9. fundur

Hringur Hafsteinsson frá Gagarín mætir á fundinn.

Hringur Hafsteinsson frá fyrirtækinu Gagarín var gestur fundarins undir þessum lið. Hringur fór yfir aðkomu Gagarín að margmiðlunarefni Hofsstaða sem var sett upp þegar minjagarðurinn opnaði. Einnig kynnti hann starfsemi Gagarín og hugmyndafræði við vinnslu verkefna og hugmyndafræði að sk. hönnunarfasa við að endurskoða margmiðlunarefni Hofsstaða og framsetningu þess. Rætt var um vinnu við hönnunarfasann sem ætlunin er að fari af stað með vorinu.

Samantekt fyrir tónleikaröðina 2019

Greint var frá þriðju og síðustu tónleikunum í tónleikaröðinni Þriðjudagsklassík sem er haldin í samstarfi við Ingibjörgu Guðjónsdóttur listrænan stjórnanda tónleikaraðarinnar. Á tónleikunum 12. mars sl. steig tónlistarhópurinn UMBRA á svið í sal Tónlistarskóla Garðabæjar og flutti þar m.a. eigin útsetningar á íslenskum þjóðlögum.

Formaður sagði frá fundi með Ingibjörgu Guðjónsdóttur þar sem rætt var um framhald tónleikaraðarinnar og ætlunin er að gera formlegan samning þar um til næstu ára.

Upplýsingastjóri greindi frá undirbúningi við Jazzhátið Garðabæjar sem fer fram dagana 25.-27. apríl nk. og farið var yfir kynningarmál. Áfram verður unnið að undirbúningi hátíðarinnar sem er undir listrænni stjórn Sigurðar Flosasonar tónlistarmanns.

Farið yfir áframhaldandi samstarf.

Greint var frá samstarfi Garðabæjar og Wapp um skráningu og birtingu gönguleiða í Garðabæ sem eru aðgengilegar í smáforritinu og aðgengilegar almenningi. Gönguleiðirnar í Garðabæ eru í boði Garðabæjar, þ.e. hægt er að hlaða þær niður endurgjaldslaust. Farið var yfir tölur um hversu oft leiðirnar hafa verið hlaðnar niður.

Stefnt er að því að gera áframhaldandi samning um gönguleiðirnar í Garðabæ og skoðað verður með hvaða hætti hægt er að kynna þessar gönguleiðir í Wappinu betur. Göngu-, hlaupa- og hjólaleiðir og söguleiðir í Garðabæ í Wappinu hafa verið samstarfsverkefni menningar- og safnanefndar, umhverfisnefndar og íþrótta- og tómstundaráðs Garðabæjar.

Styrkumsókn Ástu Dóru Finnsdóttur vegna þátttöku í píanókeppnum lögð fram og rædd.

Umsóknin verður tekin fyrir aftur við umfjöllun um styrkveitingar úr Hvatningarsjóði ungra listamanna á fundi nefndarinnar í apríl.

Dagsetning, staður, umgjörð, heiðursviðurkenning o.fl.

Menningaruppskeruhátíð Garðabæjar verður haldin miðvikudaginn 22. maí nk. í nýja fjölnota fundarsalnum Sveinatungu á Garðatorgi. Farið var yfir hvernig fyrri hátíðir hafa farið fram. Einnig var rætt um umgjörð hátíðarinnar í ár. Umræðu verður haldið áfram á næsta fundi.

Samstarf við Bókasafn Garðabæjar um fræðslusíðdegi í Sveinatungu o.fl.

Greint var frá hugmynd Bókasafns Garðabæjar um samstarf við menningar- og safnanefnd um fyrirlestur fyrir almenning í Sveinatungu í apríl. Rætt var um hugmyndina og samþykkt að vera í samstarfi við bókasafnið þar um.

Framundan er opnun á tveimur sýningum í Hönnunarsafni Íslands. Sýningarnar Borgarlandslag og Veðurvinnustofa opna laugardaginn 23. mars í safninu og eru jafnframt hluti af HönnunarMars sem er haldinn í lok mánaðarins.

Einnig var sagt frá fyrirhugaðri leiksýningu á vegum Senuþjófsins eða leiksmiðjunnar Friggjar sem hefur haft afnot af sal á Garðatorgi í vetur. Þrjú stuttleikrit eftir Samuel Becket verða sýnd laugardaginn 30. mars nk. kl. 16 á Garðatorgi.

Myndlistarfélagið Gróska er einnig að undirbúa sumarsýningu félagsins sem verður sett upp á Garðatorgi og opnar á Sumardaginn fyrsta. Í ár heldur Gróska uppá 10 ára starfsafmæli félagsins. Jónsmessugleði Grósku sem er haldin með aðstoð Garðabæjar verður haldin fimmtudaginn 20. júní nk.

Farið var yfir starfsáætlun um næstu fundi og stefnt er að fundi með stjórn Hönnunarsafnsins í apríl.

Forstöðumaður fræðslu- og menningarsviðs greindi frá fundi með Karítas H. Gunnarsdóttur, skrifstofustjóra og Baldri Þóri Guðmundssyni sérfræðingi á skrifstofu menningarmála hjá mennta- og menningarmálaráðuneytinu þar sem m.a. var farið yfir drög að samstarfssamningi frá árinu 2016 sem byggir á undirritun samnings frá 2006 vegna starfsemi Hönnunarsafns Íslands og rætt um mögulegar útfærslur á nýjum samningi eða samningum.