjórnmálaþátttaka og áhugi ungs fólks á stjórnmálum fer minnkandi. Það er mikilvægt að leitað sé leiða til að efla þennan hóp, virkja til þátttöku þannig að þeirra sjónarmið heyrist og hafi áhrif á ákvarðanatöku er varða málefni sveitarfélagsins og samfélagsins alls.
Til að efla og styðja við ungt fólk í Garðabæ leggjum við til eftirfarandi tillögur sem unnar verða áfram í samvinnu við ungmennaráð, skóla og frjáls félög í bænum.

Jóna Sæmundsdóttir tók til máls og lagði fram eftirfarandi tillögu með sömu greinargerð og fylgdi tillögu Áslaugar Huldu Jónsdóttur.

,,Bæjarstjórn Garðabæjar beitir sér fyrir því að fjölbreytt námskeið verði í boði til að efla og styrkja ungmenni í Garðabæ.“

Sigríður Hulda Jónsdóttir tók til máls og lagði fram eftirfarandi tillögu með sömu greinargerð og fylgdi tillögu Áslaugar Huldu Jónsdóttur.

,,Bæjarstjórn Garðabæjar standi á þessu kjörtímabili fyrir árlegu stefnumóti við ungmenni í bæjarfélaginu, frá og með næsta ári 2016. Þannig sé skapaður vettvangur sem styrkir tengingu bæjarfulltrúa og ungs fólks í bæjarfélaginu. Ungu fólki gefist tækifæri til að átta sig betur á því hvernig bæjarfélaginu er stýrt, hvernig hægt er að hafa áhrif á samfélagið með því að láta sín sjónarmið heyrast, taka þátt í kosningum og sýna samfélagslega ábyrgð.“

María Grétarsdóttir tók til máls og ræddi tillögurnar og mikilvægi þeirra.

Björg Fenger tók til máls og ræddi m.a. um þátttöku barna og ungenna í íþrótta- og tómstundastarfi og mikilvægi þess að hafa fyrirmyndir. Björg óskaði Stjörnukonum góðs gengis í leikjunum framundan í knattspyrnu.

Sigríður Björk Gunnarsdóttir tók til máls og greindi m.a. frá opnum fundi á vegum mannréttinda- og forvarnarnefndar í haust.

Guðrún Elín Herbertsdóttir tók til máls og ræddi um mikilvægi þess að fylgja eftir þessum tillögum og um hlutverk ungmennaráðs.

Súsanna Björg Vilhjálmsdóttir tók til máls og tók undir að nauðsynlegt er að efla unga fólkið og hlusta á það. Súsanna ræddi einnig m.a. um kynjaða hagstjórn og mikilvægi og árangur slíkrar hagstjórnar.
Súsanna Björg Vilhjálmsdóttir lagði fram eftirfarandi tillögur.

,,Björt framtíð leggur til að Garðabær tileinki sér breytt verklag og nýja hugsun í gerð fjárhagsáætlana og taki upp kynjaða hagstjórn í fjárlagagerð líkt og ríkistjórn, ráðuneyti og önnur sveitarfélög hafa gert. Kynjuð hagstjórn felst í því að leggja mat út frá sjónarmiðum beggja kynja á fjárhagsáætlanir með samþættingu tveggja veigamikilla stefna, mannréttindastefnu og fjárlagastefnu sveitafélagsins að leiðarljósi. Með því að horfa út frá mismunandi kynjasjónarmiðum við gerð áætlana er hægt að bæta ákvörðunartöku, stuðla að jafnrétti og gæta þess að misrétti verði ekki beitt gagnvart íbúum.?

,,Björt framtíð leggur til að Garðabær setji saman stýrihóp til að vinna að innleiðingarferli um kynjaða hagstjórn og bjóði upp á fræðslu og kynningu á hlutverk og markmið kynjaðrar hagstjórnar fyrir starfsmenn og íbúa.?

Greinargerð:
Nú eru liðin 100 ár frá því að íslenskar konur fengu kosningarrétt. Margt hefur áunnist á þessum 100 árum og í dag kalla nútímasamfélag á góða stjórnsýsluhætti sem byggjast á jafnrétti, sanngirni og skilvirkni. Góð stjórnsýsla er ekki bara gagnsæi í fjárlagagerð og hagsýni í nýtingu fjármuna sveitarfélaga heldur að ákvarðanir séu teknar á jafnréttisgrundvelli. Kynjuð hagstjórn er mikilvægt og sanngjarnt árangursstjórnunar tæki sem bæði ráðuneyti og sveitarfélög á Íslandi hafa notast við í endurskipulagningu fjárlagagerðar á grundvelli jafnréttissjónarmiða. Sem dæmi um mikilvægi kynjaðra hagstjórnar, þann 19. júní samþykkti ríkisstjórnin á fundi 5 ára innleiðingaráætlun um kynjaða hagstjórn og fjárlagagerð og tekur innleiðingaráætlunin mið af frumvarpi til laga um opinber fjármál, sem nú er til umfjöllunar hjá Alþingi.

Ávinningurinn af kynjaðri hagstjórn og fjárlagagerð er margþætt: greinir kynjaáhrif, tekur tillit til þarfa íbúa, stuðlar að frekara jafnrétti, betri nýtingu fjármuna og réttlátari ákvörðunartöku. En til að ná settum markmiðum kynjaðra hagstjórnar þurfa aðilar að tileinka sér nýja hugsun og breytt verklag.


Sigþrúður Ármann tók til máls og ræddi m.a. um valfrelsi í skólamálum, grunn- og leikskóla og þjónustu þar sem 12 mánaða börn komast nú að í leikskóla. Einnig ræddi hún um mikilvægi valfrelsis meðal eldri íbúa sveitarfélagsins.

Áslaug Hulda Jónsdóttir tók til máls og fagnaði tillögum Bjartrar framtíðar og lagði til að vísa þeim til bæjarráðs Garðabæjar.


Framkomnar tillögur Áslaugar Huldu Jónsdóttur, Jónu Sæmundsdóttur og Sigríðar Huldu Jónsdóttur voru samþykktar samhljóða.

Tillögur um vísa framkomnum tillögum Súsönnu Bjargar Vílhjálmsdóttur til bæjarráðs Garðabæjar voru samþykktar samhljóða.