33. (2228). fundur

Bæjarstjóri kynnti drög að úthlutunarreglum og úthlutunarskilmálum varðandi úthlutun og sölu byggingarréttar lóða á Hnoðraholti suður - háholti.

Annars vegar er um að ræða byggingarrétt lóða í almennri sölu og hins vegar til byggingarsamvinnufélaga sem uppfylla ákvæði laga nr. 153/1998 um byggingarsamvinnufélög.

Bæjarráð samþykkir að fela bæjarstjóra að ljúka við gerð úthlutunarreglna og úthlutunarskilmála varðandi úthlutun og sölu byggingarréttar lóða á Hnoðraholti suður - háholti og leggja fyrir bæjarráð til afgreiðslu á fundi 6. október 2026.

Bæjarráð tekur undir ályktun landsþings Sambands íslenskra sveitarfélaga frá 25. september 2026 um mikilvægi þess að sveitarfélög, ríki og aðrir opinberir aðilar axli sameiginlega ábyrgð á því að stuðla að lækkun verðbólgu og vaxta og auknum stöðugleika í íslensku efnahagslífi.

Garðabær er reiðubúinn að leggja sitt af mörkum til þessa sameiginlega átaks. Við gerð fjárhagsáætlunar Garðabæjar fyrir árið 2027 verði því miðað við að hækkun almennra gjaldskráa sveitarfélagsins verði að hámarki 2,5%, í samræmi við verðbólgumarkmið Seðlabanka Íslands.

Með því heldur Garðabær aftur af gjaldskrárhækkunum þrátt fyrir kostnaðarhækkanir í rekstri sveitarfélagsins og leggur þannig sitt af mörkum til að verja kaupmátt heimilanna, draga úr verðbólguþrýstingi og skapa skilyrði fyrir lækkun vaxta.

Með ákvörðun bæjarráðs er gengið út frá því að kjarasamningar haldi og að ríkisvaldið og stofnanir í eigu þess taki þátt í hinu sameiginlega átaki með því að takmarka með sambærilegum hætti hækkanir gjaldskráa og álaga sem hafa bein áhrif á heimilin.

Bæjarráð leggur áherslu á að árangur í baráttunni við verðbólgu byggist á samstilltum aðgerðum ríkis, sveitarfélaga og aðila vinnumarkaðarins og að kostnaði vegna nýrra verkefna eða aukinna skyldna sveitarfélaga verði ekki velt yfir á sveitarfélög án fullnægjandi fjármögnunar.

Lögð fram verklýsing vegna Þjónusta og viðhalds gatnalýsingar.

Bæjarráð samþykkir fyrirliggjandi útboðs- og verklýsingu og felur umhverfissviði framkvæmd útboðsins fyrir hönd Garðabæjar.

Lagt fram erindi nefnda- og greiningarsviðs Alþingis vegna frumvarps til nýrra Sveitarstjórnarlaga.



Bæjarráð felur bæjarstjóra að árétta sjónarmið Garðabæjar sem fram komu í umsögn Garðabæjar dags. 20. mars 2026, um fyrirhugaðar breytingar á sveitarstjórnarlögum.

Lagt fram erindi nefnda- og greiningarsviðs Alþingis vegna frumvarps til breytingar á lögum um leikskóla.

Lagt fram bréf innviðaráðuneytisins þar sem tilkynnt er um að árlegur minningardagur Sameinuðu þjóðanna um fórnarlömb umferðarslysa verði haldinn sunnudaginn 15. nóvember 2026.