11. (2112). fundur

Á fund bæjarráðs komu Jón Viðar Matthíasson, slökkviliðstjóri og framkvæmdastjóri almannavarnanefndar á höfuðborgarsvæðinu og Þóra Ásgeirsdóttir, deildarstjóri almannavarna á höfuðborgarsvæðinu.

Deildarstjóri almannavarna fór yfir hlutverk og ábyrgð almannavarna á höfuðborgarsvæðinu. Sérstaklega var gerð grein fyrir hlutverkum neyðarstjórna sveitarfélaganna.

Slökkviliðsstjóri fór yfir stöðu og þróun mála hjá Slökkviliði höfuðborgarsvæðisins undanfarin ár.

Á fund bæjarráðs kom Lúðvík Hjalti Jónsson, fjármálastjóri og gerði grein fyrir tillögu um lántöku hjá Lánasjóði sveitarfélaga samtals að fjárhæð kr. 1.000.000.000. Um er að ræða skammtímalán með gjalddaga 18. september 2024, óverðtryggt með 11,32% vöxtum.

Bæjarráð vísar afgreiðslu málsins til bæjarstjórnar.

Bæjarráð samþykkir afgreiðslu byggingarfulltrúa að veita Krakatindi ehf., kt. 561213-0460, leyfi til að byggja viðbótarhæð að hluta og gera breytingar á núverandi atvinnuhúsnæði við Gilsbúð 9.

Bæjarráð samþykkir að leggja til við bæjarstjórn að samþykkja tillögu skipulagsnefndar um óverulega breytingu á deiliskipulagi Hnoðraholts norður er varðar lóðirnar við Útholt 5-9, sbr. 2. mgr. 43. gr. skipulagslaga nr. 123/2010. Breytingin felst í því að byggingarreitur miðlóðar minnkar og byggingarreitir endalóða stækka sem því nemur.

Skipulagsnefnd samþykkir samkvæmt í heimild í 2. ml. 3. mgr. 44. gr. skipulagslaga að falla frá grenndarkynningu þar sem breyting á deiliskipulagi varðar ekki hagsmuni annarra en sveitarfélagsins og umsækjanda/lóðarhafa.

Bæjarráð samþykkir að leggja til við bæjarstjórn að samþykkja tillögu skipulagsnefndar að auglýsa samkvæmt 1. mgr. 31. gr. skipulagslaga nr. 123/2010, sbr. 1. mgr. 41. gr. sömu laga tillögu að breytingu á deiliskipulagi Breiðumýrar. Tillagan gerir ráð fyrir að hámarksfjöldi íbúða aukist úr 84 í 102.

Bæjarráð samþykkir að leggja til við bæjarstjórn að samþykkja tillögu skipulagsnefndar um að veita framkvæmdaleyfi samkvæmt 13. gr. skipulagslaga nr. 123/2010 fyrir efnislosun í Glerhallardýi. Um er að ræða losun til bráðabirgða fyrir allt að 30.600 m3 af jarðvegi þar til deiliskipulag Norðurness liggur fyrir. Samkvæmt aðalskipulagi er umrætt svæði og aðliggjandi svæði ætluð undir golfvöll og mun efnið þá nýtast til landslagsmótunar. Að öðrum kosti þarf að flytja efni sem losnar vegna framkvæmda í Breiðumýri um langan veg með tilheyrandi neikvæðum umhverfisáhrifum.

Bæjarráð samþykkir að leggja til við bæjarstjórn að samþykkja tillögu skipulagsnefndar um að vísa umsókn um byggingarleyfi vegna innri skipulagsbreytinga á einbýlishúsinu við Engimýri 6 til grenndarkynningar samkvæmt 1. mgr. 44. gr. skipulagslaga nr. 123/2010. Grenndarkynna skal umsóknina eigendum að Engimýri 3,4,5,7 8 og 10.

Bæjarráð samþykkir að leggja til við bæjarstjórn að samþykkja tillögu skipulagsnefndar að auglýsa samkvæmt 1. mgr. 31. gr. skipulagslaga nr. 123/2010, sbr. 1. mgr. 41. gr. sömu laga tillögu að breytingu á deiliskipulagi Hnoðraholts norður vegna lóðarinnar við Þorraholt 2-4. Tillagan gerir ráð fyrir eftirfarandi breytingum.

- Hámarkshæð húss númer 2 hækkar um 2,5 m en breidd byggingareitsins minnkar um 3 metra.

- Að austurhluti 1.hæðar í húsi númer 2 verði atvinnurými í stað bílageymslu.

- Að kjallarar verði 4 í stað 2-3.

- Að kjallari 2 verði atvinnurými í stað bílageymslu.

- Að 3.000 m2 bætist við bílageymslu í kjallara.

- Að staðsetning dælustöðvar innan lóðar færist til.

Vekja skal athygli eigenda annarra eigna í Þorraholti og í Útholti 2,4,6,8 og 10 sem og Útholti 1-3, 5-9 og 11-17 á auglýsingunni.

Bæjarráð samþykkir tillögu skipulagsnefndar um breytingu á deiliskipulagi hesthúsabyggðar við Kjóavelli. Tillagan gerir ráð fyrir breikkun byggingarreita úr 12 metrum í 13 metra á öllum hesthúsalóðum innan Garðabæjar á Kjóavöllum. Auk þess felst breytingin í því að viðhalda núverandi þakformi á hesthúsum í Andvarahverfi, bæði á núverandi hesthúsum og 8 nýjum hesthúsum vestast í Andvarahverfinu, um leið og heimildir fyrir kvistum og þakgluggum eru rýmkaðar.

Skilmálar fyrir þakform húsa norðan megin við Andvaravelli 2a-8a, haldast óbreyttir.

Tillagan var auglýst og bárust engar athugasemdir. Samþykkt tillaga skal send Skipulagsstofnun samkvæmt 3. ml. 3. mgr. 41. gr. skipulagslaga nr. 123/2010 og auglýst í B- deild Stjórnartíðinda.

Bæjarráð samþykkir að leggja til við bæjarstjórn að samþykkja tillögu skipulagsnefndar að auglýsa samkvæmt 1. mgr. 31. gr. skipulagslaga nr. 123/2010, sbr. 36. gr. sömu laga tillögu að breytingu á aðalskipulagi Garðabæjar sem nær til landsvæðis á norðanverðum Arnarneshálsi (Arnarland). Áður en tillagan er auglýst skal hún send Skipulagsstofnun til athugunar samkvæmt 3. mgr. 30. gr. skipulagslaga.

Sviðsstjóri umhverfissviðs gerði grein fyrir skipun starfshóps á vegum SSH sem var falið að vinna að endurskoðun samþykkta sveitarfélaganna á höfuðborgarsvæðinu um meðhöndlun úrgangs vegna áhrifa af breytingum á lagaumhverfi varðandi meðhöndlun sorps frá heimilum.

Bæjarráð frestar afgreiðslu málsins og vísar því til nánari skoðunar bæjarstjóra.

Í umsókninni er farið fram á tímabundið áfengisleyfi á dansleik í tilefni landsþings Lionsklúbba sem haldið er í íþróttamiðstöð Álftaness dagana 10. - 12. maí 2024.

Bæjarráð gerir ekki athugasemdir við að umbeðið leyfi verði veitt.