19. fundur

Staða menningarfulltrúa var auglýst í janúar og nú er verið að vinna úr umsóknum. Eiríkur Björn Björgvinsson, forstöðumaður fræðslu- og menningarsviðs, greindi frá ferli við ráðningu í starf menningarfulltrúa.

Farið yfir hvernig tókst til á safnanótt og sundlauganótt í Garðabæ.

Greint var frá hvernig til tókst á Vetrarhátíð en Garðabær tók þátt með dagskrá á Safnanótt föstudaginn 7. febrúar og á Sundlauganótt sunnudaginn 9. febrúar sl. Góð aðsókn var í söfnin í Garðabæ sem tóku þátt, Bókasafn Garðabæjar, Hönnunarsafn Íslands og Krók. Einnig var góð aðsókn á forsetasetrið á Bessastöðum á Safnanótt. Einstaklega góð aðsókn var í Álftaneslaug á Sundlauganótt sem að þessu sinni var á sunnudagskvöldi og þar var m.a. boðið upp á vel heppnað tónlistaratriði með hljómsveitinni Hipsumhaps sem á uppruna sinn á Álftanesi.

Farið yfir drög að dagskrá.

Farið var yfir drög að dagskrá fyrir tónleikaröðina Þriðjudagsklassík sem verður haldin nú á vorönn í sal Tónlistarskóla Garðabæjar. Sú breyting hefur orðið á dagskránni að fyrstu tónleikarnir færast aftar og dagsetningar sem miðað er við eru á eftirfarandi þriðjudagskvöldum: 24. mars, 21. apríl og 19. maí 2020. Tónleikaröðin verður kynnt með auglýsingum í Garðapóstinum, á samfélagsmiðlum og á vef Garðabæjar.

Farið yfir fyrstu drög að dagskrá.

Jazzhátíð Garðabæjar verður haldin dagana 23.-26. apríl nk. Dagskrá er í vinnslu en fyrirhugað er að vera áfram með unga tónlistarmenn úr Tónlistarskóla Garðabæjar sem hita upp fyrir kvöldtónleika sem og að hafa vortónleika Big band Tónlistarskóla Garðabæjar sem hluta af hátíðinni og í tengslum við Listadaga barna og ungmenna í Garðabæ. Endanleg dagskrá verður send til nefndarmanna þegar hún liggur fyrir.

Samþykkt var að auglýsa eftir umsóknum í Hvatningarsjóð ungra listamanna í mars og miðað við að umsóknir verði til umfjöllunar á fundi nefndarinnar í apríl. Tilkynnt verður um úthlutun úr Hvatningarsjóði ungra listamanna á menningaruppskeruhátíð Garðabæjar í lok maí.

Farið yfir reglur um bæjarlistamann, auglýsingu o.fl.

Reglur um bæjarlistamann Garðabæjar lagðar fram. Samþykkt að auglýsa eftir ábendingum um bæjarlistamann Garðabæjar í mars og ábendingar verða teknar fyrir á fundi nefndarinnar í apríl. Tilkynnt verður um val á nýjum bæjarlistamanni Garðabæjar á menningaruppskeruhátíð Garðabæjar í lok maí.

Umfjöllun um listadaga barna og ungmenna sem verða haldnir í lok apríl 2020.

Listadagar barna og ungmenna eru haldnir í níunda sinn dagana 23.apríl- 3. maí nk. Undirþema listadaganna er tengt við Barnasáttmálann. Listadagarnir eru haldnir með þátttöku leik- og grunnskóla, Tónlistarskóla sem og söfnum bæjarins. Greint var frá hvernig dagskrá hefur verið á undanförnum listadögum og uppleggið verður með svipuðum hætti í ár.

Upplýsingastjóri greindi frá hugmynd um samstarf við sóknir í Garðabæ og Hafnarfirði í tengslum við sumarmessur í Garðakirkju og sumaropnun í Króki á sunnudögum í sumar. Sóknirnar standa sameiginlega að sumarmessunum og ætlunin er að höfða til ferðamanna sem og heimamanna og skoða möguleika á menningarupplifun sem og útiveru í umhverfi Garðahverfis fyrir og eftir messu.

Menningar- og safnanefnd tekur jákvætt í þessa hugmynd sem felur m.a. í sér að færa til opnun í Króki á sunnudögum þannig að fleiri fái tækifæri til að heimsækja og skoða Krók. Upplýsingastjóra var falið að útfæra þetta nánar.