16. fundur

Farið var yfir helstu liði fjárhagsáætlunar tónlistarskólans fyrir næsta ár en fyrri umræða fór fram í bæjarstjórn 3. nóvember. Skólastjóri ítrekaði mikilvægi þess að halda áfram endurnýjun á búnaði skólans. Huga þarf að bættri samspils- og hópkennsluaðstöðu fyrir tónlistarskólann bæði á Álftanesi og í Kirkjulundi. Í því sambandi þarf að huga að viðbyggingu við húsnæði skólans við Kirkjulund og að gera ráð fyrir aðstöðu fyrir tónlistarskólann þegar byggt verður við húsnæði grunnskólans á Álftanesi.

Formaður sagði frá fundi hans og bæjarstjóra með kennurum tónlistarskólans miðvikudaginn 16. nóvember. Á þeim fundi fór trúnaðarmaður kennara m.a. yfir launaþróun tónlistarskólakennara undanfarin ár og stöðuna í samningum. Kennarar hafa verið samningslausir frá 1. nóvember 2015. Skólanefnd lýsir yfir áhyggjum af stöðu mála og hvetur samninganefndir til að komast að góðri lausn hið fyrsta þannig að viðunandi samningar náist.

Skólastjóri sagði frá miklu og fjölbreyttu starfi í haust. Blásarasveitir hafa farið í æfingabúðir og tekið þátt í viðburðum s.s. óskalögum þjóðarinnar í Hörpu. Hluti nemenda rytmadeildar tók þátt í „Hljómanótt“ í Reykjanesbæ. Í október bauðst öllum píanónemendum skólans að taka þátt í píanómaraþoni í skólanum á laugardegi og tók fjölmargir nemendur og allir píanókennarar skólans þátt í því. Þá var masterklass fyrir framhaldsnemendur í píanódeild í byrjun nóvember. Í október voru haldnir kennaratónleikar í skólanum, en menningar- og safnanefnd Garðabæjar styrkti tónleikana. Á þessum fyrstu kennaratónleikum komu fram allir kennarar rytmadeildar skólans og voru tónleikarnir vel sóttir. Framundan eru fjölmargir jólatónleikar og tónfundir í skólanum. Tónlistarskólinn býður líkt og undanfarin ár öllum nemendum í 2. og 3. bekk í grunnskólum bæjarins á jólastund í skólanum 13. desember nk. Þá munu nemendur skólans koma fram á ýmsum viðburðum í bænum s.s. þegar ljós verða kveikt á jólatrénu á Garðatorgi, jólasamkomu eldri borgara ofl.