Hvatningarsjóður fyrir unga listamenn

Ungir listamenn í Garðabæ á aldrinum 15-25 ára geta sótt um styrk í Hvatningarsjóð fyrir unga listamenn. Einstaklingar og hópar geta sótt um styrk til hvers kyns listviðburða eða verkefna sem fara fram á árinu og næsta ári. 

Tekið verður sérstaklega tillit til verkefna/viðburða sem fara fram í Garðabæ og eru til þess fallnir að efla menningarlíf bæjarins. Styrkur er ekki ætlaður til náms eða námskeiða. 

Næst verður auglýst eftir umsóknum vorið 2019.

Nánari upplýsingar veitir Hulda Hauksdóttir upplýsingastjóri, s. 525 8500 / 525 8527 eða í netfangi hulda@gardabaer.is.

Reglur um Hvatningarsjóð fyrir unga listamanna í Garðabæ

1. gr.
Í samræmi við fjárhagsáætlun Garðabæjar hverju sinni skal árlega veita  styrki til ungra listamanna í Garðabæ til að efla þá og hvetja til frekari listsköpunar. Menningar- og safnanefnd Garðabæjar skal úthluta styrkjunum við sérstaka athöfn.

2. gr.
Menningar- og safnanefnd Garðabæjar auglýsir eftir umsóknum um styrkina.  Auglýst skal eftir umsóknum á vorönn.  Hægt er að sækja um styrk á þar til gerðu umsóknareyðublaði vegna hvers kyns listforms. 

3. gr.
Einstaklingar og hópar geta sótt um styrk í hvatningasjóðinn til hvers kyns listviðburða eða verkefna á þessu ári og næsta ári. Styrkur er ekki ætlaður til náms eða námskeiða. Tekið verður sérstaklega tillit til verkefna/viðburða sem fara fram í Garðabæ og eru til þess fallnir að efla menningarlíf bæjarins. Á umsóknareyðublaði verður nánari útlistun á hvaða gögn þurfa að fylgja með umsóknum s.s. meðmæli, kostnaðaráætlun o.fl.  Menningar- og safnanefnd verður heimilt að kalla eftir frekari greinargerð frá styrkþega að loknu verkefni. 

4. gr
Þeir einstaklingar koma til greina við úthlutun styrkja sem hafa fasta búsetu (lögheimili) í Garðabæ og eru á aldrinum 15-25 ára.  Hópar sem fá styrk verða að vera samansettir af einstaklingum þar sem meirihluti hefur fasta búsetu í Garðabæ.  Heimilt er að víkja frá þessum viðmiðum í undantekningartilfellum.  Menningar- og safnanefnd getur einnig úthlutað styrkjum til einstaklinga eða hópa án þess að viðkomandi hafi sótt um styrk.

5. gr.
Heildarupphæð styrkja miðast við fjárhagsáætlun hverju sinni. Menningar- og safnanefnd ákveður fjölda styrkja og upphæðir miðað við fyrirliggjandi umsóknir hverju sinni. Menningar- og safnanefnd ákveður úthlutun úr hvatningarsjóðnum.

6. gr.
Reglur þessar skulu endurskoðaðar árlega. 

Samþykkt á fundi bæjarstjórnar 2. maí 2013.