10. fundur

Farið var yfir stöðu fjárhags á sviði menningarmála skv. fjárhagsáætlun ársins 2015. Á næsta fundi nefndarinnar verður fjallað um fjárhagsáætlun næsta árs.

Tekið var til afgreiðslu bréf Brynhildar Auðbjargardóttur, dags. 27. maí 2015, um styrkbeiðni vegna Töframáttar tónlistar. Bréfið var tekið fyrir í bæjarráði Garðabæjar, 2. júní sl. og vísað til umfjöllunar og afgreiðslu menningar- og safnanefndar.

Menningar- og safnanefnd samþykkir að styrkja verkefnið Töframátt tónlistar með fjárhæð kr. 100.000 vegna samfélagslegs gildis verkefnisins og mælist til þess að verkefnið verði kynnt fyrir þeim stofnunum/félögum sem við á í Garðabæ.

Tekið var til afgreiðslu bréf Kvennakórs Garðabæjar, dags. 10. ágúst 2015, um styrk vegna þátttöku í alþjóðlegri kórakeppninni Canta el mar á Spáni þann 21.-25. október 2015 en í keppninni mun kórinn keppa í tveimur flokkum, almennum kvennakórverkum og kirkjuverkum. Bréfið var tekið fyrir í bæjarráði Garðabæjar þann 18. ágúst sl. og vísað til afgreiðslu menningar- og safnanefndar.

Menningar- og safnanefnd samþykkir að styrkja Kvennakórinn um 200.000 kr. vegna undirbúnings og þátttöku í kórakeppninni.

Fyrir var tekið erindi Félags áhugamanna um sögu Bessastaðaskóla, dags. 26. ágúst 2015, um styrk vegna tónlistarflutnings á árlegum fræðslufundi félagsins sem haldinn verður í Bessastaðakirkju 3. október nk. Félagið fékk úthlutað styrk að fjárhæð kr. 150.000 frá bæjarráði sl. vor við afgreiðslu styrkja samkvæmt fjárhagsáætlun til að standa straum af fræðsludagskrá helgaðri Jónasi Hallgrímssyni á fundinum.

Menningar- og safnanefnd samþykkir að styrkja Félag áhugamanna um sögu Bessastaðaskóla að upphæð 100.000 kr. fyrir tónlistaratriði þar sem flutt verður nýtt verk eftir bæjarlistamann Garðabæjar, Karólínu Eiríksdóttur tónskáld.

Farið var yfir mögulegar dagsetningar fyrir Tónlistarveislu í skammdeginu sem hefur farið fram á Garðatorgi í nóvember undanfarin ár. Einnig var rætt um hugsanlega umgjörð og flytjendur.

Upplýsinga- og menningarfulltrúa var falið að vinna áfram að verkefninu.

Farið var yfir verkefni framundan og uppfærða starfsáætlun nefndarinnar fyrir tímabilið ágúst 2015-maí 2016. Nefndin samþykkti starfsáætlunina.

Samþykkt að upplýsinga- og menningarfulltrúi auglýsi eftir umsóknum um styrki til viðburða og verkefna á sviði lista- og menningarmála í Garðabæ á árinu 2016 og hvetji íbúa til að koma hugmyndum sínum á framfæri við menningar- og safnanefnd. Í umsókn skal skilgreina verkefni og kostnaðaráætlun skal fylgja með einnig þarf að tilgreina ósk um styrkupphæð. Mælst skal til þess að umsækjendur kynni afrakstur sinn að loknu verki.

Formaður greindi einnig frá skipan afmælisnefndar í tilefni af 40 ára kaupstaðarafmæli Garðbæjar á næsta ári en formaður á sæti í nefndinni. Hlutverk afmælisnefndar verður að gera tillögur til bæjarráðs um einstaka viðburði og dagskrá hátíðarhalda í tilefni afmælisins.

Upplýsinga- og menningarfulltrúi greindi frá fyrirhuguðum undirbúningi vegna listadaga barna og ungmenna sem verða haldnir vorið 2016. Fyrstu listadagar barna og ungmenna voru haldnir árið 2003 og frá árinu 2006 hafa listadagarnir verið haldnir á tveggja ára fresti með þátttöku allra skóla í bænum. Rætt var um tengingar við listastofnanir og listamenn.

Yfirlit með flokkuðum niðurstöðum af opnum fundi menningar- og safnanefndar frá 29. apríl 2015 var lagt fram. Umræður voru um næstu skref og áformaða vinnu nefndarinnar framundan við gerð aðgerðaáætlunar í menningarmálum bæjarins til næstu ára.