11. fundur

Barnaverndarstofa hefur ákveðið að funda með öllum barnaverndarnefndum landsins í því skyni að leggja mat á starfsskilyrði, verkefni og úrræði nefndanna, en það er í samræmi við framkvæmdaáætlun ríkisins í barnavernd fram til næstu sveitarstjórnarkosninga árið 2014. Barnaverndarstofa kom á fund fjölskylduráðs Garðabæjar 12.12.2013. Á fundinum var farið almennt yfir stöðu mála í Garðabæ og þær aðstæður sem starfsfólk barnaverndarnefndar glímir við í daglegum störfum sínum. Fundurinn var góður og eru Barnaverndarstofu færðar þakkir fyrir.

Tekin er fyrir beiðni um undanþágu vegna sérstakra húsaleigubóta. Fjölskylduráð fjallar um og samþykkir erindið. Sjá nánar í trúnaðarmálabók.

Tekið er fyrir málskot í tengslum við umsókn um fjárhagsaðstoð. Fjölskylduráð fjallar um erindið. Erindi er samþykkt. Sjá nánar í trúnaðarmálabók.

Tekin er fyrir beiðni um úttekt vegna umsóknar fjölskyldu í Garðabæ um að gerast stuðningsfjölskylda. Mælt er með því að fjölskyldan fái leyfið, sjá nánar í trúnaðarmálabók.

Félagsmálastjóri og félagsráðgjafi kynna fyrirhugað tilraunaverkefni um samvinnu Garðabæjar, Hafnarfjarðar og Kópavogs um sameiginlegar bakvaktir barnaverndar. Gert er ráð fyrir að sameiginlegar bakvaktir hefjist í janúar 2014. Fjölskylduráð samþykkir að veita starfsmönnum barnaverndarnefnda Kópavogs og Hafnarfjarðar umboð til þess að sinna tilteknum lögbundnum skyldum nefndarinnar í tengslum við sameiginlegar bakvaktir í barnavernd. Jafnframt felur ráðið formanni að undirrita umboð þess efnis fyrir hönd fjölskylduráðs. Fjölskylduráð lýsir yfir ánægju sinni með þennan áfanga.