7. fundur

Eiríkur Björn Björgvinsson, nýr forstöðumaður fræðslu- og menningarsviðs, lítur við á fundinum.

Eiríkur Björn Björgvinsson nýr forstöðumaður fræðslu- og menningarsviðs mætti á fundinn og kynnti sig.

Umræður voru um menningarmál almennt og menningarstarfsemi í Garðabæ.

Eiríki þakkað fyrir komuna á fundinn.

Farið yfir samþykktar fjárheimildir til menningarmála 2019.

Farið var yfir samþykkta fjárhagsáætlun á sviði menningarmála fyrir árið 2019. Sundurliðun fjárhagsáætlunar er birt á vef Garðabæjar.

Farið yfir hvernig tókst til með ljósmyndasýningu á Bókasafni Garðabæjar í desember.

Menningar- og safnanefnd Garðabæjar og Bókasafn Garðabæjar stóðu fyrir ljósmyndasýningu undir yfirskriftinni ,,Hvernig lítur Garðabær út árið 2018?" í tilefni af 100 ára afmæli fullveldis Íslands. Sýningin opnaði 18. desember sl. um leið og haldið var upp á 50 ár afmæli Bókasafns Garðabæjar.

Leitað var til bæjarbúa og annarra velunnara Garðabæjar um að senda inn ljósmyndir úr Garðabæ sem voru teknar á árinu 2018. Alls bárust um 140 myndir sem voru sýndar á skjá auk þess sem athyglisverðustu myndirnar sem fengu viðurkenningar voru prentaðar út og sýndar í safninu. Alls fengu sex ljósmyndarar viðurkenningu í flokki fullorðinna og þrír ljósmyndarar yngri en 18 ára fengu hvatningarverðlaun.

Hönnunarsafn Íslands stendur um þessar mundir fyrir áhugaverðri sýningu á Instagram síðu safnsins sem nefnist 100 ár - 100 hlutir í tilefni af aldarafmæli fullveldis Íslands.

Farið yfir hvernig tókst til á fyrstu tónleikunum og tónleikar framundan kynntir.

Tónleikaröðin Þriðjudagsklassík hófst á ný þriðjudaginn 8. janúar sl með tónleikum Maríu Magnúsdóttur núverandi bæjarlistmanni í sal Tónlistarskóla Garðabæjar. Með Maríu á tónleikunum léku þau Sara Mjöll Magnúsdóttir á píanó og Sigmar Þór Matthíasson á bassa. Farið var yfir hvernig tókst til. Tvennir tónleikar í tónleikaröðinni eru framundan þriðjudaginn 12. febrúar og þriðjudaginn 12. mars. Þetta er í sjötta sinn sem menningar- og safnanefnd stendur að tónleikaröðinni en listrænn stjórnandi frá upphafi er Ingibjörg Guðjónsdóttir. Að þessu sinni er Þriðjudagsklassík í samstarfi við KÍTÓN, félag kvenna í tónlist.

Farið yfir drög að dagskrá fyrir Safnanótt 8. febrúar nk. og Sundlauganótt 9. febrúar nk. í Garðabæ.

Vetrarhátíð verður haldin dagana 7.-10. febrúar nk. með þátttöku safna og sundlauga frá sveitarfélögum á höfuðborgarsvæðinu. Safnanótt verður haldin föstudagskvöldið 8. febrúar frá kl. 18-23 og í Garðabæ verður opið hús í Bókasafni Garðabæjar, Hönnunarsafni Íslands, Króki á Garðaholti og á Bessastöðum. Drög að dagskrá voru kynnt. Sundlauganótt verður haldin laugardagskvöldið 9. febrúar og að þessu sinni tekur Ásgarðslaug þátt með dagskrá frá 17-22.

Dagskráin verður kynnt með dreifibréf í hús til íbúa og með auglýsingu og umfjöllun í Garðapóstinn. Auk þess er dagskráin kynnt á vef Garðabæjar, fésbókarsíðu bæjarins og safnanna og á vef vetrarhátíðar, vetrarhatid.is.

Farið yfir dagsetningar o.fl. tengt Jazzhátíð í apríl.

Jazzhátíð Garðabæjar verður haldin í fjórtánda sinn í vor með upphaf að kvöldi til á Sumardaginn fyrsta, 25. apríl nk. Byrjað er að huga að dagskrá sem verður kynnt á næsta fundi menningar- og safnanefndar. Listrænn stjórnandi er sem fyrr Sigurður Flosason tónlistarmaður.

Farið yfir núgildandi reglur og rætt um auglýsingu í vor.

Farið var yfir reglur um Hvatningarsjóð ungra listamanna og hvernig úthlutun hefur farið fram á síðustu árum. Stefnt er að því að auglýsa eftir umsóknum í mars og tilkynnt verður um úthlutun úr hvatningarsjóðnum á menningaruppskeruhátíð í maí.

Farið yfir önnur verkefni framundan á árinu, s.s. fræðslu- og sögugöngur o.fl.

Starfsáætlun nefndarinnar fyrir vorið lögð fram og rædd.

Farið var yfir verkefni framundan og m.a. rætt um fræðslu- og sögugöngur, endurskoðun margmiðlunarefnis við minjagarðinn á Hofsstöðum, áfram verður unnið að skráningu listaverka, áframhald vinnu út frá skýrslu starfshóps um menningar og fræðahús, rætt var um möguleika á því að vera með matarhátíð o.fl.