63. fundur

Rætt um undirbúning Jazzþorpsins sem fer fram 2. - 4. maí 2025.

Menningarfulltrúi kynnti undirbúning áJazzþorpinu í Garðabæ sem fer fram dagana 2. - 4. maí á Garðatorgi. Fjöldi tónlistarmanna koma fram á tónleikum en einnig fara fram erindi um jazztónlist. Samstarf við Góða hirðinn heldur áfram enda mikil ánægja meðal gesta með samstarfið sem felst í sölu á húsgögnum og gripum á meðan á hátíðinni stendur en andvirðið rennur til góðgerðamála.

Menningarfulltrúi kynnir dagskrá Barnamenningarhátíðar.

Dagskrá Barnamenningarhátíðar verður að venju fjölbreytt en hátíðin fer fram dagana 7. - 12. apríl. Nemendur í 1. bekk taka þátt í Klappklappstappstapp smiðju sem er þátttökusmiðja með tónlistarmönnunum Ingibjörgu Fríðu og Sigurði Inga, smiðjan fer fram á göngugötunni Garðatorgi. Nemdur í 3. bekk taka þátt í þátttökuverkinu Manndýr í Hönnunarsafni Íslands en Aude Busson sviðslistakona tekur á móti hópum.Nemendur í 5. bekk hitta Gunnar Helgason rithöfund á Bókasafni Garðabæjar þar sem þau læra að búa til söguþráð. Fornleifafræðingur mun svo taka á móti 7. bekkingum í Minjagarðinum á Hofsstöðum.

Auk þess verða sýningar á verkum 4. bekkinga í Hönnunarsafni Íslands og leikskólabarna á Bókasafni Garðabæjar.

Sýningin í Hönnunarsafninu hverfist um fatahönnun en 4. bekkingar hafa í mars unnið að sýningunni ásamt Stefáni Svan fatahönnuði og Ninnu Þórarinsdóttur hönnuði.

Barnamenningarhátíð lýkur laugardaginn 12. apríl með dagskrá fyrir alla fjölskylduna.

Nefndin fór gagngert í gegnum menningarstefnu frá árinu 2005. Nefndarmeðlimir lögðu fram breytingatillögur sem unnið verður með í kjölfarið. Stefnt er að því að einfalda stefnuna í því skyni að sýn Garðabæjar í menningarmálum sé skýr og hugsuð til langframa.