23. (2218). fundur

Lögð fram útboðs- og verklýsing vegna Hönnun - Útboð - Vífilsstaðavegur frá hringtorgi við Spítalaveg að Elliðavatnsvegi.

Bæjarráð samþykkir fyrirliggjandi útboðs- og verklýsingu og felur umhverfissviði framkvæmd útboðsins fyrir hönd Garðabæjar.

Lögð fram kæra D.Ing-Verk ehf. til Kærunefndar útboðsmála, vegna útboðs Garðabæjar, "Arnarland- gatnagerð og veitulagnir", dags. 25. júní 2026.

Bæjarráð felur Juris lögmannsstofu að gæta hagsmuna bæjarins í málinu.

Bæjarráð tekur undir afstöðu Sambands íslenskra sveitarfélaga og lýsir yfir þungum áhyggjum af nýrri reglugerð mennta- og barnamálaráðuneytisins sem gengur gegn samkomulagi ríkis og sveitarfélaga frá 19. mars 2025 um ábyrgð á þjónustu við börn með fjölþættan vanda. Með reglugerðinni hefur ríkið einhliða þrengt skilgreiningu á hópnum sem skilur þannig eftir ábyrgð og kostnað hjá sveitarfélögum sem á grundvelli samkomulagsins á heima hjá ríkinu.

Bæjarráð telur breytinguna óásættanlega, án fullnægjandi faglegra raka og fela í sér alvarlegan trúnaðarbrest af hálfu ríkisins gagnvart sveitarfélögum. Bæjarráð skorar á ráðuneytið að afturkalla reglugerðina og taka þá ábyrgð og skuldbindingu sem samið var um.

Lögð fram tilkynning Sambands íslenskra sveitarfélaga vegna framboðsfrests til formanns Sambandsins. Framboðsfrestur er til 15. júlí 2026 og kosning hefst 15. ágúst 2026.

Lagt fram erindi Landsambands eldri borgara til nýkjörinna sveitarstjórna landsins.

Bæjarráð vísar erindinu til úrvinnslu á velferðarsviði.

Bæjarráð samþykkir samhljóða fyrirliggandi tillögu um tilnefningu Þorbjargar Þorvaldsdóttur í stað Hannesar Inga Geirssonar, sem varaáheyrnarfulltrúa í skólanefnd.

Fjallað var um stöðu innritunar nemenda úr Garðabæ í framhaldsskóla. Óvenju margir nemendur úr Garðabæ fengu úthlutað skólavist sem grundvallaðist ekki á vali á þeirra og í mörgum þessara tilvika er um að ræða skólavist á hinum enda höfuðborgarsvæðisins þar sem ferðatími yrði umtalsverður.

Bæjarráð felur bæjarstjóra og sviðsstjóra fræðslu- og frístundasviðs að fá nánari upplýsingar um stöðu innritunar í framhaldsskóla og ræða mögulegar úrbætur við mennta- og barnamálaráðuneyti og stjórnendur Fjölbrautaskólans i Garðabæ.