Áhuga­verð­ir stað­ir

Búið var í Króki allt til ársins 1985. Afkomendur ábúenda Króks, þeirra Þorbjargar Stefaníu Guðjónsdóttur og Vilmundar Gíslasonar, gáfu Garðabæ bæjarhúsin í Króki ásamt innbúi árið 1998. Bærinn er gott dæmi um húsakost og lifnaðarhætti alþýðufólks á þessum landshluta á fyrri hluta 20. aldar. 

Yfir sumartímann, frá júní og út ágúst, er Krókur opinn almenningi á sunnudögum, frá klukkan 11:30-14:30. Aðgangur er ókeypis. Hópar sem vilja skoða Krók geta haft samband við menningarfulltrúa Garðabæjar, Ólöfu Breiðfjörð á netfanginu olof@gardabaer.is

Vinnustofa fyrir fræðafólk og höfunda

Í Króki er eitt herbergi sem hentar sem vinnuaðstaða fyrir fræðafólk og rithöfunda. Í öðrum rýmum hússins eru varðveittir gamlir gripir. Fræðafólk getur sótt um að fá úthlutaða vinnuaðstöðu í Króki í gegnum Þjónustugátt Garðabæjar. Sjá reglur um úthlutun vinnuaðstöðu hér fyrir neðan. 

Reglur um úthlutun vinnuaðstöðu í Króki

Fræðimaður/rithöfundur hefur afnot af skrifstofuhúsgögnum, nettengingu og nauðsynlegasta borðbúnaði. Í samningi um afnot af Króki er kveðið á um umgengni, tryggingar o.fl. 

Afnot fræðimanns/rithöfundar af húsnæðinu skal vera án endurgjalds að öðru leyti en því að greiða þarf fyrir tölvunotkun og síma. 

Að öllu jöfnu skal viðkomandi fræðimaður/rithöfundur, meðan á dvöl í Króki stendur, kynna með einhverjum hætti störf sín. 

Vinnuaðstöðunni skal úthlutað 1-3 mánuði í senn. Heimilt er við sérstakar aðstæður að úthluta aðstöðunni til lengri tíma. 

Fræðslu- og menningarsvið skal árlega auglýsa eftir umsóknum fræðimanns/rithöfundar um tímabundna vinnuaðstöðu í Króki. Umsóknir skulu lagðar fyrir menningar- og safnanefnd er gerir tillögur til bæjarstjórnar um ráðstöfun vinnuaðstöðunnar hverju sinni. 

Menningarfulltrúi skal annast samninga um afnot húsnæðisins og vera tengiliður Garðabæjar við viðkomandi listamann á dvalartíma.

Þegar framkvæmdir við leikskólann Kirkjuból við Kirkjulund hófust árið 1985 komu í ljós merkar minjar sem bentu til búsetu á svæðinu á 10. eða 11. öld. Árið 1994 hóf Þjóðminjasafn Íslands alhliða fornleifarannsóknir á svæðinu að beiðni bæjarstjórnar Garðabæjar. Meðal minja sem uppgötvuðust voru torfveggir og soðhola sem höfðu að geyma ösku frá landnámstíma. Niðurstöður fornleifarannsóknarinnar varpa mikilvægu ljósi á líf og tilveru fólks á landnámstímum. 

Minjagarðurinn á Hofsstöðum var byggður með það að markmiði að varðveita þessar merku fornminjar á aðlaðandi og aðgengilegan hátt fyrir gesti. Í Minjagarðinum eru fræðsluskilti og margmiðlunarsjónaukar sem gefa gestum færi á að skyggnast inn í fortíðina á skemmtilegan hátt. Á Garðatorgi 7 má svo fræðast enn frekar um lífið í Garðabæ frá landnámi til dagsins í dag á sýningunni Aftur til Hofsstaða  

Hofsstaðaskálinn var um 170 fermetrar. Veggir voru hlaðnir úr torfi og grjóti, hellur lagðar í anddyrið og stétt framan við skálann. Moldargólf og langeldur var eftir miðjum skála. Stafverkið var úr viði og ekki ólíklegt að svefnloft hafi verið til staðar. Líklega hefur skálinn verið þiljaður með viði að innan og ljóst að um stórbýli var að ræða. 

Ekki er vitað með vissu hverjir byggðu skálann né hverjir bjuggu þar en miðað við stærð skálans má ætla að þarna hafi 20-30 manns búið, að meðtöldum þrælum og vinnufólki.