Winter holiday activities

Dagana 23. - 26. febrúar verður vetrarfrí í leik- og grunnskólum í Garðabæ. Það er ýmislegt skemmtilegt hægt að gera sér til skemmtunar í skólafríinu og hér koma nokkrar hugmyndir.

Fjölbreytt dagskrá á bókasafninu

Það verður eitt og annað skemmtilegt í boði á bókasafninu í vetrarfríinu, til dæmis legóstund , ratleikir, perlusmiðja og bíósýning. Á bóksafninu eru svo alltaf frábært safn af góðum bókum, myndir til að lita, tafl og notalegt umhverfi.

Heimsókn á Hönnunarsafnið

Það er ávallt góð hugmynd að heimsækja Hönnunarsafnið. Þessa stundina eru vöruhönnuðirnir Birta Rós Brynjólfsdóttir og Hrefna Sigurðardóttir hjá Fléttu með vinnustofuna sína í safninu. Það sem einkennir verk þeirra eru sköpunar- og leikgleði í bland við gagnrýna hugsun varðandi sóun og neysluvenjur. Sýningin Fallegustu bækur í heimi stendur einnig yfir á Hönnunarsafni Íslands.

Þá má einnig slaka á í Hreiðrinu og blaða í bókum eða tímaritum úr bókasafni Hönnunarsafnsins.

Hönnunarsafn Íslands er til húsa að Garðatorgi 1 og er opið alla daga nema mánudaga frá 12-17. Alltaf er ókeypis aðgangur á safnið fyrir yngri en 18 ára og í vetrarfríinu fá foreldrar einnig ókeypis í heimsókn með börnum. Lokað á mánudögum.

Ókeypis í sund fyrir yngri en 17 ára

Sundferð klikkar ekki. Það er ókeypis aðgangur í sundlaugar Garðabæjar fyrir yngri en 17 ára. Hér má sjá afgreiðslutíma í Ásgarðslaug og Álftaneslaug.

Saga Garðabæjar

Margmiðlunarsýningin Aftur til Hofsstaða á Garðatorgi 7 spannar sögu Garðabæjar frá landnámi til okkar daga. Sýningin Aftur til Hofsstaða á Garðatorgi er opin alla daga frá 12-17.

Stjörnugerðið

Hvernig væri að kíkja í stjörnugerðið í Heiðmörk og fræðast um himingeiminn? Gerðið sjálft veitir gott skjól og inni í því eru fræðsluskilti og bekkur. Það er tilvalið að leggja leið sína þangað, hvort sem er í dagsbirtu eða myrkri. Í stjörnugerðinu eru kjöraðstæður til að skoða stjörnur og norðurljós.

Hjóla- og gönguleiðir í Garðabæ

Fjölmargar fjölskylduvænar hjóla- og gönguleiðir eru í Garðabæ sem hægt er að njóta í vetrarfríinu. Við mælum með að skoða vefinn Út um allt og fá þannig hugmyndir að skemmtilegum hjóla- eða gönguleiðum í bænum.

Sjá einnig: Áhugaverðar gönguleiðir í Garðabæ

Alltaf stutt í næsta leiksvæði

Í Garðabæ er alltaf stutt í næsta leiksvæði. Er ekki tilvalið að prófa einhvern nýjan og spennandi leikvöll í vetrarfríinu? Við mælum með að kíkja inn á Kortavef Garðabæjar, haka þar við Hagnýtar upplýsingar og svo Leiksvæði og sjá hvar allir leikvellir bæjarins eru staðsettir.

Könnunarleiðangur

Hvernig væri að skella sér í fjöruferð eða að Vífilstaðavatni og kanna þar lífríkið?

Út með voffa

Hundaeigendur gætu nýtt tækifærið og skellt sér út að leika við hundinn á afgirta hundasvæðinu við Garðahraunsveg. Innan gerðisins eru leiktæki fyrir hunda og bekkir fyrir eigendur þeirra.

Frístundabíllinn á sínum stað

Frístundabíll Garðabæjar keyrir samkvæmt áætlun í vetrarfríinu. Nánari upplýsingar má finna hér.