10. fundur

Tónlistarskólinn var settur á sal skólans miðvikudaginn 26. ágúst síðastliðinn og var sérlega góð mæting á skólasetninguna bæði af foreldrum og nemendum. Skólastjóri fór yfir fjölda nemenda sem verða um 530 og kennara við skólann verða 49. Þrír kennarar eru í leyfi að hluta í vetur og hefur verið ráðið í þeirra stöður. Fram kom hjá skólastjóra að búið er að taka í notkun þrjár nýjar kennslustofur fyrir tónlistarkennslu í nýrri viðbyggingu við Hofsstaðaskóla og að kennsla verður að nýju í húsnæði Garðaskóla. Kennslustofum í Flataskóla fækkar hinsvegar úr fjórum í tvær. Skólinn er nú með 7 starfsstöðvar. Komið hefur verið á formlegu samstarfi milli Tónlistarskóla Garðabæjar og Hafnarfjarðar, Kópavogs og Tónskóla Sigursveins í tónfræðagreinum á framhaldsstigi.

Fram kom hjá skólastjóra að leggja á starfsmannakönnun fyrir kennara skólans í október.

Skólastjóri lagði ríka áherslu á að mikilvægt sé að bæta og endurnýja hljóðfærakost skólans. Endurnýja þarf tré-, málmblástur- og strengjahljóðfæri sem leigð eru til nemenda. Þá þarf að auka við tölvukost skólans sérstaklega í hópkennslustofum. Að auki þarf að kaupa skjávarpa, tjald og hátalara í hópkennslustofur. Skólanefnd leggur mikla áherslu á að aukið fjármagn verði sett í hljóðfærakaup í fjárhagsáætlun 2016. Með stækkandi byggð má gera ráð fyrir aukinni aðsókn nemenda í skólanum og huga þarf að auknu hlutfalli stöðugilda.