Tillaga Garðabæjarlistans um þátttöku á Hinsegin dögum í Garðabæ.

Sara Dögg Svanhildardóttir, kvaddi sér hljóðs og lagði fram eftirfarandi tillögu.

„Bæjarstjórn samþykkir að mála regnbogagötu eða gangstíg fyrir Hinsegin daga. Og heiðra þannig baráttu hinsegin fólks og minna okkur á fegurðina sem falin er í fjölbreytileikanum með táknrænum hætti.
Ennfremur er samþykkt að fela menningarfulltrúa Garðabæjar að finna leiðir til þess að fagna fjölbreytileikanum á Hinsegin dögum sem fram fara dagana 4. - 9. ágúst nk. sem verða með óhefðbundnu sniði vegna þeirra takmarkana sem heimsfaraldurinn Covid 19 setur okkur.“

Greinargerð
Hinsegin dagar fara fram með óhefðbundnu sniði þetta árið líkt og aðrir viðburðir í okkar samfélagi. Að undanförnum árum hefur þróunin orðið sú að fleiri sveitarfélög vítt og breitt um landið hafa sýnt þátttöku í Hinsegin dögum áhuga og sýnt með táknrænum hætti samstöðu og þátttöku í þeirri gleði sem yfir Hinsegin dögum ríkir.
Á hinsegin dögum minnumst við og fögnum smáum sem stórum sigrum hinsegin fólks fyrir sjálfsögðum réttindum um að vera þau sjálf og hafa stuðning samfélagsins til þess að treysta sér til þess að standa með sjálfum sér.
En vekjum um leið athygli á því að baráttan er hvergi nærri alls staðar í höfn. Og um hana þarf að standa vörð í öllum samfélögum. Eftir því sem stuðningurinn við baráttuna verður meiri og sýnileiki velvildar í garð Hinsegin daga eykst því öruggara verður hinsegin fólk í eigin skinni. Fordómana má aldrei vanmeta og því skiptir sýnileiki hvert sem við komum og hvar sem við búum gríðarlega miklu máli fyrir allt hinsegin fólk og fjölskyldur þeirra.

Gunnar Einarsson, tók til máls og sagðist sammála inntaki tillögunnar en greindi frá því að skapandi sumarhópi hafi þegar verið falið það verkefni að mála regnbogagötu fyrir Hinsegin daga.

Ingvar Arnarson, tók til máls.

Gunnar Einarsson, lagði til að vísa tillögunni varðandi viðburði í tengslum við Hinsegin daga til menningar- og safnanefndar.

Bæjarstjórn samþykkir að vísa tillögunni til menningar- og safnanefndar.