6. fundur

Lögð eru fyrir drög að reglum um notendastýrða persónulega aðstoð fyrir fatlað fólk í Garðabæ, sem unnin voru á fjölskyldusviði Garðabæjar. Drögin byggja á reglugerð nr. 1250/2018 um notendastýrða persónulega aðstoð og lögum nr. 38/2018 um þjónustu við fatlað fólk með langvarandi stuðningsþarfir.

Tekið er fyrir mál nr. 1904211, drög að reglum um NPA. Lagt fram til kynningar og umræðu. Fjölskylduráð fjallaði um einstaka liði reglnanna og gerir ekki athugasemdir við drögin. Fjölskylduráð vísar málinu til samráðshóps um málefni fatlaðs fólks og svo til afgreiðslu og samþykktar bæjarráðs og bæjarstjórnar, að því gefnu að ekki verði gerðar efnislegar breytingar.

Fylgiskjöl

• Drög að reglum um NPA í Garðabæ fyrir nefndir 11.5.2021

Minnisblað Sambands íslenskra sveitarfélaga um niðurstöðu héraðsdóms Reykjaness í máli nr. E-8237/2020 (A gegn Mosfellsbæ vegna NPA) lagt fram til kynningar.

Minnisblað Sambands íslenskra sveitarfélaga vegna Héraðsdóms Reykjaness í máli nr. E-8237/2020 kynnt fyrir fundarmönnum. Starfsmenn fjölskyldusviðs reifa þýðingu dómsins fyrir framkvæmd NPA þjónustu hjá sveitarfélögum og að Mosfellsbær hefur áfrýjað dómnum til Landsréttar.

Lagt er fram til kynningar bréf til íbúa á heimilum fatlaðs fólks í Garðabæ sem sent var út 30. apríl 2021 um endurskoðun á útreikningi húsaleigu á heimilunum. Breytingin hefur í öllum tilvikum í för með sér hækkun á innheimtri húsaleigu og er því gert ráð fyrir 6 mánaða fyrirvara á gildistöku breytingarinnar, sem áætlað er að taki gildi 1. nóvember 2021. Útbúin var reikniformúla um fjárhæð húsaleigunnar eftir afnotarými hvers íbúa. Fjárhæð húsaleigu verður þar með í samræmi við húsaleigu á heimilum fatlaðs fólks í nágrannasveitarfélögum. Jafnframt á að gera nýja húsaleigusamninga við íbúa þar sem samningsaðili verður Garðabær en ekki Fjársýsla ríkisins líkt og var í tilvikum eldri húsaleigusamninga.

Áætlun um breytingu á fjárhæð húsaleigu á heimilum fatlaðs fólks í Garðabæ er lögð fram til kynningar. Starfsmenn fjölskyldusviðs fara yfir forsendur þeirrar reikniformúlu sem liggur að baki útreikningum og það vinnulag sem stuðst var við í endurskoðunarferlinu.

Fylgiskjöl

• Bréf til íbúa vegna hækkunar húsaleigu 30.4.2021.docx
• Hækkun húsaleigu á heimilum fatlaðs fólks

Úrskurður í máli barns lagður fram til kynningar fyrir fjölskylduráð Garðabæjar.

Tekið er fyrir mál nr. 1508464, dómur í máli barns vegna forsjársviptingar. Dómurinn lagður fram til kynningar og upplýsinga fyrir fjölskylduráð.

Lagt er fyrir mál nr. 2104434, umsókn um styrk vegna tryggingar húsaleigu.

Umsókn nr. 2104434 um styrk til greiðslu tryggingar húsaleigu er samþykkt. Nánar er bókað um málið í trúnaðarmálahluta fundargerðar.

Mál nr. 2104399 lagt fram til umræðu. Bæjarráð vísaði erindinu til nánari skoðunar fjölskylduráðs og til fjárhagsáætlunar 2022 á fundi sínum 4.5.2021.

Tekið er fyrir mál nr. 2104399, beiðni Samtaka um karlaathvarf um fjárhagslegan styrk til stuðnings starfsemi samtakanna. Óskað verður eftir upplýsingum um starfsemina frá forsvarsmönnum samtakanna til að gera frekari grein fyrir faglegu starfi þeirra og fyrirliggjandi þörf á úrræðum.

Lagðar eru fram tölulegar upplýsingar í barnavernd og fjárhagsaðstoð janúar til apríl 2021.

Tekið er fyrir mál nr. 1903268, tölulegar upplýsingar er varða velferð barna og fjölskyldna. Fjallað var um málið og helstu upplýsingar.

Kynning á stuðnings-og öldrunarþjónustu í Garðabæ.

Svanhildur Þengilsdóttir, sviðsstjóri fjölskyldusviðs Garðabæjar kynnir núverandi stöðu málaflokksins og fer yfir helstu áherslur stuðningsþjónustunnar.