Íslenskt handprjón kynnt
Hádegishittingur með hönnuðunum Huldu Kristínu og Kristrúnu Rut.
Miðvikudaginn 10. september kl. 12.15 munu þær Hulda Kristín Hauksdóttir og Kristrún Rut H. Antonsdóttir kynna rannsóknarniðurstöður sínar á viðburðinum Hádegishittingi með hönnuði í Hönnunarsafninu á Garðatorgi.
Þær stöllur fengu styrk úr Nýsköpunarsjóði námsmanna hjá Rannís til að rannsaka handprjón á Íslandi og voru með vinnuaðstöðu í Hönnunarsafninu í sumar. Þær unnu fræðilega vinnu, prjónuðu prufur og prófuðu nýjar aðferðir í prjóni, tóku viðtöl og unnu skapandi með handprjónshefðina. Niðurstöður rannsóknarinnar verða kynntar gestum á Hádegishittingi með hönnuði þar sem boðið verður uppá kaffi og kleinur og notalegheit.