30 (22-26). fundur

Mengunarmælingar lagðar fram og ræddar. Egill Daði Gíslason, deildarstjóri umhverfis og framkvæmda kynnti stöðu fráveitumála í Garðabæ og fór yfir stöðu framkvæmda á vegum bæjarins tengda því. Framtíðaruppbygging fráveitumála á Álftanesi rædd og kynnt sem byggir að stórum hluta af því að afleggja rotþrær og tengja við lokað fráveitukerfi bæjarins. Fyrir liggur viljayfirlýsing milli Veitna og Garðabæjar að koma fráveitu inn í Skerjafjarðarveitu með tilkomu dælustöðvar á Norðurnesi. Hafin hefur verið innleiðing á breyttu fyrirkomulagi umsóknar um heimaæðar þar sem uppbyggingaraðila er skylt að sýna fram á rétta tengingu fráveitu og regnvatnslagna. Þetta er gert til að tryggja að rangtengingar verði ekki í nýjum hverfum.

Lagt fram minnisblað Bjarna Jónssonar, fiskifræðings varðandi árlegrar útikennslu í friðlandi Vífilsstaðavatns. Umhverfisnefnd Garðabæjar hefur síðan árið 1999 boðið nemendum í 6. bekk grunnskóla bæjarins upp á útikennslu um lífríki Vífilsstaðavatns. Kennslan við vatnið er liður í náttúrufræðikennslu skólanna og hefur Bjarni Jónsson séð um útikennsluna öll árin, honum til aðstoðar er starfsfólk garðyrkjudeildar.

Umhverfisnefnd telur mjög mikilvægt að gerð verði rannsókn á lífríki Vífilsstaðarvatns. Umhverfisnefnd Garðabæjar lét rannsaka lífríki Vífilsstaðavatns sumarið 1998 og fiskistofna vatnsins haustið 1999. Með nýjum rannsóknarniðurstöðum er hægt að rýna núverandi stöðu vatnsins og meta þörfina á úrbótum. Umhverfisnefnd samþykkir að gerð verði rannsókn á lífríki og fiskistofnum í Vífilsstaðavatni og óskað verði eftir rannsóknarleyfi til Náttúruverndarstofnunar.