Fundargerð skipulagsnefndar frá 8/4 ´21.

Sigurður Guðmundsson, ræddi 4. tl., fyrirspurn um skiptingu lóðar við Nýjabæ og lagði fram svohljóðandi bókun.

„Garðahverfið var deiliskipulagt árið 2013 í heild sinni og er þar um að ræða 79 hektara af u.þ.b. 420 hekturum Garðaholts. Samkvæmt aðalskipulagi Garðabæjar frá árinu 2018 hefur Garðahverfið verndarsjónarmið að leiðarljósi og er skilgreint sem landbúnaðarsvæði. Áhersla er á menningar og náttúruminjar og að gera svæðið aðgengilegt til útivistar og náttúruskoðunar. Garðahverfið fékk hverfisvernd árið 2017.“

Ingvar Arnarson, ræddi 4. tl., fyrirspurn um skiptingu lóðar við Nýjabæ og lagði til að bókun Baldurs Ó Svavarssonar, sem lögð var fram á fundi skipulagsnefndar verði fær til bókar í fundargerð bæjarstjórnar.

„Enn gerist það sem undirritaður óttaðist og varaði við þegar hið gildandi skipulag fyrir Garðahverfi var samþykkt. Stóraukin ásókn og fyrirspurnir um uppskiptingu lóða, um viðbótarlóðir og frávik frá skilmálum. Þeim á bara eftir að fjölga. Fulltrúi Garðabæjarlistans í skipulagsnefnd ítrekar því enn fyrri bókanir á umliðnum tveimur tímabilum og mótmælir enn og aftur þeim áherslum og vinnubrögðum sem lögð eru til grundvallar við gerð skipulags fyrir svokallað Garðahverfi á Garðaholti einn síðasta skikinn í bænum sem ber einhverja byggð.
Enn skal því ítrekuð sú ósk að það landrými sem lagt er undir í þessu verkefni verði verðmetið og það mat kynnt fyrir skipulagsnefnd, þetta eru jú fjármunir bæjarbúa. Enn er ítrekað og lagt til að beðið verði með allar breytingar á fyrirliggjandi deiliskipulagi á þessu svæði þar til að skipulag fyrir svæðið í heild liggur fyrir.
Ekki þarf að fjölyrða um sögu og menningu á Garðaholti. Sú staðreynd er flestum kunn. Skylt er að huga að þessari sögu, minjum og menningarverðmætum henni tengdri. Það verður þó ekki gert með því að frysta tímann á staðnum. Enn er því ítrekað og lagt til að bærinn marki sér stefnu varðandi uppbyggingu og þróun þessa bæjarhluta alls áður en hann er hlutaður niður með þessum hætti í smærri bútasaumuð verkefni og hugað verði að afleiðingum þess byggðamynsturs sem þarna verður boðið upp á.
Með sama framhaldi stendur ekki steinn yfir steini yfir þessari svokölluðu "varðveislu byggðamynsturs 20. aldar“ sem ku vera markmið gildandi deiliskipulags. Nær verði því að kalla skipulagið "varðveislu skipulagsklúðurs 21. aldar", ef svo fram heldur sem horfir."

Fundargerðin lögð fram.