02. fundur

Farið yfir hvernig gekk og hvað má gera betur.

Sýningin Eldblóm - hvernig dans varð að vöruhönnun opnaði á HönnunarMars og var framlag safnsins til hátíðarinnar. Sýningin var kortlagning á verkum Sigríður Soffíu Níeldsdóttur, dansara og danshöfundar. Hún hefur hannað flugeldasýningar sem þróuðust áfram í garðhönnun sem þróaðist áfram í vöruhönnun, þaðan í matarhönnun og upplifunarhönnun. Aðsóknin var mjög góð á opnunardaginn en lítil dagana á eftir. Sýningin var virkjuð í safnfræðslu fyrir grunnskólanemendur þar sem þeir fengu innsýn inn í hvernig ein hugmynd getur þróast í aðra og þannig koll af kolli. Verk barnanna voru sýnd á Barnamenningarhátíð Garðabæjar. Það er áskorun að keppa við alla sýningarnar og viðburðina á HönnunarMars. Mögulega mætti setja meira púður í að kynna þær betur eftir HönnunarMars þar sem þær standa áfram í safninu.

Farið yfir aðsóknartölur það sem af er árinu.

Fjöldi gesta á safnið fyrstu fjóra mánuði ársins eru 3224.

Gestafjöldi árið 2023 var 9447 við stefnum á að fara yfir þann fjölda í ár.

Nýr fræðslufulltrúi Sigríður Sunna Reynisdóttir kynnir fræðslustarf safnsins frá áramótum og það sem er framundan.

Sigríður Sunna Reynisdóttir hefur verið ráðin í 50% starf hjá safninu sem sérfræðingur í fræðslu. Starfið kemur til vegna styrks til þriggja ára frá Menningar- og viðskipta ráðuneytinu. Sigríður hefur starfað sem leikmynda- leikbrúðu- og búningahönnuður og er stofnandi og listrænn stjórnandi

Þykjó sem hefur sérhæft sig í þverfaglegum hönnunarverkefnum fyrir börn og fjölskyldur þeirra. Hópurinn vinnur náið með lista- vísinda- og fræðasamfélaginu og hefur hannað og framkvæmt fjölbreyttar smiðjur, innsetningar og viðburði í samstarfi við söfn og menningarstofnanir.

Sigríður sér um að þróa smiðjur fyrir grunnskola í samtali við safnstjóra, sérfræðing safneignar og sýningarstjóra sem eru að vinna með safninu hverju sinni. Hún finnur hönnuði eða aðra til að vinna með eftir því sem við á. Sigríður sér um að kynna þetta starf og bóka skólahópa og stýrir smiðjunum. Hún tekur einnig á móti nemendum úr framhaldsskólum og háskólum.

Hún sér um að setja upp sýningar tengdar smiðjunum á Barnamenningarhátíð, námskeið í sumar og vetrarfríum auk þess að sjá um vandaðar fjölskyldsmiðjur á sunnudögum einu sinni í mánuði.

Fyrsta fræðsluverkefnið sem Sigríður þróaði í safninu fyrir grunnskólanemendur er „Hvernig dans varð vöruhönnun“. Það var þróað í tengslum við samnefnda rannsóknardvöl Sigríðar Soffíu Níelsdóttur. Sigríður Soffía tekur á móti nemendunum með skemmtilegum einleik um skapandi ferli og í framhaldinu fara nemendurnir í smiðju með Sigríði Sunnu þar sem þau fá að "hugsa með höndunum".

Markmiðið er að opna augu barna fyrir því hvernig frjóar hugmyndir geta hoppað á milli listforma og hönnunargreina, allt frá dansverkum til flugeldasýninga og vöruhönnunar.

Markmið heimsóknar:

Kynna hönnun sem hugtak

Efla meðvitund um íslenska hönnunarsögu

Opna glugga inn í heim vöruhönnunar

Kynna frumkvöðlahugsun og tilraunir

Störf framtíðar - þverfaglegt samstarf

Upplifun fyrir öll skilningarvit

Hvetja til sjálfbærni og garðræktar

Samanburður á skala (1:1 og 1:300)

Kveikja forvitni fyrir náttúrunni

Ögra hugmyndum um safnaheimsókn

Verkefnið var meðal annars sýnt á Barnamenningarhátíð Garðabæjar.

Samtals hefur verið tekið á móti 563 nemendur og 66 kennurum frá 14 skólum í tengslum við verkefnið.

Boðið verður áfram upp á heimsóknina í haust auk þess sem hún verður þróuð fyrir skóla úti á landi en það er partur af samkomulagi við ráðuneytið.

Sigríður Sunna sér einnig um fjölbreyttar fjölskyldusmiðjur fyrsta sunnudag í hverjum mánuði í samstarfi við valda hönnuði. Meðal þess sem boðið hefur verið uppá frá áramótum eru: skartgripasmiðja, flugdrekasmiðja og textílþrykk. Smiðjurnar hafa nú fest sig í sessi og eru vel sóttar.

Einnig var boðið upp á útsaumsnámskeið fyrir fullorðna í samstarfi við argentínska hönnuðinn Adriönu Torres. Slík námskeið eru seld í gegnum tix.is

Forstöðumaður kynnir næstu "heimsóknir" inn í sýninguna.

Fastar sýningar eru mikilvægar, en þeim fylgir hætta á að aðsókn detti niður. Til þess að halda sýningunni lifandi hafa verið kynntar til leiks „heimsóknir“ inn í sýninguna. Þá er tilefni til að halda aðra opnun, gestir koma aftur á sýninguna og hún öðlast nýjan áhugaverðan vinkil og ný samtöl og pælingar verða til. Heimilið er endalaus uppspretta áhugaverðra viðfangsefna.

Næsta "heimsókn" inn í föstu sýningu safnsins, Hönnunarsafnið sem heimili, fjallar um örverur á heimilum. Verkefnið er unnið í samstarfi við Háskóla Íslands og opnar 27. september. Boðið verður upp á örverugigg 10. október þar sem súrdeig, molta, melting og fleira skemmtilegt kemur við sögu.

Staðan á vinnu vegna söfnunarstefnu Hönnunarsafnsins.

Byrjað verður á að móta söfnunarstefnu fyrir keramik. Búið er að hafa samband við aðila sem munu koma að þeirri vinnu sem hefst eftir sumarfrí.

Farið yfir stöðuna á leka í varðveislurými safnsins.

Búið er að finna brunninn sem frárennslislagnir safnsins liggja í en þar var enga skýringu að finna enda stíflan losnuð. Engin niðurstaða hefur því fengist í ástæðu fyrir því að í tvígang hefur flætt skólp inn í varðveislurými safnsins á árinu.

Linda gerir grein fyrir hvar málið er statt varðandi varðveislurými safnsins eftir fund með ráðuneytinu í apríl.

Bæjarstjóri, Linda Udengard og Lúðvík Örn Steinarsson fóru á fund í Menningar- og viðskiptaráðuneytinu til að ræða framtíðar fjármögnun safnsins og húsnæðismál. Engin niðurstaða fékkst á fundinum en samtalið heldur áfram í haust.

Stjórn og forstöðumaður telja varðveislurými safnsins ekki öruggt til frambúðar aðallega vegna fjölda lagna sem liggja í gegnum rýmið. Á síðustu 7 árum hafa komið upp tveir alvarlegir lekar í kjallaranum og nú skólp upp um niðurföll. Finna þarf leið til að tryggja öruggara og rýmra húsnæði fyrir safnkostinn.