10. fundur

Í ákvæði 35. gr. skipulagslaga nr. 123/2010 kemur fram að sveitarstjórnum beri að loknum sveitarstjórnarkosningum að meta hvort ástæða sé til að endurskoða aðalskipulag sveitarfélagsins.

Málið hefur verið tekið fyrir í bæjarráði sem vísaði því til umfjöllunar í skipulagsnefnd.

Núgildandi Aðalskipulag Garðabæjar gildir fyrir tímabilið 2016-2030. Það tók gildi með auglýsingu í B-deild stjórnartíðinda 4. maí 2018 og er því liðið á hálft fjórða ár af gildistíma gildandi aðalskipulags.

Í 4.mgr.28.gr.Skipulagslaga segir að í aðalskipulagi skuli marka stefnu til a.m.k tólf ára.

Heildarendurskoðun aðalskipulags er stórt og umfangsmikið verkefni þar sem að fjölmargir þættir eru undir hverju sinni. Það getur því verið æskilegt að á milli þess að aðalskipulag er endurskoðað í heild sinn sé unnið að breytingum þar sem að meiri tími gefst til að móta ákveðna málaflokka og er þá hægt að taka þá hluta beint inn í endurskoðað aðalskipulag þegar að því kemur.

Skipulagsnefnd hefur nú þegar ákveðið að ráðast í endurskoðun á þeim hluta aðalskipulags sem fjallar um Samgöngu-og þjónustukerfi (4.kafli)og er undirbúningur þeirrar vinnu hafinn. Þar verður lögð megin áhersla á endurskoðun stígakerfis og almenningssamganga þar sem vistvænar samgöngur verða hafðar að leiðarljósi.

Skipulagsnefnd telur að ekki sé ástæða til þess að Aðalskipulag Garðabæjar verði tekið til endurskoðunar í heild sinni á kjörtímabilinu 2022-2026.

Lagðar fram tillögur að lýsingu á breytingu svæðisskipulags höfuðborgarsvæðisins annarsvegar og lýsingu að breytingu á Aðalskipulagi Garðabæjar 2016-2030 hinsvegar.

Svæðisskipulagsbreytingin gerir ráð fyrir breytingu á vaxtarmörkum byggðar en aðalskipulags breytingin gerir ráð fyrir að opin svæði í Rjúpnahlíð breytist í athafnasvæði.

Áður hefur skipulagsnefnd og bæjarstjórn samþykkt sameiginlega lýsingu en svæðisskipulagsnefnd mælti með því að lýsingar verði aðskildar og eru þær lagðar fram sem slíkar.

Skipulagsnefnd samþykkir framlagðar tillögur sem lýsingu svæðisskipulagsbreytingar í samræmi við 23.gr.Skipulagslaga nr.123/2010 og sem lýsingu aðalskipulagsbreytingar í samræmi við 1.mgr.30.gr.sömu laga.

Svæðisskipulagsnefnd hefur tekið lýsingu svæðisskipulagsbreytingarinnar til meðferðar og sent hana til sveitarfélaga sem aðild eiga að svæðisskipulagi höfuðborgarsvæðisins til afgreiðslu.

Lýsing vegna aðalskipulagsbreytingar skal auglýst og send umsagnaraðilum.

Lagðar fram þær umsagnir og ábendingar sem borist hafa við verkefnislýsingu breytingar á Aðalskipulagi Garðabæjar 2016-2030 (Rammahluti Aðalskipulags).

Skipulagsnefnd vísar þeim umsögnum og ábendingum sem borist hafa til vinnu við mótun skipulagstillagna.

Lögð fram tillaga að breytingu Aðalskipulags Garðabæjar 2016-2030 sem nær til stíga-og gatnakerfis í Upplandi Garðabæjar.

Með vísan í umsögn Vegagerðarinnar dags. 12. apríl 2022 um Flóttamannaveg (Elliðavatnsveg/Ofanbyggðarveg)í forkynntri tillögu leggur skipulagsnefnd til að sú breyting verði gerð á tillögunni að Flóttamannavegur frá Urriðaholti að tengibrautinni Vífilsstaðavegi verði skilgreindur sem "tengibraut" en ekki sem "aðrir vegir" eins og gildandi aðalskipulag gerir ráð fyrir. Eins og fram kemur í umsögn Vegagerðarinnar er vegurinn áfram stofnvegur í umsjá Vegagerðarinnar og einnig er tekið fram að ekki séu gerðar athugasemdir við breytingar á legu vegarins né staðsetningu brúar og undirganga enda styður tillaga það markmið að bæta öryggi vegarins til muna. Skipulagsnefnd bendir á að "stofnvegir" samkvæmt skilgreiningu Vegagerðar geta í sumum tilfellum verið skilgreindir sem tengibrautir í aðalskipulagsáætlunum sveitarfélaga.

Skipulagsnefnd tekur fram að ástæða þess að tillagan gerir ekki ráð fyrir reiðvegatengingu meðfram Flóttamannavegi eða þvert í gegnum Urriðakotsland og Setbergsland er m.a. vegna þess að ekki hefur náðst samkomulag við landeigendur um stöðu þeirra í skipulagsáætlunum. Skipulagsnefnd vísar hugmyndum um reiðstígakerfi svæðisins til þeirrar vinnu sem framundan er við endurskoðun stígakerfis Aðalskipulags Garðabæjar.

Skipulagsnefnd samþykkir að vísa tillögunni með ofangreindri breytingu til auglýsingar í samræmi við 1.mgr.31.gr.Skipulagslaga og skal hún send Skipulagsstofnun til athugunar sbr. 3.mgr.30.gr.sömu laga.

Stefna skal að því að tillagan verði auglýst samhliða tillögum að deiliskipulagi Vífilsstaðahrauns og Útivistarsvæðis í Urriðavatnsdölum annarsvegar og tillögum að breytingum á deiliskipulagi Heiðmerkur og deiliskipulagi Urriðaholts austurhluta hinsvegar.

Formaður skipulagsnefndar og skipulagsstjóri gerðu grein fyrir fundum sem haldnir hafa verið í tengslum við ábendingar sem bárust í forkynningu tillögunnar. Gerð tillögunnar er langt komin og stefnt er að því að hún verði hún lögð fyrir næsta fund nefndarinnar.

Formaður skipulagsnefndar og skipulagsstjóri gerðu grein fyrir fundum sem haldnir hafa verið í tengslum við ábendingar sem bárust í forkynningu tillögunnar. Samráðsfundur verður haldinn með Umhverfisstofnun síðar í þessari viku. Gerð tillögunnar er langt komin og stefnt er að því að hún verði hún lögð fyrir næsta fund nefndarinnar.

Skipulagsstjóri gerði grein fyrir því að tillaga að breytingu aðalskipulags Garðabæjar sem nær til stígakerfis í upplandi og tillaga að deiliskipulagi Vífilsstaðahrauns og Útivistarsvæðis í Urriðavatnsdölum kalli á breytingu á deiliskipulagi Heiðmerkur.

Breytingartillaga þarf að gera ráð fyrir reiðstíg um Ljósakollulág frá Grunnavatnsskarði niður Vífilsstaðahlíð að reiðstíg í Urriðakotshrauni. Einnig þarf breytingartillagan að breyta deiliskipulagsmörkum að vestanverðu og laga hana bæði að staðfestum landamerkjum Vífilsstaða og Urriðakots sem og skipulagsmörkum tillögu að deiliskipulagi útivistarsvæðis í Urriðavatnsdölum. Einnig að mörkum friðlands Búrfells, Búrfellsgjár og Selgjár. Stefnt er að því að tillaga verði lögð fyrir næsta fund skipulagsnefndar.

Skipulagsstjóri gerði grein fyrir því að tillaga að breytingu aðalskipulags Garðabæjar sem nær til stígakerfis í upplandi og tillaga að deiliskipulagi Vífilsstaðahrauns og Útivistarsvæðis í Urriðavatnsdölum kalli á breytingu á deiliskipulagi Urriðaholts austurhluta.

Gera þarf ráð fyrir því að reiðstígur meðfram Flóttamannavegi verði felldur út. Stefnt er að því að tillaga verði lögð fyrir næsta fund skipulagsnefndar.

Lögð fram umsókn tækni-og umhverfissviðs fyrir gatnagerð innan skipulagssvæðis deiliskipulags að Króki á Álftanesi.

Skipulagsnefnd veitir framkvæmdaleyfi í samræmi við 13.gr.Skipulagslaga nr.123/2010 sem er í samræmi við framlögð gögn og deiliskipulag.

Lögð fram umsókn að breytingu deiliskipulags Hliðs á Álftanesi sem gerir ráð fyrir því að byggingarreitur veitingahúss lengist um 3,3 m til vesturs að lóðarmörkum.

Skipulagsnefnd metur breytinguna sem óverulega breytingu deiliskipulags Hliðs í samræmi við 2.mgr.43.gr.Skipulagslaga nr.123/2010 og vísar henni til grenndarkynningu í samræmi við 44.gr.sömu laga. Grenndarkynna skal Umhverfisstofnun þar sem að fólkvangurinn að Hliði umlykur lóð ferðaþjónustunnar.

Lögð fram umsókn um deiliskipulagsbreytingu sem gerir ráð fyrir stækkun byggingareits út á framlóð vegna áforma um viðbyggingu.

Vísað til skoðunar hjá tækni-og umhverfissviði.

Lögð fram umsókn um byggingaráform sem kallar á breytingu deiliskipulags.

Vísað til skoðunar hjá tækni-og umhverfissviði.

Lagt fram erindi frá lóðarhafa Einilundar 2.

Málinu vísað til frekari skoðunar hjá tækni-og umhverfissviði.

Lögð fram fyrirspurn um hugmynd að viðbyggingu við íbúðarhús sem geti verið tvær hæðir. Skipulagsnefnd telur að hugmyndin sé ekki í anda deiliskipulagsins sem aðeins heimilar minniháttar timburútbyggingar eins og garðstofur. Þakgerð húsanna er eitt helsta einkenni deiliskipulagsins og skapar þann sterka staðaranda sem er til staðar í Bæjargili og full ástæða er til að standa vörð um.

Svar nefndarinnar er því neikvætt.

Lögð fram fyrirspurn um stækkun byggingarreits raðhúsalóðar að Móaflöt 25 sem er í raðhúsalengjunni Móaflöt 17-27 en í henni eru 6 raðhúsaeiningar.

Skipulagsnefnd mælir ekki með því að byggingarreitir séu stækkaðir út á framlóðir og bendir á að við gerð nýrrar deiliskipulagsáætlunar fyrir Flatir var gert ráð fyrir stærri byggingarreitum á baklóð til að koma til móts við stækkunarmöguleika.

Ef farið yrði í að gera breytingar á framlóðum þyrfti að gera það með breytingu sem næði til sambærilegra raðhúsalóða við Móaflöt. Einnig er bent á að beiðni um breytingar á deiliskipulagi í raðhúsalengju þarf að vera með samþykki allra eigenda samstæðunnar.

Lögð fram tillaga að breytingu deiliskipulags Flata sem gerir ráð fyrir stækkun byggingarreits einbýlishúss á baklóð.

Skipulagsnefnd gerir ekki athugasemd við að skipulagsstjóri vísi tillögu til grenndarkynningar sem gerir ráð fyrir því að byggingarreitur verði ekki nær lóðarmörkum að austanverðu en 1 metri.

Lögð fram tillaga að óverulegri breytingu deiliskipulags Vífilsstaðavegar sem gerir ráð fyrir reitum fyrir útistarfsemi veitingastaða að lokinni grenndarkynningu.

Ein athugasemd hefur borist.

Vísað til skoðunar hjá tækni-og umhverfissviði.

Formaður skipulagsnefndar og skipulagsstjóri fóru yfir stöðu skipulagsmála á Vífilsstöðum. Ekkert deiliskipulag er í gildi en svæðið er innan svæðis rammahluta aðalskipulags sem náði til Vífilsstaðalands utan Heiðmerkur. Þar er svæðið í kringum Vífilsstaði (4.01 S) skilgreint sem blönduð byggð stofnana og íbúða með áherslu á heilsutengda starfsemi sem fer vel með núverandi starfsemi Vífilsstaðaspítala. Þar segir ennfremur að byggð skuli taka mið af núverandi byggð og byggingar skulu m.a. ekki vera hærri en núverandi hæð Vífilsstaðaspítala. Austan við svæði 4.01 S er reituri 4.13 íb og þar er gert ráð fyrir lágreistri íbúðarbyggð með hátt hlutfall sérbýlis.

Skipulagsnefnd beinir því til tækni-og umhverfissviðs að vinna minnisblað um stöðu skipulags á Vífilsstöðum og hvaða skref er skynsamlegt að taka á næstu misserum til að móta stefnu um framtíð svæðisins.

Lögð fram tillaga að breytingu deiliskipulags Urriðaholts Norðurhluta 4 sem nær til lóðanna Lautargata 1, 3 og 5.

Tillagan gerir ráð fyrir því að að ein hæð bætist við undir aðkomuhæð til aðlögunar að landslagi. Hæðarkóti aðkomuhæðar breytist ekki. Íbúðum á hverri lóð er fjölgað um tvær, úr 8 í 10 og eru viðbótaríbúðir undir 90 m2 að stærð. Heildarfjöldi íbúða á lóðunum þremur hækkar úr 24 í 30. Ákvæði um eitt gestastæði á lóð er fellt niður en gott framboð er af gestastæðum innar í götunni.

Tekið hefur verið tillit til umsagnar deiliskipulagshöfundar um þá tillögu sem áður var lögð fram. Skipulagsnefnd leggur til að því ákvæði verði bætt við tillöguna þar sem að óskað er eftir rúmum byggingarreit að tillögu að aðalteikningum verði vísað til kynningar í skipulagsnefnd þegar þær liggja fyrir ásamt umsögn deiliskipulagshöfundar. Skipulagsnefnd vísar tillögunni til auglýsingar í samræmi við 1.mgr.43.gr.Skipulagslaga nr.123/2010.

Guðrún Dóra Brynjólfdóttir vék af fundi undir þessum lið.

Lögð fram umsókn tækni-og umhverfissviðs um framkvæmdaleyfi fyrir aðstöðu fyrir stjörnuskoðun við bílastæði við Heiðmerkurveg sem tengist útivistarstíg að Búrfelli og Búrfellsgjá.

Skipulagsnefnd samþykkir veitingu framkvæmdaleyfis í samræmi við framlögð gögn sbr.13.gr.Skipulagslaga nr.123/2010 með fyrirvara um samþykki Umhverfisstofnunar þar sem að staðsetningin er innan Friðlands Búrfells, Búrfellsgjár og Selgjár. Samkvæmt bráðabirgðaákvæði friðlýsingar B-deild Stjórnartíðinda nr.687/25.júní 2020 er Umhverfisstofnun heimilt að veita leyfi fyrir framkvæmdum innan friðlandsins þó svo að deiliskipulag liggi ekki fyrir.

Lagt fram erindi Skógræktarfélag Íslands með ályktun aðalfundar um Græna stíginn og skipulagsáætlanir sveitarfélaga á Höfuðborgarsvæðinu.

Kveðið er á um Græna stíginn og Bláþráðinn í Aðalskipulagi Garðabæjar 2016-2030 í kafla 4.2.5. í greinargerð. Liggur Grænistígurinn frá bæjarmörkum við Kópavog í Básaskarði um Sandahlíð, norður fyrir Vífilsstaðavatn um rætur Vífillstaðahlíðar og svo þvert yfir Urriðakotshraun norður fyrir Flóðahjalla, hjá Oddsmýri og suður fyrir Svínholt að bæjarmörkum við Hafnarfjörð.

Gert er ráð fyrir græna stígnum í gildandi deiliskipulagi Heiðmerkur og í tillögu að deiliskipulagi útivistarsvæðis í Urriðavatnsdölum sem nú er í vinnslu.

Skipulagsnefnd tekur undir það með Skógræktarfélagi Íslands að hugað verði að fjármögnum framkvæmda enda er Græni stígurinn í samræmi við skipulagsáætlanir á öllum stigum í Garðabæ sem og í svæðisskipulagi höfuðborgarsvæðisins.

Lögð fram umsókn lóðarhafa að Vetrarbraut 2-4 og 6-12 um breytingar á ákvæðum deiliskipulags Vetrarmýrar. Höfundur deiliskipulags Vetrarmýrar, Sigurður Einarsson arkitekt hjá Batteríinu sat fundinn undir þessum lið.

Lagt fram minnisblað deiliskipulagshöfundar um umsóknina og gerði hann grein fyrir niðurstöðu sinni.

Skipulagsnefnd leggur til að unnin verði tillaga að breytingu deiliskipulags Vetrarmýrar sem gerir ráð fyrir ákvæði eins og sótt er um sem nær til allra lóða í Vetrarmýri utan íþróttamannvirkja.