Samningur við ráðgjafa varðandi mótun tillagna að rammahluta aðalskipulags fyrir þróunarsvæði A.

Bæjarráð samþykkir samning við Eflu hf. og Arkþing/Nordic ehf um skipulagsráðgjöf á þróunarsvæði A vegna rammahluta aðalskipulags.

Auglýst var eftir ráðgjöfum til að vinna að gerð rammahluta aðalskipulags á þróunarsvæði A og byggir val á ráðgjöfum á niðurstöðu matshóps sem staðfest var á fundi bæjarráðs 14. desember 2021.

Skipulagsstjóri gerði grein fyrir niðurstöðu matshóps um val á ráðgjöfum vegna skipulagsmótunar á Þróunarsvæði A og Hafnarfjarðarvegar á milli bæjarmarka.
Bæjarstjórn hefur samþykkt tillögu matshóps um að gengið verði til samninga við ráðgjafateymi Arkþing/Nordic og Eflu um verkefnið.
Skipulagsnefnd fagnar niðurstöðunni og þakkar öllum þátttakendum fyrir sýndan áhuga.

Bæjarstjórn samþykkir niðurstöðu matshóps um að leita samninga við ráðgjafateymi sem skipað er ráðgjöfum frá Arkþing/Nordic og Eflu verfræðistofu til að vinna að skipulagi þróunarsvæðis A og Hafnarfjarðarvegar. (Mál nr. 2103060)

Bæjarstjóri gerði grein fyrir minnisblaði matshóps sem skipaður var fimm fulltrúum, fjórum frá Garðabæ auk utanaðkomandi ráðgjafa. Í hópnum sátu Arinbjörn Vilhjálmsson skipulagsstjóri, Guðbjörg Brá Gísladóttir deildarstjóri umhverfis og framkvæmda, Gunnar Einarsson bæjarstjóri, Sólveig H. Jóhannsdóttir skipulagsfræðingur og Svanhildur Gunnlaugsdóttir landslagsarkitekt hjá Landform ehf á Selfossi.

Bæjarráð samþykkir að leggja til við bæjarstjórn að samþykkja niðurstöðu matshópsins um að leita samninga við ráðgjafateymi sem skipað er ráðgjöfum frá Arkþing/Nordic og Eflu verfræðistofu til að vinna að skipulagi þróunarsvæðis A og Hafnarfjarðarvegar

Á fundi bæjarráðs undir þessum dagskrárlið voru Arinbjörn Vilhjálmsson skipulagsstjóri, Guðbjörg Brá Gísladóttir deildarstjóri umhverfis og framkvæmda, Sólveig H. Jóhannsdóttir skipulagsfræðingur.

Fylgiskjöl

• Til bæjarráðs

Upplýst var að alls bárust umsóknir frá fimm ráðgjafateymum vegna vinnu við gerð rammahluta aðalskipulags og deiliskipulag fyrir þróunarsvæði A.

Yrki- arkitektar, VSÓ - ráðgjöf, VSB, verkfræðistofa, Felixx
Arkþing/Nordic og Efla.
Landmótun, HJARK Hulda Jóns Arkitektúr, SaStudio, Verkfræðastofa Bjarna Viðarssonar, Teknik
Verkís
Mannvit, Arkís, Landslag.

Við mat á ráðgjöfum verður m.a. horft til fjölbreytileika teyma, reynslu við skipulagsgerð og samgöngulausnir sem og reynslu við verkefnastjórnun og teymisvinnu í umfangsmiklum verkefnum. Lagt verður mat á innsendar umsóknir sem gildir 80% og kynningu ráðgjafa sem gildir 20% en í kynningunni hafa ráðgjafar tök á að segja frá nálgun sinni á verkefninu og svara spurningum matshóps. Í matshóp sitja Gunnar Einarsson, bæjarstjóri, Arinbjörn Vilhjálmsson, skipulagsstjóri, Guðbjörg Brá Gísladóttir, deildarstjóri, Sólveig H. Jóhannsdóttir, skipulagsfræðingur og Svanhildur Gunnlaugsdóttir, landslagsarkitekt.

Bæjarráð samþykkir skipan matshóps.

Tillaga um val á ráðgjafateymi verður lögð fram til afgreiðslu í bæjarráði.

Lögð fram tillaga sem samþykkt hefur verið í bæjarstjórn um tilhögun á vali á ráðgjöfum vegna breytinga á aðalskipulagi og deiliskipulagi á Þróunarsvæði A í aðalskipulagi auk Hafnarfjarðarvegar á milli bæjarmarka.
Skipulagsnefnd leggur til að skipulagsvinnan nái einnig til fyrirhugaðrar framlengingar Álftanesvegar frá Engidal að Reykjanesbraut um Molduhraun.

Bæjarráð samþykkir tillögu um að auglýsa eftir ráðgjöfum til að vinna að gerð rammahluta aðalskipulags og deiliskipulagsáætlana fyrir þróunarsvæði A ásamt Hafnarfjarðarvegi milli bæjarmarka.

Sigurður Guðmundsson gerði grein fyrir tillögu sinni sem samþykkt hefur verið í bæjarstjórn:
"Bæjarstjórn samþykkir að hafin verði skipulagsvinna á rammahluta aðalskipulags fyrir þróunarsvæði A, Lyngás, Miðbær og Hafnarfjarðarvegur, sem skilgreint er í Aðalskipulagi Garðabæjar 2016-2030. Þá verði samhliða hafin vinna við deiliskipulag fyrir Álftanesveginn frá Engidal að Reykjanesbraut."
Greinargerð:
Árið 2016 var haldin hugmyndasamkeppni um rammaskipulag svæðisins við Hafnarfjarðarveg. Höfundar vinningstillögunnar voru Batteríið, Landslag og Mannvit sem unnu tillöguna áfram og var að lokum samþykkt sem rammaskipulag árið 2017.
Í gildandi Aðalskipulagi Garðabæjar 2016-2030 er svæðið skilgreint sem þróunarsvæði A. Í svæðisskipulagi höfuðborgarsvæðisins, Höfuðborgarsvæðið 2040, er svæðið skilgreint sem bæjarkjarni þar sem gert er ráð fyrir einni biðstöð borgarlínu.
-Bæjarkjarni í svæðisskipulagi er skilgreindur sem svæði með fjölbreyttri starfsemi; þjónustufyrirtæki, verslanir, skrifstofur og afþreying sem þjónar heilu sveitarfélagi eða hverfishluta. Gera skal ráð fyrir a.m.k. einni stoppistöð hágæðakerfis almenningssamgangna, Borgarlínu, og góðu aðgengi að strætisvagnaleiðum. Þéttleiki er mikill. Íbúðarhúsnæði þarf að vera fjölbreytt að gerð og eignarhaldi, ávallt skal hluti íbúða vera á viðráðanlegu verði. Gott aðgengi að almenningsgörðum og góðum almenningsrýmum og/eða náttúruríkum svæðum. Göngu- og hjólavænt umhverfi sem er skjólgott, gleður augað og hvetur til útiveru.
-Borgarlínan er hágæða almenningssamgangnakerfi sem mun aka að mestu í sérrými og hafa forgang á gatnamótum. Þannig styttist ferðatími og tíðni ferða eykst. Borgarlínunni má líkja við slagæð sem flytur fólk á greiðan og öruggan máta eftir helstu samgöngu- og þróunarásum höfuðborgarsvæðisins. Borgarlínan og Strætó verða tvinnuð saman í heildstæðu, hágæða leiðaneti en auk þess verður áhersla lögð á að borgarlínustöðvar séu vel tengdar hjóla- og göngustígum.
Svæðið er vel staðsett, það er í nálægð við grunnþjónustu sveitarfélagsins s.s. grunnskóla, leikskóla og íþróttasvæði. Stutt er í opin svæði og leiksvæði ásamt því að vera í mikilli nálægð við stofnæðar og almenningssamgöngur. Mikilvægt er að áhersla verði á blandaða byggð, gæði borgarrýmis og mannlífs og borgarlínu í skipulagsvinnunni.
Lagt er til að hafin verði vinna á tækni- og umhverfissviði að undirbúa skipulagsvinnu á rammahluta aðalskipulags á þróunarsvæði A, Lyngás, Miðbær og Hafnarfjarðarvegur. Þar sem lögð verður fram tillaga að skipulagslýsingu fyrir rammahluta aðalskipulags á þróunarsvæði A þar sem m.a. verður áhersla á blandaða byggð, gæði borgarrýmis og mannlífs auk borgarlínu í tengslum við flutning Hafnarfjarðarvegar í stokk. Jafnframt verði lögð fram tillaga að skipulagslýsingu vegna deiliskipulags fyrir Álftanesveginn frá Engidal að Reykjanesbraut.
Skipulagsvinnuna þarf að vinna í samvinnu við SSH, verkefnastofu Borgarlínu, Vegagerðina, Betri samgöngur ohf. og Hafnarfjarðabæ, auk þess sem íbúar Garðabæjar munu koma að skipulagsvinnslunni í samræmi við skipulagslög.
Skipulagsnefnd tekur undir bókun bæjarstjórnar og vísar málinu til undirbúnings hjá tækni-og umhverfissviði.
Baldur Ó. Svavarsson lagði fram eftirfarandi bókun:
"Undirritaður fagnar framkominni tillögu og mikilvægu skrefi í átt að þéttingar byggðar við Borgagarlínu. Furða mig hins vegar á ferli málsins sem ekkert hefur komið til umræðu í nefndinni sl. 2 ár, en birtist nú skyndilega sem tillaga í bæjarstjórn. Að öllu eðlilegu hefði Skipulagsnefnd átt að vera fyrsti viðkomustaður til kynningar og umræðu og þaðan vísað til bæjarstjórnar. Nema að það sé ásetningur meirihlutans líkt og kanski verið hefur að skipulagsnefnd bæjarins verði aðeins formlegur viðkomustaður tilagna og gæluverkefna merihlutans til samþykktar þegar hentar.
Þá er einnig sérstakt við framsetningu þessarar tillögu að samdægurs kynnir meirhlutinn með klukkustundar fyrirlestri í bæjarráði, sérstakt gæluverkefni þ.e. Garðahverfisskipulagið og að úthlutun hefjist á lóðum þar, í einhverju dreifbýlasta skipulagssvæði norðan Alpafjalla. 30 íbúðir á 80 hektra, dreift nær skipulagslaust um túnin þar. Skipulag sem aldrei mun nást að fylgja eftir sem því Disneylandi fortíðar sem þarna er stefnt að. Á þessum hluta Garðaholts mætti með hæfilega þéttri byggð, koma fyrir a.m.k. 1000-1500 íbúðum eða um 100-150.000 byggðum fermetrum (miðað við t.d. 100 m² pr. íbúðareiningu) . Ef við gefum okkur að byggingaréttur væri þarna seldur á segjum 50 þús. kr. /m² líkt og t.a.m. í Urriðaholti, er hér um 6-7 milljarða verðmæti að ræða ! Dyggði bæjaryfirvöldum nokkurn veginn fyrir knatthúsinu góða og eins og einum grunnskóla fyrir afganginn. Notabene bærinn fékk þetta land nær gefins frá ríkinu. Hér er ekki aðeins verið að fórna einstöku byggingarlandi fyrir okkur bæjarbúa með einstökum möguleikum til þéttingar byggðar þar sem risið gæti risið allt að 5-6000 mann sjálfbær byggðakjarni á Holtinu öllu. Heldur einnig skv. framansögðu er þar fórnað gríðarlegum verðmætum okkar Garðbæinga á altari fortíðarblætis og sérhagsmuna.
Fulltrúi G-lista Garðbæjarlistans í skipulagsnefnd."

Sigurður Guðmundsson lagði fram eftirfarandi bókun f.h. Meirihluta Sjálfstæðisflokks í skipulagsnefnd:

"Það er vægast sagt sérstakt að koma með bókun sem þessa. Mál koma ýmist fyrst fram í skipulagsnefnd eða eru send skipulagsnefnd frá bæjarstjórn. Þetta er svipað og að gera athugasemd eftir mark í íþróttaleik vegna þess að boltin hafi borist fyrir frá vinstri en ekki hægri. Skipulagsnefnd hefur lögformlegan tilgang samkvæmt skipulagslögum og þar eru öll skipulagsmál í sveitarfélaginu unnin, skipulagsmál eru ekki og verða aldrei gæluverkefni og er svona rakalausri þvælu vísað til föðurhúsana.
Þá er það með eindæmum ósmekklegt að gera athugasemdir við það að skipulagsáætlanir sem samþykktar hafi verið í sveitarfélaginu séu kynntar kjörnum fulltrúum, en líklega vill minnihluti Garðabæjarlistans lifa í myrkrinu óupplýstir um flest mál og fer það þvert gegn meintum ásetningi þeirra um opin og lýðræðisleg vinnubrögð. Það var af fyrirhyggju sem meirihluti sjálfstæðismanna stóð að kaupum á landi Garðaholts fyrir u.þ.b. 50 milljónir árið 1992. Garðaholtið er um 410 hektarar og þar af er Garðahverfið um 79 hektarar. Það má að sjálfsögðu verðmeta hvern fermetra lands í Garðabæ með tilliti til sölu byggingarréttar og verða ríkur. Verðmæti fyrir bæjarbúa snúast ekki síður um að búa í nálægð við opin svæði þannig að lífsgæða verði sem best notið, opin svæði auka lífsgæði og verðmæti þeirra eigna sem þó eru byggðar á hverjum tíma. Dýrustu byggingar í London og New York eru við Hyde Park og Central Park. Seltjarnarnes sem hefur takmarkað byggingarland hefur lagt áherslu á að halda í opnu svæðin á Gróttu, á Vestursvæðinu þar eru u.þ.b 50 hektarar undir opin svæði.
Þá skýtur það ákaflega skökku við að vísa til einhverra meintra sérhagsmuna í bókuninni, enda ekki gerð minnsta tilraun til að undirbyggja slíka makalausa staðhæfinu. Fulltrúar Sjálfstæðisflokksins, hafa í nefndarstörfum bæjarins, bæjarráði og bæjarstjórn haft hagsmuni bæjarins og allra bæjarbúa að leiðarljósi. Það mun verða gert hér eftir, sem hingað til."

Sigurður Guðmundsson, kvaddi sér hljóðs og lagði fram eftirfarandi tillögu:

"Bæjarstjórn samþykkir að hafin verði skipulagsvinna á rammahluta aðalskipulags fyrir þróunarsvæði A, Lyngás, Miðbær og Hafnarfjarðarvegur, sem skilgreint er í Aðalskipulagi Garðabæjar 2016-2030. Þá verði samhliða hafin vinna við deiliskipulag fyrir Álftanesveginn frá Engidal að Reykjanesbraut."

Greinargerð:
Árið 2016 var haldin hugmyndasamkeppni um rammaskipulag svæðisins við Hafnarfjarðarveg. Höfundar vinningstillögunnar voru Batteríið, Landslag og Mannvit sem unnu tillöguna áfram og var að lokum samþykkt sem rammaskipulag árið 2017.
Í gildandi Aðalskipulagi Garðabæjar 2016-2030 er svæðið skilgreint sem þróunarsvæði A. Í svæðisskipulagi höfuðborgarsvæðisins, Höfuðborgarsvæðið 2040, er svæðið skilgreint sem bæjarkjarni þar sem gert er ráð fyrir einni biðstöð borgarlínu.
* Bæjarkjarni í svæðisskipulagi er skilgreindur sem svæði með fjölbreyttri starfsemi; þjónustufyrirtæki, verslanir, skrifstofur og afþreying sem þjónar heilu sveitarfélagi eða hverfishluta. Gera skal ráð fyrir a.m.k. einni stoppistöð hágæðakerfis almenningssamgangna, Borgarlínu, og góðu aðgengi að strætisvagnaleiðum. Þéttleiki er mikill. Íbúðarhúsnæði þarf að vera fjölbreytt að gerð og eignarhaldi, ávallt skal hluti íbúða vera á viðráðanlegu verði. Gott aðgengi að almenningsgörðum og góðum almenningsrýmum og/eða náttúruríkum svæðum. Göngu- og hjólavænt umhverfi sem er skjólgott, gleður augað og hvetur til útiveru.
* Borgarlínan er hágæða almenningssamgangnakerfi sem mun aka að mestu í sérrými og hafa forgang á gatnamótum. Þannig styttist ferðatími og tíðni ferða eykst. Borgarlínunni má líkja við slagæð sem flytur fólk á greiðan og öruggan máta eftir helstu samgöngu- og þróunarásum höfuðborgarsvæðisins. Borgarlínan og Strætó verða tvinnuð saman í heildstæðu, hágæða leiðaneti en auk þess verður áhersla lögð á að borgarlínustöðvar séu vel tengdar hjóla- og göngustígum.
Svæðið er vel staðsett, það er í nálægð við grunnþjónustu sveitarfélagsins s.s. grunnskóla, leikskóla og íþróttasvæði. Stutt er í opin svæði og leiksvæði ásamt því að vera í mikilli nálægð við stofnæðar og almenningssamgöngur. Mikilvægt er að áhersla verði á blandaða byggð, gæði borgarrýmis og mannlífs og borgarlínu í skipulagsvinnunni.
Lagt er til að hafin verði vinna á tækni- og umhverfissviði að undirbúa skipulagsvinnu á rammahluta aðalskipulags á þróunarsvæði A, Lyngás, Miðbær og Hafnarfjarðarvegur. Þar sem lögð verður fram tillaga að skipulagslýsingu fyrir rammahluta aðalskipulags á þróunarsvæði A þar sem m.a. verður áhersla á blandaða byggð, gæði borgarrýmis og mannlífs auk borgarlínu í tengslum við flutning Hafnarfjarðarvegar í stokk. Jafnframt verði lögð fram tillaga að skipulagslýsingu vegna deiliskipulags fyrir Álftanesveginn frá Engidal að Reykjanesbraut.
Skipulagsvinnuna þarf að vinna í samvinnu við SSH, verkefnastofu Borgarlínu, Vegagerðina, Betri samgöngur ohf. og Hafnarfjarðabæ, auk þess sem íbúar Garðabæjar munu koma að skipulagsvinnslunni í samræmi við skipulagslög.

Ingvar Arnarsson, tók til máls um framkomna tillögu og lagði fram eftirfarandi bókun:

„Við í Garðabæjarlistanum fögnum þessari tillögu og teljum þetta mikilvægt skref sem hefði mátt byrja að vinna mun fyrr. Við gerum jafnframt athugasemdir við hversu lítið hefur verið fjallað um vinningstillöguna frá árinu 2016 og hversu litla aðkomu skipulagsnefnd hefur haft við gerð þessarar tillögu sem hér er lögð fram. Þ.a.l leggjum við til að tillögunni verði vísað til skipulagsnefndar.“

Sigurður Guðmundsson, tók til máls um framkomna tillögu og framlagða bókun.

Gunnar Valur Gíslason, tók til máls um framkomna tillögu og framlagða bókun.

Bæjarstjórn samþykkir samhljóða framkomna tillögu.