37. (2090). fundur

Bæjarráð samþykkir afgreiðslu byggingarfulltrúa að veita Veitum ohf., kt. 501213-1870, leyfi til að byggja dreifistöð fyrir raforku á lóðinni við Tinnuvelli 11a.

Lagt fram.

Lagt fram.

Í úrskurðarorði kemur fram að hafnað er kröfu kærenda um ógildingu á ákvörðun byggingarfulltrúans í Garðabæ um að samþykkja byggingarleyfi fyrir bílskúr á lóðinni Aratúni 36.

Í úrskurðarorði kemur fram að hafnað er kröfu kærenda um ógildingu á ákvörðun byggingarfulltrúans í Garðabæ um að samþykkja byggingarleyfi fyrir Bakkaflöt 5.

Lagt fram bréf umhverfis-, orku- og loftlagsráðuneytis þar sem sveitarfélög eru hvött til að huga að staðarvali innviða fyrir orkuskipti ásamt því að vinna að gerð orkuskiptaáætlunar sem geti verið leiðarljós við skipulagsvinnu.

Bæjarráð vísar bréfinu til umfjöllunar hjá skipulagsnefnd og umhverfisnefnd

Bæjarstjóri gerði nánari grein fyrir drögum að samkomulagi við ÍAV um uppgjör vegna framkvæmda við fjölnota íþróttamiðstöðina Miðgarð. Í samkomulaginu er gert ráð fyrir að Garðabær greiði ÍAV 55,0 mkr. og er um lúkningu að ræða á öllum kröfum sem tengjast fjárhagslegu uppgjöri verksamnings aðila.

Í drögunum er jafnframt kveðið á um kostnaðarskiptingu vegna endurbóta á frárennsli sem tengist jarðsigi og endurskoðun hönnunar íþróttagólfs (gervigras).

Bæjarráð samþykkir að leggja til við bæjarstjórn að samþykkja samkomulag við ÍAV varðandi uppgjör vegna verksamnings um framkvæmdir við fjölnota íþróttamiðstöðina Miðgarð.

Lögð fram tilkynning frá félags- og vinnumarkaðsráðuneytinu þar sem fram kemur að ráðuneytið hefur gert samkomulag við Rauða krossinn á Íslandi um tímabundið verkefni sem felur í sér neyðaraðstoð við útlendinga sem fengið hafa endanlega synjun á umsókn sinni um alþjóðlega vernd hér á landi og eiga ekki rétt á aðstoð á grundvelli laga um útlendinga.

Jafnframt lögð fram tilkynning frá Sambandi íslenskra sveitarfélaga þar sem lýst er yfir vonbrigðum með einhliða aðgerð félags- og vinnumarkaðsráðherra enda var hún tekin með fullri vitneskju ráðherra um algjöra andstöðu sveitarfélaga við þessa ráðstöfun.

Bæjarráð tekur undir bókun stjórnar sambandsins frá fundi 8. september sl. þar sem fram kemur sú afstaða að sveitarfélögum sé hvorki heimilt né skylt að veita þeim erlendu ríkisborgurum fjárhagsaðstoð, sem vísað hefur verið úr þjónustu ríkisins í kjölfar synjunar á umsókn viðkomandi um alþjóðlega vernd skv. útlendingalögum.

Bæjarráð samþykkir samning við Rannsóknir og greiningu varðandi framkvæmd kannana meðal grunnskólanema Garðabæjar. Samningurinn gildir fyrir árin 2023 og 2024 og er árleg samningsfjárhæð kr. 1.410.000.

Lagt fram yfirlit í vinnslu um stöðu úthlutunar og sölu lóða í eigu Garðabæjar ásamt því að gerð er grein fyrir uppbyggingu á svæðum í einkaeigu.

Bæjarráð samþykkir að lóðir í 2. áfanga norðurhluta Hnoðraholts verði auglýstar til úthlutunar þegar tillaga að breytingu á deiliskipulagi hefur fengið afgreiðslu í bæjarstjórn. Úthlutunar- og söluskilmálar verða lagðir fram til afgreiðslu í bæjarráði.

Bæjarráð samþykkir að einbýlishúsalóðir í Prýðahverfi og parhúslóðir í Kumlamýri verði auglýstar til sölu hjá fasteignasölum með 14 daga tilboðsfresti. Tilboð verða opnuð á fundi bæjarráðs.

Bæjarstjóri lagði fram eftirfarandi samþykkt að bókun.

„Á ársfundi Jöfnunarsjóðs sveitarfélaga sem haldinn var 20. september sl. gerði innviðarráherra grein fyrir að lagt hefur verið fram frumvarp um heildarendurskoðun á jöfnunarsjóði sem væri ætlað að búa til einfaldara og sanngjarnara kerfi. Fjallaði ráðherra sérstaklega um nýtt ákvæði í frumvarpinu sem kveður á um að skerða skuli framlög Jöfnunarsjóðs til sveitarfélaga sem ekki fullnýta útsvar sitt.

Í því sambandi telur bæjarráð rétt að árétta eftirfarandi. Sveitarfélögum er tryggt sjálfstæði í sínum málum, þ.m.t. varðandi álagningu útsvars og því óeðlilegt að reglur Jöfnunarsjóðs séu með þeim hætti að þær þvingi sveitarfélög til að leggja á íbúa sína hærra útsvar. Álagt útsvar hefur engin áhrif á hlutdeild Jöfnunarsjóðs í útsvarstekjum sem íbúar einstakra sveitarfélaga greiða og er því ekki hægt að halda því fram að tekjuminni sveitarfélög niðurgreiði útsvar fyrir aðra. M.ö.o. hefði hækkun útsvars í Garðabæ engin áhrif á tekjur Jöfnunarsjóðs eða stöðu annarra sveitarfélaga.

Í allri umræðu um Jöfnunarsjóð er nauðsynlegt að minna á að hlutdeild sjóðsins í útsvarstekjum er nýtt til framlaga til grunnskóla og málefna fatlaðs fólks sem áður voru á hendi ríkisins. Gera verður þá kröfu að skipting þeirra fjármuna milli sveitarfélaga fari fram með hlutlægum hætti hér eftir sem hingað til.“

Bæjarráð samþykkir framkomna bókun með fjórum atkvæðum.

Brynja Dan Gunnarsdóttir, situr hjá við afgreiðslu málsins

Sara Dögg Svanhildardóttir, stendur ekki að samþykkt að bókun um málið og tekur fram að afstaða Viðreisnar til málsins er skýr.