4. fundur

Menntadagur Garðabæjar var haldinn hátíðlegur föstudaginn 30. október 2026. Á deginum komu saman rúmlega 550 starfsmenn leikskóla, grunnskóla, frístundaheimila og félagsmiðstöðva í bænum.

Við það tilefni voru veittar viðurkenningar fyrir framúrskarandi þróunar- og umbótaverkefni í skólastarfi. Alls voru sex verkefni valin til viðurkenningar, þrjú frá leikskólastigi og þrjú frá grunnskólastigi. Verkefnin sýna fram á fagmennsku, nýsköpun og metnað starfsfólks til að efla nám, vellíðan og þátttöku barna og ungmenna.

Eftirfarandi verkefni hlutu viðurkenningu:

Leikskólastig

Leikskólinn Akrar - íþróttakennsla.

Leikskólinn Urriðaból við Holtsveg og við Kauptún - Leiðsögn og málörvun

Leikskólinn Hæðarból. Leggjum við hlustir ? börn hafa rödd ?

Grunnskólastig

Sjálandsskóli - Hjólað á skólatíma.

Álftanesskóli í samstarfi við leikskólana Holtakot og Krakkakot - Brúum bilið

Flataskóli - Stólaverkefnið

Skólanefnd óskar öllum viðurkenningarhöfum og þeim sem komu að verkefnunum innilega til hamingju með árangurinn og þakkar jafnframt öllu starfsfólki skólasamfélagsins fyrir öflugt og metnaðarfullt starf í þágu barna og ungmenna í Garðabæ.

Kynnt var verkefnið „Orð og sögur“, samstarfsverkefni Bókasafns Garðabæjar og fræðslu- og frístundasviðs Garðabæjar og leik- og grunnskóla í bænum. Verkefnið nær til allra nemenda í 4.-8. bekk grunnskóla bæjarins og miðar að því að efla orðaforða, lesskilning, lestrargleði og skapandi ritun. Nemendur vinna sögur út frá íslenskum námsorðaforða og taka þátt í ritunarkeppni. Verkefnið hefst á Degi íslenskrar tungu 16. nóvember og stendur til 20 nóvember.

Lagt var fram nýútgefið kynningarefni frá mennta- og barnamálaráðuneytinu um sameiginleg viðmið um skólasókn undir yfirskriftinni „Hver dagur skiptir máli“. Um er að ræða verklag sem byggir á snemmtæku inngripi, markvissri eftirfylgni og samstarfi heimilis og skóla með það að markmiði að styðja við reglulega skólasókn og bregðast snemma við, þegar auknar fjarvistir koma fram. Áhersla er lögð á að leita leiða til að tryggja að nemendur mæti í skóla og njóti þar farsæls náms og þátttöku.

Forvarnarvika í Garðabæ verður haldin dagana 4.- 11. nóvember. Vikan hefst með fræðslufundi fyrir foreldra barna í Garðabæ, þar sem fjallað verður um mikilvægi tengsla og farsældar barna og ungmenna.

Leik- og grunnskólar Garðabæjar taka virkan þátt í forvarnarvikunni og verða með fjölbreytta dagskrá sem miðar að því að efla vellíðan, seiglu, félagsfærni og jákvætt skólasamfélag hjá börnum og ungmennum.

Ólöf Breiðfjörð menningarfulltrúi Garðabæjar, sagði frá menningarviðburðum sem nemendum í skólum bæjarins verður boðið upp á, skólaárið 2026-2027. Skólanefnd lýsir ánægju sinni með metnaðarfulla dagskrá.

Rætt var um áhersluþætti vegna úthlutunar úr Þróunarsjóði grunnskóla 2027.

Skólanefnd lýsir ánægju sinni með að kynnast skólanum og skólastarfinu með þessum hætti. Jafnframt var kynntur nýr og síðasti áfangi uppbyggingar skólans, sem felur í sér stækkun á skólahúsnæðinu og nýju íþróttahúsi. Skólanefnd fagnar þeim mikilvægu framkvæmdum sem munu styrkja aðstöðu nemenda og starfsfólks enn frekar.