21. (2169). fundur

Bæjarstjóri gerði grein fyrir drögum að kynningu á sölu á byggingarrétta lóða í Vetrarmýri. Um er að ræða tvo reiti með samtals 177 íbúðum, 2.846 fermetra atvinnuhúsnæði og lóðarstærð 9.449 fermetra. Málinu frestað til frekari skoðunar.

Á fund bæjarráðs mætti Lúðvík Hjalti Jónsson, fjármálastjóri og gerði grein fyrir tilboðum í lántöku. Skuldabréfaútboði Garðabæjar í skuldabréfaflokknum GARD 11 1 lauk 2. júní 2025. Heildartilboð í flokkinn voru 9 talsins og námu samtals 2.385 m.kr. að nafnverði. Bæjarráð samþykkir að leggja til við bæjarstjórn að heimila bæjarstjóra að samþykkja tilboð samkvæmt útboðinu að fjárhæð allt að 1.370 m.kr. að nafnverði, með ávöxtunarkröfu upp á 3,9%. Markaðsvirði útgáfunnar nemur 1.877.067.524 kr. Fyrir útboðið var útistandandi í skuldabréfaflokknum GARD 11 1 að nafnverði 3.000 m.kr., en heildarstærð flokksins eftir útboðið verður því 4.370 m.kr. að nafnverði. Framangreindar fjárhæðir eru í samræmi við samþykktar lántökuheimildir.

Bæjarráð samþykkir afgreiðslu byggingarfulltrúa að veita Fjölni Má Geirssyni, kt. 040480-3159, leyfi fyrir byggingu einbýlishúss að Útholti 10.

Bæjarráð samþykkir að leggja til við bæjarstjórn að staðfesta afgreiðslu skipulagsnefndar frá fundi 26. maí 2025 varðandi tillögu að breytingu Aðalskipulags Garðabæjar, rammahluta Vífilsstaðalands, sem nær til háholts Hnoðraholts.

Ábendingar og umsagnir sem bárust gefa ekki tilefni til breytinga á tillögunni.

Skipulagsnefnd vísar tillögunni óbreyttri til auglýsingar í samræmi við 3. mgr. 30. gr. skipulagslaga nr. 123/2010 og skal hún send Skipulagsstofnun til athugunar.

Bæjarráð samþykkir að leggja til við bæjarstjórn að staðfesta afgreiðslu skipulagsnefndar frá fundi 26. maí 2025 varðandi tillögu að breytingu deiliskipulags Hraunsholts eystra sem nær til lóðarinnar Lækjarfitjar 6 og Löngufitjar 5. Athugasemd barst frá eiganda Löngufitjar 5.

Lögð fram tillaga að breyttum lóðarmörkum sem hefur verið mótuð í samráði við eiganda Löngufitjar 5.

Skipulagsnefnd samþykkti tillöguna með breyttri útfærslu sem er viðbragð við innsendri athugasemd í samræmi við 41.gr. skipulagslaga nr. 123/2010.

Eftirfarandi tilboð bárust í útboðsverkið "Skólamálsverðir í grunn- og leikskólum 2025-2029":

Tilboð frá Skólamat ehf.:

1. Austurhverfi - heildartilboð - kr. 974.304.600.

2. Miðhverfi - heildartilboð - kr. 1.710.018.700.

3. Vesturhverfi - heildartilboð - kr. 957.982.300.

Tilboð bárust ekki frá öðrum.

Bæjarráð samþykkir að taka tilboði Skólamatar ehf., að fjárhæð kr. 974.304.600 fyrir austurhverfi, kr. 1.710.018.700 fyrir miðhverfi og kr. 957.982.300 fyrir vesturhverfi. Samþykktin er með fyrirvara um að uppfylltir séu allir skilmálar útboðsins og er sviðsstjóra umhverfissviðs falin afgreiðsla málsins. Vakin er athygli á að samkvæmt 86. gr. laga um opin-ber innkaup nr. 120/2016 þarf að líða 10 daga biðtími frá ákvörðun um töku tilboðs til gerðar samnings. Heimilt er að skjóta ákvörðun bæjarráðs til kærunefndar útboðsmála og er kærufrestur samkvæmt 106. gr. laga um opinber innkaup 20 dagar frá því að kæranda var eða mátti vera kunnugt um ofangreinda ákvörðun.

Bæjarráð felur grunnskólanefnd og leikskólanefnd að fylgja nánar eftir framkvæmd samningsins.

Gerð grein fyrir bréfi SSH vegna skipunar í aðgerðarhóp sveitarfélaga á höfuðborgarsvæðinu vegna almyrkva á sólu 12. ágúst 2026, til samræmis við fyrirliggjandi tillögu til þingsályktunar um skipun aðgerðarhóps vegna almyrkvans. Sviðsstjóri umhverfissviðs mun sitja í hópnum fyrir hönd Garðabæjar.

Fylgiskjöl

• Fylgibréf GBR - aðgerðahópur vegna sólmyrkva.pdf

Sviðsstjóri þróunar- og þjónustusviðs kynnti stefnu um notkun gervigreindar hjá Garðabæ, en bærinn hefur það markmið með notkun gervigreindar að auka möguleika starfsfólks og notenda til upplýsinga og sjálfbærni, auka sjálfstæði í vinnu og verkefnum og leggja nútímaleg verkfæri í hendur starfsfólks.

Bæjarráð leggur til við bæjarstjórn að samþykkja fyrirliggjandi stefnu.

Fylgiskjöl

• GBR_Stefna í gervigreind.pdf

Lagt fram minnisblað Strætó varðandi kvöldakstur leiða 22 og 23 í Garðabæ.

Bæjarráð samþykkir að hafinn verði kvöldakstur með hálftíma tíðni á leiðum 22 og 23 frá 1. september 2025. Stefnt skal að því að tími síðustu ferðar taki mið af útivistartíma barna og ungmenna eftir því sem því verður við komið.

Skal þjónustan vera til reynslu og endurmetin að ári liðnu. Samhliða verði möguleg tilhögun og útfærsla innanbæjaraksturs í Garðabæ metin og rýnd.

Fylgiskjöl

• 25.05.26 Minnisblað - Kvöldakstur leiða 22 og 23 í Garðabæ.pdf