45. (2193). fundur

Bæjarráð samþykkir að fela Arion banka að sjá um skuldabréfaútboð á vegum bæjarins í útistandandi skuldabréfaflokkum GARD 11 1 að fjárhæð allt að kr. 1.000.000.000, í samræmi við samþykktar lántökuheimildir

Samskiptastjóri kynnti afmælismerki Garðabæjar í tilefni 50 ára afmælis Garðabæjar árið 2026 kynnt. Útfærsla afmælismerkisins er hönnuð af Einari Guðmundssyni grafískum hönnuði.

Bæjarráð samþykkir að tilnefna Ágúst Þór Guðmundsson (sviðstjóra þróunar- og þjónustu) sem formann, Árna Jón Eggertsson (verkefnastjóra í stafrænni þróun), Egil Daða Gíslason (deildarstjóra umhverfis og framkvæmda), Guðnýju Hrönn Antonsdóttur (samskipta- og kynningarfulltrúa), Gunnar Hrafn Gunnarsson (verkefnastjóra tækni- og tómstundamála) og Ólöfu Breiðfjörð (menningarfulltrúa) í framkvæmdaráð fyrir viðburði 50 ára afmælisárs Garðabæjar 2026.

Framkvæmdaráðinu er falið að útfæra nánar dagskrá afmælisins og hafa umsjón með framkvæmd einstakra dagskrárliða. Framkvæmdaráði er falið að meta hvort þörf sé á að ráða verkefnastjóra í hlutastarf til útfærslu einstakra viðburða á afmælisárinu.

Bæjarráð samþykkir að leggja til við bæjarstjórn að haldinn verði aukafundur bæjarstjórnar Garðabæjar þriðjudaginn 6. janúar 2026, sbr. 2. og 3.mgr. 8.gr. samþykkta um stjórn Garðabæjar. Sá fundur yrði hátíðarfundur bæjarstjórnar í tilefni afmælisársins. Dagsetningin er valin m.t.t. þess að fyrsti fundur bæjarstjórnar Garðbæjar var haldinn þann 6. janúar 1976.

Bæjarráð felur bæjarstjóra í samvinnu við sviðsstjóra fjármála- og stjórnsýslusviðs og þjónustu- og þróunarsviðs að undirbúa fundinn og dagskrá hans.

Sviðstjóri þjónustu- og þróunarsviðs og Skarphéðinn Bergmann Jónsson sérfræðingur á upplýsingatæknideild kynntu notkun öryggismyndavéla í Garðabæ.

Helstu verkefni sem lúta að öryggismyndavélum og eru á döfinni hjá Garðabæ varða vöktun í og við undirgöng í bænum, sem er verkefni sem unnið er í samráði við lögregluna. Þá er í vinnslu uppsetning öryggismyndavéla inni á göngugötu Garðatorgs. Loks er til skoðunar að fjölga öryggismyndavélum við grenndarstöðvar í Garðabæ, en noktun myndavélanna á grenndarstöðvum hefur gefið góða raun.

Bæjarráð samþykkir að óska eftir tilnefningum frá bæjarbúum um "Garðbæinginn okkar 2025" þar sem leitast verði við að verðlauna einstakling fyrir sitt framlag til Garðabæjar, þeim sem eru til fyrirmyndar á einhvern hátt og minna á að allir geta haft áhrif. Til greina koma Garðbæingar, en einnig fólk sem dvelur í bænum til lengri eða skemmri tíma og hefur jákvæð áhrif á nærumhverfi sitt.

Bæjarráð felur þjónustu- og þróunarsviðs afgreiðslu málsins og að skipa dómnefnd sem leggi mat á framkomnar tilnefningar.

Sviðsstjóri umhverfissviðs fór yfir skýrslu Eflu verkfræðistofu um endurskoðun leyfilegs hámarkshraða í Garðabæ. Verkefnið nær til gatnakerfis sem er í eigu Garðabæjar, þ.e. ekki á vegum þar sem veghaldari er Vegagerðin.

Í skýrslunni kemur fram að lækkun hámarkshraða geti hjálpað til að ná markmiðum sveitarfélagsins um fækkun slysa og þá sérstaklega á óvörðum og yngri vegfarendum. Þó sjá megi að aksturstími geti aukist eitthvað þá geta aðgerðirnar skilað töluverðum ávinningi í umferðaröryggi innan sveitarfélagsins og því mat ráðgjafa að ráðast eigi í aðgerðir og lækka hraða.

Bæjarráð samþykkir að umhverfissvið leiti umsagnar og samþykki lögreglu á tillögum um breytingar í fyrirliggjandi skýrslu Eflu, í samræmi við 84.gr. umferðarlaga nr. 77/2019.

Lögð fram umsókn UMF Álftaness um tækifærisleyfi til áfengisveitinga í íþróttamiðstöðinni á Álftanesi í tilefni af tónleikum til styrktar körfuknattleiksdeild UMF Álftaness 27. desember 2025.

Bæjarráð gerir ekki athugasemdir við að umbeðið leyfi verði veitt.

Lögð fram umsókn Kvenfélags Álftaness til áfengisveitinga í íþróttamiðstöðinni á Álftanesi í tilefni af þorrablóti Kvenfélags Álftaness 31. janúar 2026.

Bæjarráð gerir ekki athugasemdir við að umbeðið leyfi verði veitt.