2. fundur

Lögð fram tillaga að breytingu Aðalskipulags Garðabæjar 2016-2030 sem nær til stígakerfis.

Vísað til úrvinnslu hjá umhverfissviði.

Dagný Bjarnadóttir gerði grein fyrir tillögu að deiliskipulagi Gálgahrauns og þeim forsendum sem lagðar eru til grundvallar.

Tillagan hefur verið löguð að tillögu að breytingu Aðalskipulags Garðabæjar 2016-2030 sem nær til stígakerfis.

Vísað til úrvinnslu hjá umhverfissviði.

Lögð fram tillaga að breytingu Aðalskipulags Garðabæjar 2016-2030, rammahluta Vífilsstaðalands sem nær til háholts Hnorðraholts.

Tillagan gerir ráð fyrir eftirfarandi breytingum: Tákn fyrir svæði fyrir samfélagsþjónustu (4.05 S leikskóli) á háholti Hnoðraholts er fellt út. Iðnaðarsvæði (4.22 I, hitaveitutankar) á háholti Hnoðraholts er fellt út. Gert verður ráð fyrir svæði fyrir samfélagsþjónustu (4.22 S) þar sem núgildandi skipulag gerir ráð fyrir hitaveitutönkum. Þar sem að fyrir liggur að Veitur telja ekki þörf á að gera ráð fyrir svæði efst á holtinu fyrir hitaveitutanka gefst færi á að staðsetja leikskóla á stað sem hefur kosti umfram þann stað sem núgildandi deiliskipulag gerir ráð fyrir. Lögun og stærð landnotkunarreitanna (4.04.Íb) og (4.18 Op) breytist lítillega.

Tillagan var auglýst samhliða tillögu að deiliskipulagi háholts Hnoðraholts og tillögu að breytingu á deiliskipulagi Hnoðraholts norður.

Athugasemdir og umsagnir gefa ekki tilefni til breytinga á tillögunni.

Tillagan samþykkt óbreytt sem breyting á Aðalskipulagi Garðabæjar 2016-2030 í samræmi við 2. mgr. 32. gr. skipulagslaga nr. 123/2010.

Lögð fram tillaga að deiliskipulagi Hnoðraholts suður, háholts að lokinni auglýsingu og skoðun umhverfissviðs og skipulagsráðgjafa ásamt þeim athugasemdum og umsögnum sem borist hafa.

Eftirfarandi breytingar hafa verið gerðar á tillögunni:

Einnar hæðar raðhús verða 18 í stað 11.

Tveggja hæða raðhús verða 22 í stað 30.

Parhús er fellt út úr tillögu.

Íbúðareiningar verða 75 í stað 77.

Gert er ráð fyrir staðsetningu dreifistöðvar rafmagns eins og minnst er á í umsögn Veitna.

Ýmsar minniháttar lagfæringar gerðar á greinargerð að tillögu umhverfissviðs og skipulagsráðgjafa.

Með breytingum á gerðum raðhúsa er komið til móts við athugasemdir sem borist hafa.

Skipulagsnefnd samþykkir tillöguna með ofangreindum breytingum í samræmi við 41. gr. skipulagslaga nr. 123/2010.

Lögð fram tillaga að breytingu deiliskipulags Hnoðraholts norður að lokinni auglýsingu. Tillagan gerir ráð fyrir því að lóðir fyrir búsetukjarna og leikskóla verði felldar út enda gerir tillaga að deiliskipulagi Hnoðraholts suður, háholt ráð fyrir sömu lóðum á öðrum stað. Afmörkun deiliskipulagssvæðis hefur verið felld að afmörkun tillögu að deiliskipulagi Hnoðraholts suður, háholt.

Skipulagsnefnd samþykkir tillöguna sem breytingu á deiliskipulagi Hnoðraholts norður í samræmi við 41. gr. skipulagslaga nr. 123/2010.

Lögð fram tillaga að breytingu deiliskipulags Miðbæjar, svæði I og II að lokinni auglýsingu ásamt þeim athugasemdum og umsögnum sem borist hafa. Lögð fram greinargerð umhverfissviðs þar sem athugasemdir hafa verið flokkaðar eftir efnisatriðum.

Skipulagsnefnd vísar tillögunni til úrvinnslu á umhverfissviði.

Lögð fram tillaga að endurskoðuðu deiliskipulagi Móa að lokinni auglýsingu ásamt þeim athugasemdum og umsögnum sem borist hafa. Lögð fram greinargerð umhverfissviðs þar sem athugasemdir hafa verið flokkaðar eftir efnisatriðum.

Skipulagsnefnd vísar tillögunni til úrvinnslu á umhverfissviði.

Lögð fram fyrirspurn um gerð hljóðmanar austan Kumlamýrar meðfram Álftanesvegi ásamt umsögn deiliskipulagshöfundar.

Skipulagsnefnd telur skynsamlegt að framlengja hljóðmön til suðurs eins og lagt er til í fyrirspurn og í umsögn deiliskipulagshöfundar. Hún liggi þó vestanmegin gömlu sveitarfélagsmarkanna.

Vísað til umhverfissviðs að koma með tillögu að útfærslu. Skipulagsnefnd felur skipulagsstjóra að sjá til þess að breyting deiliskipulags hljóti ferli í samræmi við heimildir embættisins.

Lögð fram tillaga að breytingu deiliskipulags Garðahrauns sem nær til lóðarinnar Garðprýði 1 að lokinni auglýsingu ásamt þeim athugasemdum og umsögnum sem borist hafa. Einnig lagt fram erindi lögmanns umsækjanda þar sem brugðist er við þeim athugasemdum sem borist hafa.

Skipulagsnefnd telur að sjónarmið beggja aðila liggi ljóst fyrir og að andmælaréttur hafi verið virtur á báða bóga.

Í greinargerð deiliskipulags Garðahrauns eru sett fram markmið deiliskipulagsins. Þar segir í kafla 1.5. "Þar sem framkvæmdir eru heimilar samkvæmt skipulaginu er lögð rík áhersla á að halda sem best sérkennum svæðisins og vernda hraumyndanir eftir því sem nokkur kostur er." Enn fremur segir í kafla 2.1.2. um nýtingarhlutfall: "Stærðin takmarkast fyrst of fremst af mikilvægum umhverfisþáttum hverrar lóðar og er ekki sjálfgefið að þessi rýmilegu mörk (þ.e. uppgefið nýtingarhlutfall) gildi í öllum tilfellum."

Í kafla 1.5. er vikið að þeim möguleika að skipta lóðum upp: "Gert er ráð fyrir þeim möguleika að lóðum Hrauns og Hrauntungu verði skipt í smærri lóðir, með sambærilegu skipulagi og hér er fjallað um". Ljóst er að ekki var horft til möguleika að lóð Hraungarða (Garðprýði 1) yrði skipt upp, skv. greinargerð deiliskipulagsins.

Lóðin Garðprýði 1 er stærsta lóðin innan skipulagssvæðsins sem hefur verið skipulögð og stærri hluti hennar, allt að tveir þriðju, er skilgreindur sem svæði með hraunmyndunum sem taka þurfi tillit til við staðsetningu og útfærslu húss og lóðar. Það skýrist af því hve hraunmyndanir á lóðinni þar eru miklar og sérkennilegar og hafa áhrif á umhverfisgæði aðliggjandi húsa.

Viðbrögð eigenda aðliggjandi lóða hafa verið mjög afdráttarlaus og hafa þeir gengið út frá því að þeir myndu njóta þeirra gæða sem í hraunmyndununum felast til frambúðar. Þeim hefur verið bent á að byggingarreitur sá sem nú er til staðar hefði minnkað umtalsvert samkvæmt tillögunni þó svo að lóðinni yrði skipt í tvær lóðir. Afstaða eigenda aðliggjandi lóða er óbreytt, þó svo að síðari tillagan sem grenndarkynnt var geri ráð fyrir húsi á öðrum stað sem liggur neðar í lóðinni. Í svo viðkvæmu umhverfi þar sem áhersla er lögð á að varðveita náttúruleg sérkenni landslags er mikilvægt að sátt náist um framkvæmdir sem hafa árhrif á þau gæði sem leitast er við að varðveita. Skipulagsnefnd telur að framlagðar tillögur hafi ekki náð fram því markmiði og sé fullreynt að reyna að skapa sátt um þær.

Í ljósi ofangreindra atriða hafnar skipulagsnefnd grenndarkynntri tillögu.

Lögð fram tillaga að umsókn um byggingarleyfi sem vísað var til kynningar hjá nágrönnum ásamt þeim athugasemdum sem gerðar voru. Sú breyting hefur verið gerð á tillögunni að viðbygging austan við bílageymslu er 50 cm frá lóðarmörkum.

Skipulagsnefnd leggur til að breyting verði gerð á áður grenndarkynntri tillögu að óverulegri breytingu deiliskipulags sem gerir ráð fyrir því að byggingarreitur verði 50 cm frá lóðarmörkum.

Skipulagsnefnd gerir ekki athugasemd við að skipulagsstjóri leiði málið til lykta samkvæmt þeim heimildum sem embættið hefur um meðferð skipulagstillagna.

Lagt fram erindi foreldraráðs Lundabóls um öryggismál á bílaplani við leikskólann Lundaból.

Erindi vísað til umhverfissviðs til skoðunar.

Lögð fram tillaga að óverulegri breytingu á deiliskipulagi Hnoðraholts norður sem nær til lóðarinnar Hrísholts 1 ásamt athugasemdum sem bárust við grenndarkynningu. Sjónarmið lóðarhafa lögð fram.

Máli vísað til úrvinnslu á umhverfissviði.

Lögð fram fyrirspurn lóðarhafa um útfærslu á bílskýli á bílastæði lóðarinnar að götu. Lagt fram minnsiblað deiliskipulagshöfundar.

Svar: Skipulagsnefnd telur að bílskýli á þessum stað skerði útsýni frá aðliggjandi lóðum og myndi auk þess veita óæskilegt fordæmi.

Svar við fyrirspurn er því neikvætt.

Lögð fram tillaga að breytingu á Aðalskipulagi Hafnarfjarðar, vegna rannsóknarborholna í Krýsuvík. Tillagan er í auglýsingu.

Skipulagsnefnd Garðabæjar gerir ekki athugasemd við tillöguna.

Lögð fram tillaga að deiliskipulagi, vegna rannsóknarborholna í Krýsuvík. Svæðið sem tillagan nær til er vestan Krýsuvíkurvegar nyrst í lögsögu Hafnarfjarðar í Krýsuvík og er innan Reykjanesfólkvangs. Tillagan er í auglýsingu.

Skipulagsnefnd Garðabæjar gerir ekki athugasemd við tillöguna.