8. fundur

Sigurður Flosason tónlistarmaður og listrænn stjórnandi jazzhátíðarinnar mætir á fundinn.

Sigurður Flosason, tónlistarmaður og listrænn stjórnandi Jazzhátíðar Garðabæjar frá upphafi, var gestur fundarins undir þessum lið. Sigurður fór yfir hvernig hátíðin hefur verið á liðnum árum en í ár verður hátíðin haldin í 14. sinn með upphaf á Sumardaginn fyrsta 25. apríl nk. Einnig greindi Sigurður frá fyrstu hugmyndum að dagskrá hátíðarinnar á þessu ári. Umræður voru um jazzhátíðina og kynningu á hátíðinni.

Farið yfir hvernig tókst til á Safnanótt og Sundlauganótt 8. og 9. febrúar sl.

Vetrarhátíð var haldin dagana 7.-10. febrúar sl. með þátttöku allra sveitarfélaga á höfuðborgarsvæðinu í dagskrár Safnanætur og Sundlauganætur. Á Safnanótt var opið hús í Bókasafni Garðabæjar, Hönnunarsafni Íslands, burstabænum Króki og á Bessastöðum. Góð mæting var í söfnin þetta kvöld og farið var yfir hvernig tókst til. Á Sundlauganótt var að þessu sinni boðið upp á dagskrá í Ásgarðslaug þar sem einnig var góð mæting enda veðrið mjög gott. Bein útsending var frá dagskránni í Ásgarðslaug í fréttatíma sjónvarpsins.

Farið yfir hvernig tókst til á tónleikunum 12. febrúar sl.

Þriðjudaginn 12. febrúar sl. voru tónleikar í tónleikaröðinni Þriðjudagsklassík þar sem þær Emilía Rós Sigfúsdóttir flautuleikari og Ástríður Alda Sigurðardóttir píanóleikari fluttu frönsk tónverk í sal Tónlistarskóla Garðabæjar. Farið var yfir hvernig tókst til. Þriðju og síðustu tónleikarnir í tónleikaröðinni verða haldnir þriðjudaginn 12. mars nk. þegar tónlistarhópurinn UMBRA kemur fram.

Niðurstöður fyrir Garðabæ úr árlegri þjónustu/íbúakönnun Gallup kynntar.

Niðurstöður úr árlegri þjónustukönnun Gallup þar sem viðhorf íbúa til þjónustu er mælt voru kynntar. Farið var yfir helstu niðurstöður fyrir Garðabæ og þá sérstaklega niðurstöðu spurningar þar sem spurt er um ánægju með menningarmál. Könnunin er aðgengileg á vef Garðabæjar ásamt eldri könnunum.

Fylgiskjöl

• 4029116_Garðabær_Þjk_svf_2018_til_birtingar.pdf

Erindi Ragnhildar Ásvaldsdóttur, dags. 19. febrúar 2019, um styrk vegna heimildarmyndar tekið fyrir.

Erindi Ragnhildar Ásvaldsdóttur, leikstjóra og framleiðanda, dags. 19. febrúar sl., um styrk vegna heimildamyndar um líf og byggingarlist Högnu Sigurðardóttur arkitekts var tekið fyrir. Upplýsingastjóra var falið að kanna hvort hægt sé að sýna myndina í Garðabæ, t.d. í tengslum við skólastarf og/eða í samstarfi við Hönnunarsafn Íslands.

Menningar- og safnanefnd samþykkir að veita verkefninu styrk að upphæð 200 þúsund krónur.

Farið yfir hvernig fræðslu- og sögugöngur undanfarinna ára hafa verið og rætt um framhald á þessu ári.

Farið var yfir hvernig fræðslu- og sögugöngur undanfarinna ára hafa verið í samstarfi menningar- og safnanefndar, umhverfisnefndar og Bókasafns Garðabæjar. Einnig hafa göngurnar verið tengdar lýðheilsuverkefni og göngum Ferðafélags Íslands síðustu tvö ár í september mánuði.

Ræddar voru fyrstu hugmyndir að göngum og dagsetningum í vor og haust. Umræður voru um skilti og merkingar á gönguleiðum.

Farið var yfir málefni minjagarðsins að Hofsstöðum og eldri samþykkt um að ganga til samninga við margmiðlunarfyrirtækið Gagarín um hugmyndahönnun þar sem í fyrsta áfanga verður unnið hönnunarskjal þar sem farið verður í endurskoðun á því efni sem var búið til fyrir garðinn á sínum tíma. Nýjar frásagnarleiðir verða skoðaðar og hugmyndir þar um varpaðar fram með tíma- og kostnaðaráætlun í lok fyrsta fasa. Stefnt að því að koma þessari vinnu af stað sem fyrst með vorinu.

Greint var frá fundum sem formaður og upplýsingastjóri hafa átt með ýmsum aðilum í tengslum við skoðun á því hvernig best er að halda utan um listaverkasafn bæjarins. Stefnt er að því að gera samning við ákveðinn aðila um endurskráningu á listaverkum bæjarins þar sem einnig verður gerð greining á því hvaða verk þykja eftirtektarverð og ber að halda sérstaklega utan um. Skoðað verður á sama tíma með hvaða hætti er best að setja verkin inn í sér skráningarkerfi eins og t.d. Sarp sem er notað víða hjá opinberum söfnum. Rætt var um mögulega stefnumótun í framhaldinu þegar skráningarvinnunni er lokið.

Farið var yfir drög að starfsáætlun nefndarinnar út árið 2019 sem var lögð fram. Umræða um menningaruppskeruhátíð og dagsetning í lok maí ákveðin fljótt.

Greint var frá opnun á listasýningu í Garðabæ 16. febrúar sl. á vegum Listasafns ASÍ þar sem sýnd eru verk Hildigunnar Birgisdóttur. Sýningin sem ber heitið UNIVERSAL SUGAR stendur til 28. febrúar nk.