Hofsstaðaskóli

Um Hofsstaðaskóla

Nýr vefur fyrir Hofsstaðaskóla er í vinnslu og verður tekinn í notkun síðar á árinu.

Bréf um skólaslit 2026

Í Hofsstaðaskóla eru 450 nemendur í 1. - 7. bekk og þar starfa um 90 starfsmenn með það að markmiði að hlúa að nemendum námslega og félagslega og koma til móts við áhuga þeirra og getu. Vel er búið að nemendum og starfsmönnum og er öll aðstaða í skólanum til fyrirmyndar

Í skólanum fer fram metnaðarfullt starf sem er í stöðugri þróun. Kennsluhættir eru fjölbreyttir og vellíðan nemenda í fyrirrúmi í anda menntastefnu Garðabæjar. Læsi skipar stóran sess og þjónusta við nemendur með sérþarfir er öflug.

Námsumhverfi

Áhersla er lögð á að skapa jákvæðan skólabrag og að góður vinnuandi sé ríkjandi. Allir sem í skólanum starfa stuðla að og viðhalda góðum starfsanda þar sem öryggi, vellíðan og heilbrigði eru í fyrirrúmi. Gagnkvæmt traust, virðing, samábyrgð og tillitssemi er haft að leiðarljósi. Námsagi einkennist af því að tillit sé tekið til þarfa nemenda, þroska þeirra og hæfni með áherslu á mannréttindi, jafnrétti, lýðræðisleg vinnubrögð og að samþykkja ekki mismunun af neinu tagi. Samskiptasáttmáli Garðabæjar, Uppeldi til ábyrgðar og verklag KVAN nýtist allt vel í þessari vinnu. Skólareglur og verklag í agamálum er endurskoðað og fest í sessi. Nýtt fagteymi um inngrip mun án efa koma að góðu gagni.
Skólaárið 2025 – 2026 mun einkennast af endurskoðun aðalnámskrár og innleiðingu breytinga á henni. Endurskoðunin er tvímælalaust til bóta og heilmikið af stuðningsefni og verkferlum sem fylgja til hægðarauka fyrir skólastarfið. Samhliða er verið að endurskoða námsmat og framsetningu þess. Skólanefnd grunnskóla hefur kallað eftir aukinni samræmingu á milli skóla og verður unnið í þeim anda.
Starfsmenn Hofsstaðaskóla leggja áherslu á fagleg vinnubrögð og að veita nemendum og foreldrum/forráðafólki öfluga þjónustu sem byggir á þekkingu og reynslu. Þess vegna er lögð rík áhersla á símenntun starfsmanna og fjölbreytta starfsþróun. Hofsstaðaskóli er lærdómssamfélag, símenntun starfsmanna einstaklingsmiðuð að hluta til og miðuð við þarfir hvers og eins.
Fjölbreyttir kennsluhættir þar sem komið er til móts við mismunandi þarfir nemenda eru stórt verkefni og leiðsagnarnám er áfram nýtt sem liður í því og á þessu skólaári á að auka útikennslu sem felur í sér mörg tækifæri fyrir mismunandi nálgun og fjölbreytni. Stoðþjónusta er öflug í skólanum og fleiri fagaðilar hafa bæst í flóru starfsfólks s.s. atferlisráðgjafi og skólafélagsráðgjafi.

Hofsstaðaskóli