Frið­lýst svæði

Friðlýst svæði njóta verndar samkvæmt lögum og geta verið skilgreind sem friðlönd, fólkvangar, sérstæðar náttúrumyndanir eða búsvæði.

Eftirfarandi svæði eru friðlýst eða njóta verndar:

• Kasthúsatjörn og aðliggjandi fjara – friðland og fólkvangur
• Hlið á Álftanesi – fólkvangur
• Gálgahraun – friðland
• Skerjafjörður innan bæjarmarka Garðabæjar – búsvæðavernd
• Garðahraun, Vífilsstaðahraun og Maríuhellar – fólkvangur
• Vífilsstaðavatn og nágrenni – friðland
• Reykjanes- og Bláfjallafólkvangar – að hluta innan Garðabæjar
• Bessastaðanes – friðland

Á yfirlitskorti yfir friðlýst svæði í Garðabæ má sjá afmörkun friðlýstra svæða og hvaða vernd gildir á hverjum stað.

Einnig er hægt að sjá friðlýst svæði á kortavef Garðabæjar. Velja þarf Hagnýtar upplýsingar í valmyndinni hægra megin og haka við Friðlýst svæði. Nánari upplýsingar um einstök svæði má finna hér á eftir.

Auk friðlýstra svæða eru nokkur svæði í Garðabæ vernduð með hverfisvernd. Slík vernd miðar að því að varðveita náttúrufar og útivistargildi svæða í nærumhverfi íbúa. Hverfisvernd er mildari vernd en friðlýsing og felur ekki í sér sömu takmarkanir á umgengni. Meðal verndaðra svæða eru Lambhúsatjörn, Skógtjörn, Balatjörn, Urriðavatn og Grunnuvötn.

Til að vernda náttúru og lífríki gilda eftirfarandi reglur á friðlýstum svæðum:

• Óheimilt er að spilla gróðri eða hrófla við jarðmyndunum
• Vélknúin ökutæki eru bönnuð nema vegna þjónustu
• Reiðhjól eru heimil á vegum og stígum
• Mannvirkjagerð og jarðrask eru óheimil nema með leyfi

Garðabær hefur umsjón með friðlýstum svæðum í samræmi við samninga við Umhverfis- og orkustofnun og vinnur að verndun þeirra og fræðslu til almennings.