40. fundur

Karlalið Stjörnunnar í körfubolta varð Íslandsmeistari í oddaleik við Tindastól á Sauðarkróki í vor.

Íþrótta- og tómstundaráð Garðabæjar óskar körfuknattleiksdeild Stjörnunnar innilega til hamingju með sinn fyrsta Íslandsmeistaratitil í körfubolta í 65 ára sögu félagsins. Þetta er sögulegur áfangi og viðurkenning á frábæru starfi leikmanna, þjálfara, starfsfólks og stuðningsmanna.

Af því tilefni hefur bæjarstjórn Garðabæjar ákveðið að bjóða Íslandsmeisturunum til hátíðarmóttöku þar sem þeim verður formlega veitt viðurkenning og styrkur frá bænum fyrir þetta merka afrek.

Til kynningar er áformað útboð á viðhaldi og stækkun gervigrasvallarins á Stjörnuvelli næst Stekkjaflöt.

Samþykkt hefur verið í bæjarráði að bjóða út stækkun Stekkjarflatarvallar og endurnýjun hitaveitu. Verkefnið snýst um að breikka æfingavöll Stjörnunnar sem liggur að Stekkjarflöt um 8 metra úr 60 m breiðum velli í 68 m. Einnig verður farið í að endurnýja lýsingu á vellinum á þremur möstrum. Vegna stækkunar vallarins er þörf á tilfærslu á göngustígnum sem liggur meðfram vellinum en einnig er brýn þörf á því að endurnýja hitaveitulögn sem liggur undir núverandi stíg. Munu því Veitur koma að verkefninu með Garðabæ.

Stefna í málefnum eldri borgara í Garðabæ - Aðgerðaráætlun 2025 - 2026. Samþykkt á fundi bæjarstjórnar 15.05 2025

Samþykkt í bæjarstjórn 15. maí sl. lögð hér fram til kynningar.

Sérstök athygli vakin á 4. kafla sem fjallar um félagslega þátttöku og 5. kafla sem fjallar um forvarnir og heilsueflingu. Einnig má nefna 8. kafla sem fjallar um miðlun þekkingar, sem tengist inn í félagsstarf í félagsmiðstöðvum, leik- og grunnskólum. Íþrótta- og tómstundaráð áréttar mikilvægi þess að áfram sé unnið markvisst að því að efla félagslega virkni og þátttöku eldri borgara í fjölbreyttu félagsstarfi.

Kynning á starfsskýrslum félagsmiðstöðvanna veturinn 2024-2025

Garðalundur í Garðaskóla

Elítan í Álftanesskóla

Klakinn í Sjálandsskóla ásamt miðdeildunum í Flataskóla og Hofsstaðaskóla.

Urri í Urriðaholtsskóla.

Starfsskýrlur félagsmiðstöðva Garðabæjar veturinn 2024/2025 teknar fyrir. Um var að ræða starfsskýrslur eftirfarandi félagsmiðstöðva:

Garðalundur í Garðaskóla - unglingastig

Elítan í Álftanesskóla - miðdeild og unglingastig

Klakinn í Sjálandsskóla - miðdeild og unglingastig

Dropinn í Flataskóla - miðdeild

Fjaran í Hofsstaðaskóla - miðdeild

Urri í Urriðaholtsskóla - miðdeild og unglingastig

Garðahraun - sértæk félagsmiðstöð fyrir börn og unglinga með þörf fyrir aukinn stuðning.

Einnig var upplýst að Ungmennahús verður opnað í haust í samráði við Ungmennaráð Garðabæjar. Verkefnastjóri þess verður Ragnhildur Jónasdóttir.

Íþrótta- og tómstundaráð vill hrósa félagsmiðstöðvunum og starfsfólki þeirra fyrir öflugt, fjölbreytt og faglegt starf á liðnum vetri. Félagsmiðstöðvarnar munu vera opnar í sumar líkt og kynnt hefur verið á heimasíðu bæjarins.

Vinnuhópur á vegum SSH skilaði af sér skýrslu um viðmið við forvarnir og geðrækt ungmenna. Aðgerðaráætlunin er hluti af Sóknaráætlun SSH sem kynnt var á morgunfundi með nefndum og ráðum sveitarfélaganna 16. maí sl. Íþrótta-, tómstunda- og forvarnafulltrúi Garðabæjar hefur setið í þessum vinnuhópi frá árinu 2022.

Vinnuhópur á vegum SSH hefur skilað af sér skýrslu um viðmið um forvarnir og geðrækt ungmenna. Aðgerðaráætlunin er hluti af Sóknaráætlun SSH og var kynnt á morgunfundi með nefndum og ráðum sveitarfélaganna þann 16. maí sl. Íþrótta-, tómstunda- og forvarnafulltrúi Garðabæjar hefur átt sæti í vinnuhópnum frá árinu 2022.

Markmið vinnuhópsins var að móta samræmd viðmið og áætlanir sveitarfélaga á höfuðborgarsvæðinu um forvarnir og geðrækt ungmenna, byggt á þarfagreiningu og könnun á afstöðu hópsins sjálfs. Tilgangurinn er að tryggja að öll ungmenni á aldrinum 16?25 ára hafi jafnan aðgang að frístundastarfi, ráðgjöf, stuðningi og forvarnarstarfi, óháð búsetu.

Á fundinum var farið yfir helstu niðurstöður vinnuhópsins og rætt sérstaklega hvernig þær snúa að Garðabæ. Ráðið fjallaði um þá starfsemi sem er þegar til staðar í sveitarfélaginu og hvaða tækifæri kunna að vera til frekari þróunar í forvörnum og geðrækt ungmenna.

Forvarnavika Garðabæjar 2025 verður haldin 29. október til 5. nóvember. Dagskrá liggur ekki fyrir en unnið verður að henni í byrjun skólaársins í haust.

Forvarnavika Garðabæjar 2025 verður haldin 29. október til 5. nóvember. Dagskrá liggur ekki fyrir en unnið verður að henni í byrjun skólaársins í haust.

Umræður fóru fram um hvernig megi bæta, styrkja og stækka forvarnarvikuna með það fyrir augum að hún vekji enn meiri athygli Garðbæinga. Rætt var um mikilvægi þess að virkja einstaklinga til þátttöku í hreyfingu og félagsstarfi.

Lyftingasamband Íslands (LSÍ) óskar eftir samstarfi við Garðabæ um að halda NM í Ólympískum lyftingum í Miðgarði 14.-16. nóvember 2025. LSÍ er í samstarfi við Lyftingadeild Stjörnunnar með mótshaldið. Óskað er eftir að fá aðgang að Miðgarði endurgjaldslaust.

Lyftingasamband Íslands (LSÍ) óskar eftir samstarfi við Garðabæ um að halda NM í Ólympískum lyftingum í Miðgarði 14.-16. nóvember 2025. LSÍ er í samstarfi við Lyftingadeild Stjörnunnar með mótshaldið. Óskað er eftir að fá aðgang að Miðgarði endurgjaldslaust.

ÍTG lýsir sig samþykkt þessari ósk og beinir því til mótshaldara að það trufli ekki aðra starfsemi í húsinu en í þeim sölum sem nýttir verða til keppni og upphitunar.

Umsókn um styrk vegna mótaraðar í frisbígolfi. Þessi mótaröð er sérstaklega sett saman til að styrkja fjóra unga drengi fjárhagslega á aldrinum 13-16 ára. Þeir fengu allir pláss á virtu og stóru móti á Álandseyjum í sumar.

ÍTG óskar eftir frekari upplýsingum áður en hægt er að taka málið fyrir efnislega.

Ferðastyrkur kr. 20.000 til Kolbrúnar Evu Hólmarsdóttur vegna NM unglinga í áhaldafimleikum í Álaborg, Danmörku 5. til 9. júní 2025.

ÍTG samþykkir ferðastyrk kr. 20.000 til Kolbrúnar Evu Hólmarsdóttur vegna NM unglinga í áhaldafimleikum í Álaborg, Danmörku 5. til 9. júní 2025.

Ferðastyrkur kr. 20.000 til Matthíasar Dags Þorsteinssonar vegna NM U17 í handbolta í Færeyjum 6. júní 2025.

ÍTG samþykkir ferðastyrk kr. 20.000 til Matthíasar Dags Þorsteinssonar vegna NM U17 í handbolta í Færeyjum 6. júní 2025.

Ferðastyrk til Sigurrósar Ástu Þórisdóttur vegna NM unglinga í áhaldafimleikum í Árósum, Danmörku, 5. júní 2025

ÍTG samþykkir ferðastyrk kr. 20.000 til Sigurrósar Ástu Þórisdóttur vegna NM unglinga í áhaldafimleikum í Árósum, Danmörku, 5. júní 2025